بەتپەردە كيگەن بەلگىسىز ەكى ادام ءتۇن قاراڭعىلىعىن جامىلىپ, جانارماي بەكەتىنە باسا-كوكتەپ كىرگەن. الايدا, كاسسير مەن كۇزەتشى ولارعا قارسىلىق كورسەتىپ, ولجاسىز قالدىرعان.
«بەكەت تۇنگى ساعات وندا جابىلىپ, تەرەزە ارقىلى قىزمەت كورسەتىلەتىنىن قىلمىسكەرلەر الدىن الا بىلگەن. وسى ءساتتى پايدالانىپ, ارام ويلارىن جۇزەگە اسىرماق بولعان», دەلىنگەن ىشكى ىستەر دەپارتامەنتىنىڭ ءباسپاسوز قىزمەتى تاراتقان اقپاراتتا.
قاسكويلەردىڭ ءبىرى كۇزەتشىگە, ەكىنشىسى كاسسير كەلىنشەككە تاپ بەرگەن. كۇزەتشى وزىنە ۇمتىلعان قاراقشىنى تراۆماتيكالىق قارۋمەن بىرنەشە رەت اتىپ السىرەتىپ, كاسسيرگە كومەككە كەلگەن. ەكىنشى قاراقشى سىبايلاسىن الىپ, قاشىپ كەتكەن.
وسىلايشا كاسسير مەن كۇزەتشىنىڭ قايسارلىعى ارقاسىندا بەكەت تونالماي امان قالعان. قازىر قىلمىسكەرلەر ىزدەستىرىلىپ جاتىر.
وسىدان ەكى جىل بۇرىن ءدال وسى بەكەتكە شابۋىل جاساعان قاراقشىلار 4 ميلليون تەڭگە الىپ كەتىپ, ىزدەرىن سۋىتقان بولاتىن.
ءومىر ەسقالي,
«ەگەمەن قازاقستان».
سولتۇستىك قازاقستان وبلىسى
