استانانىڭ قوعامدىق كولىكتەرىندە استانا قالاسىنىڭ جولاۋشىلار كولىگى باسقارماسىنىڭ باسشىسى بەكمىرزا يگەنبەردينوۆتىڭ باستاماسىمەن قۇقىق بۇزۋشىلاردى انىقتاۋ ماقساتىندا رەيدتىك ءىس-شارالار جۇرگىزىلىپ جاتىر. كولىكتىك باقىلاۋ دەپارتامەنتى «استانا LRT» جشس مەن استانا قالاسى ءىىد-ءنىڭ جەرگىلىكتى پوليتسيا قىزمەتى بىرلەسىپ ۇيىمداستىرىپ جاتقان شارا قالالىق باعدارلاردىڭ بارلىعىن قامتيدى.
«رەيد كۇندەرى قوعامدىق كولىكتە جۇرگەنى ءۇشىن تولەمنىڭ جۇزەگە اسۋ فاكتىسىن تەكسەرەتىن كولىكتىك باقىلاۋ دەپارتامەنتىنىڭ جۇمىسى كۇشەيتىلەدى. جولاقىسىن تولەۋدەن جالتارعاندىعى ءۇشىن جاۋاپقا تارتۋ جونىندە حالىقتى اقپاراتتاندىرۋ, قوعامدىق كولىكتە بيلەتسىز جۇرگەن ازاماتتاردى انىقتاۋ, جولاقىسىن تولەۋدەن جالتارۋ فاكتىلەرىنىڭ جانە قوعامدىق كولىكتەردەگى جولاقىسىن تولەۋگە قاتىستى باسقا دا قۇقىق بۇزۋشىلىقتاردىڭ الدىن الۋ اتالمىش اكتسيانىڭ ماقساتى بولىپ تابىلادى», - دەلىنگەن «استانا LRT» جشس-ءنىڭ حابارلاماسىندا.
ەسكە سالايىق, 2018 جىلدىڭ 1قاڭتارىنان باستاپ استانانىڭ بارلىق باعدارلى كولىك قۇرالدارى جولاقىسىن تولەۋدىڭ ەلەكتروندى جۇيەسىمەن جابدىقتالعان. بۇدان بۇرىن قولدانىلعان جىرتىلمالى وراما بيلەتتەر ەندى بەرىلمەيدى. بۇدان بىلاي جولاۋشىلار اقشالاي تولەمدى جۇزەگە اسىرعان جاعدايدا, بيلەتتەردى جولاقىسىن تولەۋدىڭ ەلەكتروندى جۇيەسى ارقىلى الادى. سونىمەن قاتار, جولاۋشىلاردىڭ كولىكتىك كارتانىڭ كومەگىمەن دە جولاقىسىن تولەۋ مۇمكىندىگى بار. ول ءۇشىن جولاۋشى كارتاسىنا الدىن الا اقشا قۇيىپ الۋى ءتيىس.
2018 جىلدىڭ باسىنان 5 جولاۋشىعا قوعامدىق كولىكتە بيلەتسىز جۇرگەنى ءۇشىن اكىمشىلىك ايىپپۇل سالىندى.
قوعامدىق كولىكتە جولاقىسىن تولەمەگەندەرگە جەرگىلىكتى پوليتسيا قىزمەتى 2 ايلىق ەسەپتىك كورسەتكىش (اەك) كولەمىندە اكىمشىلىك ايىپپۇل سالادى. ول 4810 تەڭگەنى قۇرايدى.
«استانا LRT» جشس-دە بەلگىلى بولعانداي, مۇنداي اكتسيالار جۇيەلى تۇردە وتكىزىلەدى دەپ جوسپارلانۋدا.
مۇنىمەن قوسا, رەيد بارىسىندا جولاۋشىلاردىڭ بيلەتسىز جۇرۋىنە مۇمكىندىك بەرگەن 15 كوندۋكتور انىقتالعان بولاتىن. مۇنداي ارەكەتى ءۇشىن كوندۋكتورلارعا 5اەك كولەمىندە, ياعني 12025 تەڭگە ايىپپۇل سالىنادى.
