جيىن بارىسىندا ەلباسى الماتىدا وتكەن 2017 جىلعى دۇنيەجۇزىلىك قىسقى ۋنيۆەرسيادا مەن «ەكسپو-2017» كورمەسى كەزىندە اۋقىمدى شارالارعا جۇمسالعان شىعىندار تۋرالى جانە سالعان ينۆەستيتسيانىڭ قانشالىقتى اقتالعاندىعى تۋرالى قويىلعان ءجۋرناليستىڭ ساۋالىنا جاۋاپ بەردى.
مەملەكەت باسشىسى ءاردايىم جاڭا باستامانىڭ وڭايشىلىقپەن ىسكە اسپايتىنىن, الايدا ءىرى سپورتتىق شارا دايىنداۋداعى ينفراقۇرىلىمدىق بازا قىزمەتىنىڭ بۇگىندە ەل قاجەتىنە جاراپ وتىرعانىن اتاپ ءوتتى.
«مۇنداي سىني سۇراقتارعا جاۋاپ ىزدەيتىن بولساڭ, ماقساتتى ىسىرىپ قويىپ جاۋاپ بەرۋمەن وتەسىڭ. استانانى كوشىرەمىز دەگەندە دە وسىلاي بولعان. ال قازىر ميلليون تۇرعىنى بار قالادا ءومىر ءسۇرىپ وتىرسىزدار. وسى سياقتى جاڭا باستامانى ەنگىزۋ وڭايشىلىقپەن ىسكە اسا قويمايدى. ۋاقىت وتەدى, كورەدى, سەزەدى, سودان سوڭ مويىندايدى. ارينە, شىعىنداندىق. 2 ميلليون تۇرعىنى بار الماتى ءۇشىن ۋنيۆەرسيادانى بۇرىننان سالعىم كەلگەن. الىپ مۇز ايدىنى مەن سپورت كەشەندەرى كەرەك-اق. ۋنيۆەرسيادا كەزىندە 1700-دەن استام پاتەر سالىندى, قازىر سونىڭ بارلىعى الماتىلىق مۇقتاج وتباسىلارعا بەرىلدى. سپورت كەشەندەرى ىسكە قوسىلعاننان كەيىن قالاداعى قىسقى سپورت تۇرىنە قىزىعۋشىلىق 60 پايىزعا ارتقان», دەگەن پرەزيدەنت سپورتتى ءبىلىم بەرۋ جۇيەسىنىڭ ماڭىزدى ەلەمەنتتەرىنىڭ ءبىرى رەتىندە جاستار اراسىندا ۇلكەن قىزىعۋشىلىققا يە بولعانىن اتادى.
ەسكە سالا كەتسەك, ۋنيۆەرسيادانى الماتىدا وتكىزۋ تۋرالى رەسمي شەشىم 2011 جىلعى 29 قاراشادا بريۋسسەلدە حالىقارالىق ۋنيۆەرسيتەتتىك سپورت فەدەراتسياسىندا (FISU) وتكەن داۋىس بەرۋ ناتيجەسىندە قابىلداندى. وسىلايشا, الماتى بۇرىنعى كەڭەستىك كەڭىستىك ەلدەرىنىڭ ىشىندە ءبىرىنشى بولىپ, 2017 جىلى وتەتىن XXVIII قىسقى ۋنيۆەرسيادانىڭ استاناسىنا اينالدى.
