– جانبوتا, جاڭا جىلعا تابان تىرەدىك. ال 2017 جىل ءسىزدىڭ ەسىڭىزدە نەسىمەن قالدى؟
– وتكەن جىلعا العىس ايتامىن. وزدەرىڭىز بىلەتىندەي, 2017 جىل قازاقستان سپورتى ءۇشىن ماڭىزدى وقيعامەن باستالدى. الماتى قالاسى تۇڭعىش رەت بۇكىالەمدىك قىسقى ۋنيۆەرسيادانى قابىلداپ, حالىقارالىق الاماندى جوعارى دەڭگەيدە وتكىزدىك. ستۋدەنتتەر اراسىنداعى جارىستا قولا جۇلدەگەر اتاندىم. جالپىكوماندالىق ەسەپتە ەكىنشى ورىن الدىق. سونىمەن قاتار ەكىنشى جىل قاتارىنان ەۋروپانىڭ ءابسوليۋتتى چەمپيونى اتاعىن جەڭىپ الدىم.
– وليمپيادادا ءۇمىت ارتىپ وتىرعان بىردەن-ءبىر سپورتشىسىز. تورتجىلدىقتىڭ باستى دوداسىنا جولداما الۋ قانشالىقتى قيىن بولدى؟
– وليمپياداعا قاتىسۋ كەز كەلگەن سپورتشىنىڭ ارمانى ەكەنىن ەسكەرسەك, بۇل جولدا ەشكىمنىڭ دە ايانىپ قالماسى انىق. سوندىقتان وليمپيا ويىندارى, الەم چەمپيوناتتارىنىڭ جۇلدەگەرلەرىمەن ءبىر قاتاردا تۇرىپ ۇپايدى ساراپقا سالامىز. وليمپياداعا بارۋ ءۇشىن رەيتينگتەگى 25 سپورتشىنىڭ ورتاسىندا بولۋعا مىندەتتىسىڭ. سوندىقتان بۇل وڭاي شارۋا ەمەس. شىنداپ كەلگەندە, جولدامانى قولىما ءالى العان جوقپىن. پحەنچحانعا كىمنىڭ باراتىنى قاڭتار ايىندا بەلگىلى بولادى. ازىرگە دايىندىقتى جالعاستىرا بەرەمىز.
– جالپى, وليمپياداعا سوڭعى دايىندىق قالاي ءجۇرىپ جاتىر؟
– كوڭىل كۇي دە, دايارلىق تا جامان ەمەس. جاقىندا قىتايدا وتكەن الەم كۋبوگى كەزەڭىنەن ورالدىق. ەندى ماسكەۋگە وليمپيادا الدىنداعى الەم كۋبوگى كەزەڭىنە اتتانامىز. بۇل – مەنىڭ ەكىنشى وليمپيادام. ۋاقىتتىڭ الدىنا شىعۋدىڭ قاجەتى جوق دەپ ويلايمىن. ءساتىن سالسا, فينالعا شىققانداردىڭ قاتارىنا ەنسەم دەگەن جوسپار بار.
– ءسىز باق سىنايتىن فريستايلدا سەكىرۋ ەلەمەنتتەرىن دۇرىس جاساۋ ازدىق ەتەدى, كورەرمەن مەن تورەشىلەردى باۋراپ الاتىنداي ادەمى دە بولۋى كەرەك. ءسىز ءوز جانكۇيەرلەرىڭىزدى بۇل جولى نەمەن تاڭ قالدىراسىز؟
– نەگىزى بىرنەشە جاڭا ەلەمەنتتى قوسسام با دەپ ويلاعانمىن. ازىرگە سەنىمسىزدىك بار. جارىستا قيىن ەلەمەنتتەردى جاسايمىن دەپ قۇلاپ جاتقانشا, ءاربىر قيمىلىڭدى تازا ورىنداپ شىعۋ ماڭىزدى.
– باستى قارسىلاس دەپ كىمدەردى ايتار ەدىڭىز؟
– ازىرگە قارسىلاستارىمنىڭ اتى-جوندەرىن تولىق قاراپ شىققان جوقپىن. بۇل سپورتتىڭ نەگىزىنەن قىتاي, رەسەي مەن بەلارۋستە قارقىندى دامىعانىن ەسكەرسەك, وسى ەلدەردىڭ سپورتشىلارى جۇلدەگە تالاسادى دەپ ويلايمىن.
– ءسىزدىڭ فريستايلعا وسىدان بىرنەشە جىل بۇرىن عانا كەلگەنىڭىزدى بىلەمىز. تاڭداۋىڭىز نەگە فريستايلعا ءتۇستى؟
– سپورتتىق گيمناستيكادا 9 جىل ءجۇرىپ سپورت شەبەرى اتاعىن الدىم. بۇل مەنىڭ اتالمىش سپورتتاعى مۇمكىندىگىمنىڭ شەگى سەكىلدى كورىندى. سوندىقتان كەز كەلگەن سپورتشى سەكىلدى مەن دە وليمپياداعا قاتىسۋ ءۇشىن جولىمدى باسقا سپورت تۇرىنەن ىزدەپ كورەيىن دەپ شەشتىم. 2011 جىلعى ازيادانى تەلەديدار ارقىلى تاماشالاپ وتىرىپ فريستايل جارىستارىنا كوزىم ءتۇستى. فريستايل مەن سپورتتىق گيمناستيكانىڭ ورتاق تۇستارى كوپ. بالكىم, وسى سەبەپتى دە سپورتتىڭ مەن ءۇشىن جاڭا, قىسقى تۇرىنە بەيىمدەلۋ قيىن سوقپاعان شىعار. از ۋاقىتتىڭ ىشىندە سپورت شەبەرى اتانىپ, كەيىننەن حالىقارالىق دارەجەدەگى سپورت شەبەرى اتاعىنا قول جەتكىزدىم.
– از عانا ۋاقىتتىڭ ىشىندە شاڭعى فريستايلىنان ءبىراز جەتىستىككە جەتتىڭىز. ءسىزدىڭ ويىڭىزشا, بۇل سپورت ءتۇرىن تاڭداعان ادامعا ەڭ الدىمەن نە كەرەك؟
– قاي سالادا جەتىستىككە جەتەمىن دەسەڭ دە ەڭ الدىمەن ادامنىڭ قۇلشىنىسى بولۋى كەرەك. الدىڭدا كەزدەسەتىن قيىندىققا توزە بىلگەن ءجون. سوندا عانا كوزدەگەن ماقساتىڭا قول جەتكىزەسىڭ.
– ءسىزدىڭ فريستايلمەن شۇعىلدانىپ جۇرگەنىڭىزدى باستاپقىدا اتا-اناڭىز بىلمەگەن ەكەن. قازىر جارىستارىڭىزدى تاماشالاپ جۇرە مە؟
– العاشىندا ولار رۇقسات بەرمەيدى دەپ فريستايلمەن كاسىبي تۇردە شۇعىلدانىپ جۇرگەنىمدى ايتپاعان ەدىم. ولار مەنى تەك شاڭعى تەبۋگە بارىپ ءجۇر دەپ ويلايتىن. ءبىرىنشى رەت سوچيدەگى وليمپيادادا كورگەن. جارىستار كوبىندە شەتەلدە وتەتىندىكتەن, نەگىزىنەن تەك تەلەديدار نە عالامتور ارقىلى كورىپ قولداپ وتىرادى. ۇيدە كوپ بولا بەرمەيتىنىمە دە ۇيرەنگەن. ء«وز تويىڭدا ۇيدە بولساڭ بولعانى» دەيدى.
– ۋنيۆەرسيادا قازاقستاندا شاڭعى اكروباتيكاسىنىڭ دامۋىنا قانشالىقتى اسەر ەتتى دەپ ويلايسىز؟
– ۋنيۆەرسيادا ارقىلى بۇل سپورتتىڭ تانىمالدىلىعى ارتقانى انىق. فريستايلمەن شۇعىلداناتىنىڭدى ايتساڭ, بىرەۋلەر «بۇل ءبيدىڭ ءبىر ءتۇرى مە؟» دەپ سۇراپ جاتادى. سوسىن ءتۇسىندىرىپ وتىرعانىڭ (كۇلىپ). قازىر جاعداي وزگەرىپ كەلەدى. ءوزىم بالالار فريستايل ۇيىرمەلەرىنە كوپتەپ جازىلسا ەكەن دەيمىن. ياعني بۇل سپورتتىڭ دامۋى ءۇشىن الدىمەن باسەكە كەرەك. قىتايدا سولاي. سوندىقتان ولاردىڭ اتلەتتەرىنىڭ دەڭگەيى دە جوعارى.
– ۋاقىت بولگەنىڭىزگە راحمەت! ءبىز دە سىزگە ساتتىلىك جولداس بولسىن دەگەن تىلەگىمىزدى بىلدىرەمىز.
اڭگىمەلەسكەن
ءمادينا اسىلبەك,
جۋرناليست
