28 جەلتوقسان كۇنى سىرداريا وزەنىندە سەڭ قوزعالىپ, سۋ دەڭگەيى كوتەرىلدى. وزەننىڭ ەسكى ارناسى تولىپ, پمك-29 ساياجايىنىڭ ىشكى كانالىنا كوپ مولشەردەگى سۋدىڭ تۇسۋىنەن 9 تۇرعىن جايدىڭ اۋلاسىنا سۋ جايىلعان.
«ساياجاي ماسسيۆىندە بارلىعى 76 ءۇي بار, ونىڭ ىشىندە 37-ءسى جىل بويى پايدالانىلاتىن ءۇي. قازىرگى كەزدە سۋ تاسقىنىنىڭ الدىن الۋ شارالارى اياسىندا تۇرعىندارى قاۋىپسىز ايماققا كوشىرىلدى. سونداي-اق, ۇزىندىعى 100 م جۋىق ارنانىڭ قورعاۋ دامبالارىن بەكىتۋ ءۇشىن 8 تەحنيكا مەن 15 ادام جۇمىلدىرىلىپ, 22 جاۋاپتى ۇيىمنىڭ تاۋلىك بويى كەزەكشىلىگى بەكىتىلدى», - دەپ مالىمدەدى سەرىك سەرماعامبەتوۆ.
اتاپ وتەيىك, پمك-29 ساياجايى وزەن ارناسىنداعى سۋ دەڭگەيى جوعارىلاعان كەزدە وڭاي سۋ جايىلاتىن ايماق بولعاندىقتان تۇرعىندارعا الدىن الا ەسكەرتپە حاتتار تاراتىلعان. دەگەنمەن, 28 جەلتوقسان كۇنى 22.50-دە قىزىلوردا قالاسى ماڭىنداعى پرۋدحوز ەلدى مەكەنىندەگى كەنتاي جايىلىمىنىڭ سۋ باسقان اۋماعىندا 2 ادام ماساڭ كۇيدە قاراڭعىدا اداسىپ, مۇز استىنا تۇسكەن. بىرەۋى قايتىس بولدى, ەكىنشىسى قۇتقارىلدى.
جالپى وبلىس ايماعىنداعى جاعالاۋ بويىندا قورعاۋ دامبالارىنىڭ 96 قاۋىپتى ۋچاسكەسىن بەلگىلەپ, جوندەۋ جانە قالپىنا كەلتىرۋ جۇمىستارى جۇرگىزىلدى. ودان بولەك, سىرداريا جاعالاۋى 56 سۋ باسۋ قاۋپى بار ايماققا ءبولىنىپ, قۇرامىندا 459 ارنايى تەحنيكا جانە 1957 ادام بار 172 جاۋاپتى مەكەمە بەكىتىلدى.سۋ تاسقىنى كەزەڭىندە تۇرعىنداردى ەۆاكۋاتسيالاۋ ءۇشىن 83 جيناقتالعان ەۆاكۋاتسيالىق جانە 104 قابىلداۋ بەكەتى دايىندالدى. سونداي-اق, وبلىس بويىنشا 148 توننا جانار-جاعارماي, 284200 دانا قاپ, 10400 قامىس, 3800 پاشىن, 3600 دانا قارابۋرا جانە وزگە دە قاجەتتى ماتەريالدار مەن قۇرالدار ازىرلەندى.
باسقارما مالىمەتىنشە, بۇگىنگى جاعداي بويىنشا قىزىلوردا وبلىسىندا وزەننەن تۇسكەن سۋ كولەمى 640 م3/سەك. قۇرايدى. قىزىلوردا سۋ تورابىنا تۇسكەن سۋ كولەمى 530 م3/سەك. سولتۇستىك اۋدانداردا اۋا تەمپەراتۋراسىنىڭ تومەندەۋىنە بايلانىستى سىرداريا وزەنىندە مۇز قاتتى, ال وڭتۋستىك اۋدانداردا مۇز بولمادى.
«قازىرگى تاڭدا ايماقتا جاعداي قالىپتى جانە تۇراقتى باقىلاۋ جۇرگىزىلىپ جاتىر», - دەدى س.سەرماعامبەتوۆ.
