قازاق ۇعىمىندا يت جەتى قازىنانىڭ ءبىرى سانالادى. ەسىگىمىزدەن ەنگەن 2018 جىل سونىسىمەن قازاق ءۇشىن قاسيەتتى دە قىمبات قوي دەپ ويلايمىن. عاسىرلار بويى عارىشتى يگەرۋگە ىنتىققان ادامزات وكىلى العاش رەت الىس تا اۋىر ساپارعا ءتىرى جان-جانۋار ىشىنەن ءيتتى ۇشىرۋى, مۇمكىن, بەلگىلى ءبىر دارەجەدە ويلاستىرىلماعان سايكەستىك تە شىعار. بىراق – اقيقات. ادامازات بالاسى سول ءبىر عىلىمي تاجىريبەدەن سوڭ عارىشقا ءوزى اتتاندى. قازاق اڭشىسىنىڭ الدىندا ءيتى نەمەسە تازىسى جۇرەتىنىن كوز الدارىڭىزعا ەلەستەتىڭىزدەرشى!..
قازاقستان تاۋەلسىزدىك جىلدارى ىشىندە جاڭاعا دەگەن زور قۇلشىنىسى مەن تالپىنىسى ارقاسىندا عارىش سالاسىن يگەرۋدە الەمدە ويىپ تۇرىپ ءوز ورنىن الدى. الەمدىك سالماعى بار بايقوڭىر عارىش كەشەنىن كورشى رەسەي مەملەكەتىمەن بىرلەسە يگەرىپ كەلەمىز. وسى ارادا ەسكەرەتىن ءبىر جايت – عارىشتا, ەكونوميكادا, حالىقارالىق قاتىناستا بۇگىنگى تاڭدا تسيفرلى تەحنوگيا ەڭ ءبىرىنشى ورىندا تۇر. قازىر وسىنداي الەمدىك ەڭ ۇزدىك تەحنولوگيادان قول ءۇزىپ قالساق, ودان كەيىن ءبىز ونى ءومىر باقي قۋىپ جەتە المايمىز. مەملەكەتتىك «بولاشاق» باعدارلاماسىمەن شەتەلدەن وقىپ كەلىپ جاتقان جاستارىمىز بار. «قازاقستاندى جاڭا تەحنولوگيا مەن تەحنيكالىق ءىلىم جاعىنان كوتەرەمىز» دەيدى ولار ءبىراۋىزدان, سونى ءوز قۇلاعىممەن ەستىگەندە قاتتى قۋانىپ قالامىن. ەلىمىزگە سەرپىن بەرگەن مۇنداي عاسىرلىق جاڭا تەحنولوگيالىق قوزعالىستى مەن ءوز باسىم ەكى قولىمدى كوتەرىپ قولدايمىن. قازاق جاستارىنىڭ «بايقوڭىر» عارىش كەشەنىن ەمىن-ەركىن يگەرىپ الاتىنىنا مەنىڭ سەنىمىم مول. ونىڭ العاشقى قادامدارىن كورىپ تە ءجۇرمىن.
الەمدى اۋزىنا قاراتقان كەڭەس وداعى مەن امەريكا قۇراما شتاتتارى سياقتى الىپ مەملەكەتتەر كەزىندە عارىش كەڭىستىگىن يگەرۋ ءۇشىن وراسان زور قارجى, ءتىپتى اسىرەلەپ ايتساق, سوڭعى تيىنىنا دەيىن جۇمسادى. ەۋروپاداعى عارىش قاۋىمداستىعىنىڭ دا بەلگىلى مولشەردە قاراجات پايدالاناتىنى اقيقات. كورشىمىز قىتايدىڭ عارىش سالاسىنا دەگەن ۇمتىلىسى مەن تالپىنىسى عارىشتىق جىلدامدىققا تەڭەسىپ قالدى. قازاقستاندا قىمباتقا ساتىپ العان عارىشتىق تەحنولوگيالىق قۇرىلىمدار پايدا بولا باستاعان كەزدە «ەرتەڭ رەسەي بايقوڭىردان بار تەحنيكاسىن الىپ كەتسە, عارىش كەشەنىنىڭ بولاشاعى قانداي كۇي كەشپەك؟ ءبىز بۇگىن اۋىلدى كوتەرە الماي وتىرمىز, عارىشتى قالاي كوتەرەمىز؟» دەگەن اڭگىمەلەردى دە ەستىگەنبىز. قازىر زامان وزگەردى. ەڭ قۋانىشتىسى, جاڭا تەحنولوگيانىڭ ەلىمىزدىڭ بولاشاعى ءۇشىن ماڭىزى زور ەكەنىن قازاق حالقى, قازاقستاندا تۇراتىن بارشا ۇلت وكىلدەرى ءتۇسىندى.
كۇنى كەشە عانا ماسكەۋدە وتكەن تمد مەملەكەتتەرى باسشىلارىنىڭ بەيرەسمي سامميتىندە رەسەي فەدەراتسياسىنىڭ پرەزيدەنتى ۆلاديمير ءپۋتيننىڭ ەلباسىمىز – قازاقستاننىڭ تۇڭعىش پرەزيدەنتى نۇرسۇلتان نازارباەۆتى قازاقستاندا وتەتىن تسيفرلى تەحنولوگيانى دامىتۋ جونىندەگى جوعارى ساراپشى مامانداردىڭ باسىن قوسۋ تۋرالى باستاماسىمەن تەكتەن-تەك قۇتتىقتاماسا كەرەك. دەمەك, ول جۇزدەسۋدىڭ الەمدىك ماڭىزى زور. مىنە, قازاقستاننىڭ بۇگىنگى بولمىسى وسىنداي!
مەنىڭ جىل باسىنداعى اق تىلەگىم – قازاقستانىمىز جاڭا تەحنولوگيا سالاسىندا تەك قانا ۇزدىكتەر قاتارىنان كورىنسىن!
