پارلامەنتشىلەر ەلىمىزدەگى مۇناي جانە گاز سالاسىنىڭ سۇرانىسىن قامتاماسىز ەتىپ وتىرعان اقتوبە مۇناي جابدىقتارى زاۋىتىندا بولدى. بۇل كاسىپورىننىڭ ونىمدەرى قازاقستانداعى كومىرسۋتەگى كەنىشتەرىنىڭ بارىنە جىبەرىلەدى. قازىرگى زامانعى جابدىقتاردىڭ ارقاسىندا زاۋىت ەكسپورتتىق الەۋەتتى ۇلعايتۋدى جوسپارلاپ وتىر.
دەپۋتاتتار جاڭا «بولاشاق» شاعىن اۋدانىندا سالىنعان № 68 ورتا مەكتەپتىڭ ۇستازدار ۇجىمىمەن كەزدەستى. سەناتور م.تاعىموۆ ءبىلىم ۇياسىنىڭ جوعارى دەڭگەيدە ماتەريالدىق-تەحنيكالىق جابدىقتالعانىن اتاپ ءوتتى. ونىڭ ايتۋىنشا, مۇندا ۋاقىت تالابىنا ساي ءبىلىم الۋ ءۇشىن بارلىق جاعداي جاسالعان.
وبلىس ورتالىعىنا ساپار باعدارلاماسى بويىنشا سەناتورلار ابىلقايىر حان داڭعىلىندا ورنالاسقان «قازاق حالقىنا مىڭ العىس» كەشەنى مەن «جۇبانوۆتار الەمى» مۋزەي-ۇيىندە دە بولدى. م. جۇماعازيەۆ اعايىندى احمەت جانە قۇدايبەرگەن جۇبانوۆتاردىڭ مۇرالارى تەك اقتوبە ەمەس, بۇكىل ەلىمىزدىڭ قازىناسىنا اينالعانىن اتاپ ءوتتى. ونەرلى دارىندار وتباسى جۇبانوۆتار قازاقستاننىڭ مادەنيەت سالاسىنا قوماقتى ۇلەس قوستى. ەلباسىنىڭ رۋحاني جاڭعىرۋ باعدارلاماسىن ىسكە اسىرۋ اياسىندا اشىلعان مۇراجاي قازاقستان ونەرىنىڭ ەڭ ۇزدىك ۇلگىلەرىن ناسيحاتتاۋدىڭ تاماشا مۇمكىندىگى بولىپ وتىر.
دەپۋتاتتار العا اۋدانىندا بولعان كەزدە بەستاماق اۋىلىنداعى ىدىس-قاپتاۋ فابريكاسىنىڭ, «اقتەپ» جانە «اقتوبە ەت كلاستەرى» مەكەمەلەرىنىڭ جۇمىسىمەن تانىستى. سەناتورلار سونداي-اق مادەنيەت ۇيىندە, مەموريالدىق كەشەندە بولىپ, مەملەكەتتىك-جەكە ارىپتەستىك اياسىندا سالىنعان اۋىلدىق دارىگەرلىك امبۋلاتوريانىڭ قىزمەتىن كوردى.
دەپۋتاتتار «نۇرلى جول», «نۇرلى جەر» باعدارلامالارىن ىسكە اسىرۋ اياسىندا مەملەكەت باسشىسىنىڭ تاپسىرمالارىنىڭ ورىندالۋى تۋرالى ەڭبەك ۇجىمدارىن حاباردار ەتتى. مەملەكەت باسشىسىنىڭ «بولاشاققا باعدار: رۋحاني جاڭعىرۋ» باعدارلامالىق ماقالاسىنا ەرەكشە نازار اۋدارىلدى.
ايماق تۇرعىندارى ەلىمىزدىڭ دامۋىنا جانە ازاماتتاردىڭ ءال-اۋقاتىنىڭ ارتۋىنا جاڭا سەرپىن بەرەتىن مەملەكەت باسشىسىنىڭ رەفورمالارىنا قولداۋ ءبىلدىردى. كەزدەسۋگە قاتىسۋشىلاردىڭ ورتاق پىكىرى بويىنشا, ءبىزدىڭ ەلىمىزدە تەحنولوگيالىق جاڭعىرتۋعا, ونىڭ ىشىندە وتاندىق ونىمدەردى الەمدىك نارىققا شىعاراتىن اگرارلىق سالانى دامىتۋعا قاجەتتى بارلىق رەسۋرستار بار.
دەپۋتاتتارمەن اڭگىمە بارىسىندا اۋىل ەڭبەككەرلەرى اۋدانداعى اۋىل شارۋاشىلىعى كەشەنى الەۋەتىن ۇلعايتۋعا تىكەلەي قاتىستى بىرقاتار ماسەلەلەردى كوتەردى. اتاپ ايتقاندا, ونىمدەرگە سۋبسيديا ءبولۋ جانە ولاردى ساقتاندىرۋ, اۋىل شارۋاشىلىعى كووپەراتيۆتەرىن قۇرۋ قاعيدالارى, جاڭا نەسيە ساياساتىنىڭ قولدانىلۋى جانە اۋىل ەڭبەككەرلەرىن, شاعىن جانە ورتا بيزنەستى مەملەكەتتىك قولداۋدىڭ ءتيىمدى تەتىكتەرىن پايدالانۋ تۋرالى ايتىلدى.
سەناتورلار م.تاعىموۆ پەن م.جۇماعازيەۆ اۋداندىق اكىمدىك عيماراتىندا ازاماتتاردى قابىلدادى.
