سوندىقتان بولار اباي اتىنداعى وپەرا جانە بالەت تەاترىندا وتكەن كونتسەرتكە قاراشاڭىراقتان تۇلەپ ۇشقان ونەر مايتالماندارى مەن ۇستازدار تۇگەل جينالدى. مەرەيتويىن اتاپ ءوتىپ وتىرعان بۇل وقۋ ورنىندا ەۆگەني برۋسيلوۆسكي مەن لاتيف حاميديلەر ساباق بەرسە, شابال بەيسەكوۆا, ەرمەك سەركەباەۆ, سىدىق مۇحامەتجانوۆ, باقىتجان بايقاداموۆ, الىبەك دىنىشەۆ, عازيزا جۇبانوۆا, قۇددىس قوجامياروۆ, نۇرعيسا تىلەنديەۆ, كەڭەس دۇيسەكەەۆ, ناعيما ەسقاليەۆا سەكىلدى ەسىمى ەلگە تانىمال ونەر تارلاندارى ءتالىم الىپ شىققان. بۇگىندە كوللەدج اتالىپ وتىرعان ەلىمىزدىڭ ەڭ بايىرعى مۋزىكالىق وقۋ ورداسىنان سەگىز كسرو حالىق ءارتىسىنىڭ, 60-تان ارتىق قازاقستاننىڭ حالىق ءارتىسى مەن ەڭبەك سىڭىرگەن قايراتكەرلەردىڭ قاناتتانىپ ۇشقانىن ءاربىر شاكىرت ماقتانىشپەن ايتادى. 85 جىل ىشىندە وقۋ ورنىن 9000-نان استام تۇلەك بىتىرگەن.
عاسىرعا قاراي قادام جاساپ كەلە جاتقان كوللەدج بۇل مەرەكەسىنە ۇلكەن دايىندىقپەن كەلدى. دۇنيەجۇزىلىك كلاسسيكالىق مۋزىكانىڭ اسا ءىرى وكىلى سانالاتىن پ.چايكوۆسكي اتىنداعى وقۋ ورنىنىڭ شىعارماشىلىق ۇجىمىنىڭ ماسكەۋ قالاسىندا جەكە كونتسەرت بەرىپ قايتۋى – وقۋ ورنى ءۇشىن جىلدىڭ ەڭ ماڭىزدى وقيعاسى بولدى. كوللەدجدىڭ اۋلاسىنا ەسىمىن يەلەنىپ وتىرعان ۇلى كومپوزيتوردىڭ ەسكەرتكىشى ورناتىلدى. سونداي-اق پ.چايكوۆسكي اتىنداعى كوللەدج كوپتەگەن مۋزىكالىق بايقاۋلار مەن بايگەلەردىڭ ۇيىمداستىرۋشىسى رەتىندە دە بەلگىلى. تەك بيىلعى جىلى عانا قازاق ونەرىنىڭ كورنەكتى وكىلدەرى كاۋكەن كەنجەتاەۆ پەن شابال بەيسەكوۆا اتىنداعى حالىقارالىق كونكۋرس, «كوشپەندىلەر اۋەنى» اتتى جاس ورىنداۋشىلاردىڭ رەسپۋبليكالىق بايقاۋى, «جاس تالانت», «Almaty International Piano Festival» سەكىلدى مۋزىكالىق ورتا ءۇشىن ماڭىزى جوعارى بەس بىردەي بايگە وتكىزىلدى.
كوللەدج ديرەكتورى, قازاقستاننىڭ ەڭبەك سىڭىرگەن قايراتكەرى ءبىرجان حاسانعاليەۆ: «85 جىلدىق تاريحى بار قازاقستانداعى تۇڭعىش مۋزىكالىق وقۋ ورنىنىڭ ۇلتتىق ونەرگە قوسىپ كەلە جاتقان ۇلەسى زور. بيىك بەلەستەردى باعىندىرىپ, قازاق ونەرىنىڭ ماقتانىشىنا اينالعان قادىرلى تۇلعالارىمىزدىڭ كوپشىلىگى وسى شاڭىراققا قارىزدار دەپ ويلايمىن. ولاردىڭ جولىن قۋىپ, ءىزىن باسىپ, وكشەلەپ كەلە جاتقان جاس ونەرپازدارىمىز ەرتەڭگى كۇنى اعا-اپالارى شىققان بيىكتەن كورىنەتىنى ءسوزسىز», دەيدى.
تاۋەلسىزدىك مەرەكەسى قارساڭىندا تۋعان كۇنىن اتاپ ءوتىپ وتىرعان كوللەدجدىڭ بىرقاتار بىلىكتى ۇستازدارىنا مادەنيەت جانە سپورت مينيسترلىگىنىڭ ماراپاتى مەن الماتى قالاسى اكىمىنىڭ العىس حاتتارى تابىستالدى. مۋزىكا مەرەكەسى ىسپەتتى ۇيىمداستىرىلعان مەرەيتويلىق كونتسەرتتە كوللەدجدە ءبىلىم الىپ جاتقان دارىندى شاكىرتتەر مەن ولاردى باۋلىپ وتىرعان وقىتۋشىلار, سونداي-اق سيمفونيالىق جانە ۇلتتىق وركەستر ۇجىمى ونەر كورسەتتى.
ايگۇل احانبايقىزى,
«ەگەمەن قازاقستان»
الماتى
