ديپلوماتتار قازاقستاندىق توراعالىق باعدارلاماسىنىڭ ساپالى دايىندالعانىنا نازار اۋداردى. اتاپ ايتقاندا, رەسەيدىڭ تۇراقتى وكىلى ۆاسيلي نەبەنزيا «كەڭەس مۇشەلەرىنىڭ ىشىنەن قازاقستاندى ەڭ جاقسى تانيتىن» رەسەيلىك تاراپ, تاريحي فاكتور مەن ءداستۇرلى قازاقستاندىق-رەسەيلىك ءوزارا تىعىز قاتىناستاردى ەسكەرە وتىرىپ, «قازاقستاندىق دەلەگاتسيانىڭ كەڭەس توراعاسى رەتىندەگى جۇمىسىنىڭ ساتتىلىگىنە سەنىمدى» ەكەنىن ءبىلدىردى. رەسەيلىك ديپلومات 18 قاڭتاردا قازاقستان پرەزيدەنتى نۇرسۇلتان نازارباەۆتىڭ قاتىسۋىمەن وتەتىن بۇۇ قك-ءنىڭ «جاپپاي قىرىپ-جويۋ قارۋىن تاراتپاۋ: سەنىم شارالارى» تاقىرىبىنداعى جوعارى دەڭگەيلى بريفينگىنە رەسەي سىرتقى ىستەر ءمينيسترى سەرگەي لاۆروۆ قاتىساتىنىن حابارلادى. اقش تۇراقتى وكىلى نيكي حەيلي مەن كەڭەسكە مۇشە باسقا ەلدەردىڭ ەلشىلەرى سەنىم شارالارى ارقىلى تاراتپاۋدىڭ وزەكتى ماسەلەلەرىن جانە كەڭەس قىزمەتىنىڭ كۇن تارتىبىندە ورتالىق ازيا مەن اۋعانستان بويىنشا مينيسترلەر دەڭگەيىندەگى پىكىرتالاستى قامتيتىن قازاقستاننىڭ قاڭتارداعى باعدارلاماسىنىڭ مازمۇندىلىعى مەن قانىقتىرىلعاندىعىن اتاپ ءوتتى.
سول كۇنى قازاقستان باستاماسىمەن بۇۇ تاريحىندا تۇڭعىش رەت بۇۇ قاۋىپسىزدىك كەڭەسىنە جاڭادان سايلانعان تۇراقتى ەمەس التى مۇشەلەرى - كوت د’يۆۋاردىڭ, ەكۆاتوريالىق گۆينەيانىڭ, كۋۆەيتتىڭ, نيدەرلاندتىڭ, پەرۋ مەن پولشانىڭ تۋلارىن كوتەرۋ سالتاناتتى ءراسىمى ءوتتى. ءىس-شاراعا پەرۋدىڭ سىرتقى ىستەر ءمينيسترى ريكاردو لۋنا قاتىستى. بۇل ءراسىم بۇۇ مەن قك مۇشە-ەلدەرىنىڭ, الەمدىك باق, بۇۇ قۇرىلىمدارىنىڭ جانە مەملەكەتتىك ەمەس ۇيىمداردىڭ وكىلدەرىنىڭ اناعۇرلىم سانىن جينادى. كوپتەگەن دەلەگاتسيالاردىڭ پىكىرىنشە, وسى ءىس-شارا بۇۇ-نىڭ جاڭا ءداستۇرىنىڭ باسى رەتىندە قالىپتاسىپ, قازاقستاندىق توراعالىقتىڭ باستالۋىنىڭ جارقىن «ۆيزيت كارتاسى» رەتىندە قابىلداندى. بۇل قادامنىڭ جاڭاشىلدىعىمەن قاتار, بەيبىتشىلىك پەن قاۋىپسىزدىكتىڭ حالىقارالىق پروبلەمالارىن شەشۋ بويىنشا دۇنيەجۇزىلىك قاۋىمداستىق الدىنداعى كەڭەستىڭ جاڭا مۇشەلەرىنىڭ جوعارى جاۋاپكەرشىلىگىن ەرەكشەلەيتىن ونىڭ تەرەڭ ءسيمۆوليزمى اتالىپ ءوتتى. باستاما بۇۇ قاۋىپسىزدىك كەڭەسىندەگى قازاقستاندىق توراعالىق مۇراسىنىڭ ەلەمەنتى رەتىندە قاراستىرىلۋدا. ماسەلەن, ەكۆاتوريالىق گۆينەيا تۇراقتى وكىلىنىڭ مالىمدەۋىنشە, ونىڭ دەلەگاتسياسى وسى ءداستۇردى بەكىتىپ, كەلەسى جىلدىڭ قاڭتارىندا ءوزىنىڭ توراعالىعى بارىسىندا وسى ءراسىمدى قايتالايتىن بولادى.
كەڭەستىڭ قاڭتارداعى باعدارلاماسى رەسمي تۇردە قك مۇشەلەرىنىڭ وتىرىسىندا بەكىتىلدى, ودان كەيىن ول قازاقستاننىڭ تۇراقتى وكىلى قايرات وماروۆتىڭ جەكە بريفينگى شەڭبەرىندە بۇۇ مۇشە ەلدەرىنىڭ نازارىنا ۇسىنىلدى. كەزدەسۋگە قاتىسقان دەلەگاتسيالار قازاقستاندى قك توراعاسى لاۋازىمىنا ورنالاسۋىمەن قۇتتىقتاپ, الداعى جۇمىستا تابىس تىلەدى. بىرقاتار مەملەكەتتەر, ونىڭ ىشىندە ماروككو, چيلي, كولۋمبيا مەن تاجىكستان قازاقستاندىق تاراپ ءوز توراعالىعى شەڭبەرىندە وتكىزۋگە كوزدەگەن جاپپاي قىرىپ-جويۋ قارۋىن تاراتپاۋ جانە قاۋىپسىزدىك پەن دامۋدىڭ ءوزارا تاۋەلدىلىگىنىڭ ۇلگىسى رەتىندەگى اۋعانستان مەن ورتالىق ازياداعى وڭىرلىك ارىپتەستىكتى قۇرۋ ماسەلەلەرى بويىنشا ءىس-شارالاردىڭ وزەكتىلىگىن اتاپ ءوتتى. ق. وماروۆ مۇشە ەلدەردىڭ قازاقستان توراعالىعىنىڭ جۇمىس باعدارلاماسى بويىنشا كوپتەگەن سۇراقتارىنا جاۋاپ بەردى.
توراعالىق ەتۋشى ەلدىڭ تۇراقتى وكىلى ق. وماروۆ ءداستۇرلى ءباسپاسوز كونفەرەنتسياسى بارىسىندا بۇۇ جانىندا اككرەديتتەلگەن تىلشىلەردى قازاقستاندىق توراعالىقتىڭ باسىمدىقتارىمەن جانە دە كەڭەستىڭ قاڭتار ايىنداعى جۇمىس باعدارلاماسىمەن تانىستىردى. مەملەكەت باسشىسى ن. نازارباەۆتىڭ قاتىسۋىمەن وتكىزىلەتىن سەنىم شارالارى ارقىلى تاراتپاۋ سالاسىنداعى جوعارى دەڭگەيدەگى ءىس-شارالار, سولاردىڭ ىشىندە سولتۇستىك كورەياداعى, يرانداعى, پالەستيناداعى احۋال بويىنشا جانە دە يەرۋساليم مارتەبەسى, ميانماداعى جاعداي الەمدىك بۇقارالىق اقپارات قۇرالدارى وكىلدەرىنىڭ قىزىعۋشىلىعىن تۋدىردى. سيرياعا, يەمەندەگى گۋمانيتارلىق احۋالعا, كليماتتىڭ وزگەرۋىنە, قازاقستاننىڭ «جاسىل تەحنولوگيالار» سالاسىنداعى باستامالارى مەن جاسامپازدىعىنا قاتىستى سۇراقتار قويىلدى. الەمنىڭ Al-Arabiya, The Huffington Post, The Associated Press, Agence France Presse, CBS, FOX News, Nikkei, Mainichi, Fiji TV, Tokyo Shimbun, NHK جانە باسقالارى ءتارىزدى جەتەكشى باق-تارىنىڭ تىلشىلەرىنە جاھاندىق كۇن تارتىبىندەگى باستى ماسەلەلەر بويىنشا ەلباسىنىڭ باستامالارى اياسىنداعى قازاقستاننىڭ ۇستانىمى بويىنشا ناقتى جاۋاپتار بەرىلدى.
جالپى قازاقستاننىڭ بۇۇ قاۋىپسىزدىك كەڭەسىندەگى توراعالىعىنىڭ ءبىرىنشى جۇمىس كۇنى جەمىستى ءوتىپ, ەلىمىزدىڭ جانە پرەزيدەنتى ن.نازارباەۆتىڭ حالىقارالىق جوعارعى بەدەلىن جانە قۇرمەتىن تاعىدا ايعاق ەتتى.
