اتالمىش شارا ۇلتتىق مۋزەيدىڭ ءتول جوباسى رەتىندە 2015 جىلدان بەرى ءداستۇرلى تۇردە ۇيىمداستىرىلىپ كەلەدى. بۇگىنگە دەيىن «ۇلتتىق مۋزەيگە سىي تارتۋ» اكتسياسى الماتى, قىزىلوردا, شىمكەنت, اقتوبە, ورال, پەتروپاۆل قالالارىندا وتكىزىلگەن.
ۇلتتىق مۋزەي ديرەكتورىنىڭ ورىنباسارى اباي ءساتىبالديننىڭ ايتۋىنشا, بۇگىنگە دەيىن مۋزەي قورىنا 3000-نان اسا قۇندى جادىگەر قابىلدانىپتى. ولاردىڭ قاتارىندا 2016 جىلى ريو-دە-جانەيرودا وتكەن وليمپيا ويىندارىنىڭ چەمپيونى, بوكسشى دانيار ەلەۋسىنوۆتىڭ دە بوكس قولعابى بار. «قولعابىمدى جادىگەرلەر قاتارىنا قوسقانى مەن ءۇشىن ۇلكەن مارتەبە. بۇل شارانىڭ جاستار ءۇشىن ماڭىزى زور. جادىگەرلەردى كورۋ ارقىلى اتا-بابالارىمىزدى تاني تۇسەدى. بولاشاقتا زاتتارى وسى مۋزەيدەن جادىگەر رەتىندە ورىن الاتىنداي تۇلعالار كوبەيە بەرسىن», دەيدى وليمپيادا چەمپيونى.
ءۇشىنشى رەت ۇيىمداستىرىلعان «ۇلتتىق مۋزەيگە سىي تارتۋ» اكتسياسىنىڭ قورىتىندى جيىنىندا كورمەگە تەك بيىلعى جىلى ورال, پەتروپاۆل قالالارىندا وتكەن شارادا ۇلتتىق مۋزەي قورىنا قابىلدانعان جادىگەرلەرمەن قاتار, ححVIII قىسقى ۋنيۆەرسيادا جانە ەكسپو-2017 حالىقارالىق كورمەسىنەن مۋزەي قورىنا قابىلدانعان ەكسپوناتتار دا قويىلدى.
ءالي بيتورە,
«ەگەمەن قازاقستان»
