كۇن كوزىنە تىكتەپ قاراي المايتىنىمىز سياقتى, ۋاقىتتىڭ دا بەتىنە تۋرا قاراي الماعان بويى تومەنشىك نازارمەن عۇمىر كەشىپ كەلەمىز. بۇل تومەنشىك نازارىمىز – ۇلى ۋاقىتتىڭ ماڭگىلىك ەكەنىن مويىنداۋ. تىرشىلىك قۇشاعىندا نەشە اۋناپ كۇن, نەشە اينالىپ اي وتسە دە, ادامزات بالاسى سونىڭ ءبارىن جيناقتاپ, جىل دەپ قورىتىندىلايدى. جاڭا جىلدىڭ تابالدىرىعىن اتتار قاس قاعىم ساتتە وتكەنىڭدى ءبىر تۇگەندەپ شىعاسىڭ. تۇگەندەيسىڭ دە, جاڭا نيەت, جاڭا پەيىلمەن ەسكى جىلمەن قوشتاسىپ, جاڭا جىلدى قارسى الاسىڭ.
وتكەن جىل ەلىمىز ءۇشىن بەرەكەلى جىل بولدى. ەڭ الدىمەن الەم الدىندا ابىرويمەن ەكسپو-2017 حالىقارالىق كورمەسىن وتكىزدىك. قانشا جىلى ءسوز ەستىپ, شاراپاتتى ءىلتيپات كوردىك. ءار وبلىسىمىزدىڭ استانا تورىندەگى كۇندەرى سالتاناتپەن ءوتىپ جاتتى. كوز كوردى, كوڭىل قۋاندى. ورتالىق ازياداعى بەيبىتشىلىك ءۇشىن ەلباسى نۇرسۇلتان نازارباەۆتىڭ بىتىمگەرلىك, بەيبىتسۇيگىش قاسيەتى دانەكەر بولىپ, استانا پروتسەسى دە حالقىمىزدىڭ ايبىنى بولدى. قانشا ەلدىڭ باسشىسى ەلباسىنىڭ وسى قاسيەتىن ايتىپ, قۇرمەتتەپ جاتتى. ەر مەرەيى – ەل مەرەيى دەگەن وسى.
قازاق حالقىنىڭ كىشكەنتاي جەڭىسىنە قۋانىپ, العان ءار اسۋىنا «قۇدايعا تاۋبە» ايتىپ وتىرامىن! ءوز ەلىڭنىڭ الەم مەملەكەتتەرى اراسىندا تەرەزەسى تەڭ قالپى مامىلە جاساعانىن كورگەندە مارقاياسىڭ. بيىلعى جىل دا ەلىمىز ءۇشىن ىرىستى, بەرەكەلى جىل بولعاي!
