اگرارلىق سەكتورداعى كووپەراتسيانى ءتيىمدى ىنتالاندىرۋ تەتىكتەرىنىڭ ءبىرى – جەڭىلدىكپەن نەسيەلەۋ. وسى ماقساتتا قور ارنايى نەسيە باعدارلامالارىن ازىرلەدى جانە ىسكە ەنگىزدى.
– قور قىزمەتىندەگى نەگىزگى باسىمدىق – ەلباسىنىڭ ۇساق تاۋارلى شارۋاشىلىقتاردى بىرىكتىرىپ, اۋىلشارۋاشىلىق كووپەراتسياسىن دامىتۋ جونىندەگى تاپسىرماسىن ورىنداۋ, – دەيدى «اۋىل شارۋاشىلىعىن قارجىلاي قولداۋ قورى» اق باسقارما توراعاسى جاندار وماروۆ.–ناتيجەلى جۇمىسپەن قامتۋ جانە جاپپاي كاسىپكەرلىكتى دامىتۋ باعدارلاماسى مەن اگروونەركاسىپتىك كەشەندى دامىتۋ باعدارلاماسى بويىنشا, سونىمەن قاتار قور ءوز قاراجاتى ەسەبىنەن جالپى سوماسى 45,7 ميلليارد تەڭگەگە 12,6 مىڭ نەسيە بەردى. قارجىلانعان جوبالار بويىنشا 13 مىڭنان اسا ادام جۇمىسپەن قامتىلدى.
«قازاگرو» حولدينگىنىڭ ەنشىلەس ۇيىمى بولىپ تابىلاتىن قور بۇگىندە كوپتەگەن كورسەتكىشتەر بويىنشا جەدەل ءوسۋدى كورسەتىپ وتىر. اۋىلدى شاعىن نەسيەلەۋدىڭ ەڭ ءىرى وپەراتورى, ياعني اۋىل شارۋاشىلىعىن قارجىلاي قولداۋ قورى سوڭعى بەس جىل ىشىندە جىل سايىنعى قارجىلاي كومەك كولەمىن ءتورت ەسە ۇلعايتتى.
قازىرگى تاڭدا قوردىڭ قاتىسۋىمەن قۇرىلعان كووپەراتيۆتەر اۋىلشارۋاشىلىق ءونىمىن جيناۋعا جانە دايىنداۋعا كىرىستى. ولاردىڭ بىرقاتارى ءونىمدى ءارى قاراي قايتا وڭدەۋگە, تاۋارلى ءسۇت تاعامدارىن, شۇجىقتاردى, جارتىلاي فابريكاتتاردى شىعارۋعا دا كىرىسىپ كەتتى.
قور قارجىلاندىرعان كووپەراتيۆتەردىڭ ءبىرى – قاراعاندى وبلىسىنىڭ شەت اۋدانىنداعى «العا» كووپەراتيۆى. العاشىندا قۇرامىندا 20 قاتىسۋشىسى بولعان بىرلەستىكتىڭ بۇگىندە 40-تان استام قاتىسۋشىسى بار.
كووپەراتيۆكە كىرگەن شارۋاشىلىقتار قانداي تابىسقا قول جەتكىزدى دەگەن ساۋال تۋىندايدى. بىرىنشىدەن, جەڭىلدەتىلگەن نەسيەلەۋگە قول جەتكىزدى. شاعىن نەسيە رەتىندە بەرىلگەن 82,3 ملن تەڭگە 630 ءىرى قارا مال باسىن ساتىپ الۋعا جۇمسالدى. ەكىنشىدەن, كووپەراتيۆ اۋىلدا مال سوياتىن بەكەتتى ورناتتى. مودۋلدىك جابدىقتىڭ جارتى سوماسى مەملەكەتتىك سۋبسيديا ەسەبىنەن تولەنىپ, قالعان جارتىسىن كووپەراتيۆ 7 جىل ىشىندە قايتارادى. ۇشىنشىدەن, وندىرۋشىلەر ءونىمدى تاۋارلىق زاتتارمەن ساپالى تۇردە الاتىن بولدى.
سولتۇستىك قازاقستان وبلىسىنا قاراستى قىزىلجار اۋدانىنىڭ «كراسنىي يار» كووپەراتيۆى ءوز اۋىلىندا قۇس فەرماسىن اشتى. جەڭىلدىكپەن نەسيەلەۋ اسىل تۇقىمدى قازداردى جانە ونەركاسىپتىك ينكۋباتوردى ساتىپ الۋعا مۇمكىندىك بەردى. ەندىگى جەردە مال سوياتىن جانە مامىقتى قايتا وڭدەۋ تسەحىن اشۋدى جوسپارلاپ وتىر.
جالپى, قوردىڭ قولداۋىمەن 160 ءسۇت قابىلداۋ بەكەتى, 70 مال سويۋ بەكەتى قارجىلاندىرىلىپ, بورداقىلاۋ ءۇشىن 100 مىڭ ءىرى قارا مال جانە 28 مىڭنان اسا ءسۇتتى ءىرى قارا مال ساتىپ الىندى, 51 ءسۇت تاسىمالداۋ كولىگى مەن 42 رەفريجەراتور ساتىپ الىندى. قۇرىلعان كووپەراتيۆتەر تولىق جۇمىس ىستەگەندە جىل سايىن 67,5 مىڭ توننا ءسۇت, 24 مىڭ توننا ەت, 10 مىڭ توننا الما, 15 مىڭ توننا باسقا اۋىلشارۋاشىلىق ءونىمىن دايىندايتىن بولادى.
2018 جىلى دا اۋىلشارۋاشىلىق جوبالارىن قارجىلاندىرۋ جالعاستىرىلادى. بۇل ورايدا اۋىل شارۋاشىلىعىن قارجىلاي قولداۋ قورى جالپى سوماسى 45 ملرد تەڭگەدەن استام نەسيەلەۋدى جوسپارلاپ وتىر.
جىلقىباي جاعىپار ۇلى,
«ەگەمەن قازاقستان»
