اتاپ ايتقاندا, 2017 جىلدىڭ 9 ايىندا وتكەن جىلدىڭ سايكەس مەرزىمىمەن سالىستىرعاندا پەدوفيلدىك باعىتتاعى تۇرلەرى ارتىپ وتىر, سونىڭ ىشىندە كامەلەتكە تولماعانداردى زورلاۋ 33 پايىزعا جانە باسقا دا جىنىستىق سيپاتتاعى قىلمىستار ۇلەسى 31 پايىزعا ارتقان. ال سانىنا كەلەتىن بولساق بيىلعى ەسەپ ءالى تولىق ەمەس, ال 2016 جىلى وسى قىلمىستاردان 180 بالا مەن ءجاسوسپىرىم زارداپ شەككەن. بۇل – الاڭداتارلىق جاعداي.
مۇنداي تاعىلىق قىلمىستار ءۇشىن اتۋ جازاسىن بەرسە دە ارتىق بولماس ەدى. بىراق بىزدە ونى قولدانۋعا موراتوري جاريالانعان. الايدا 2018 جىلدىڭ 1 قاڭتارىنان باستاپ كۇشىنە ەنەتىن «حالىقتىڭ دەنساۋلىعى جانە دەنساۋلىق ساقتاۋ تۋرالى» كودەكسكە ەنگىزىلگەن وزگەرتۋلەر مەن تولىقتىرۋلارعا سايكەس, پەدوفيلدەرگە حيميالىق جولمەن كاستراتسيا جاساۋعا رۇقسات بەرىلەدى.
وسى كودەكستىڭ 103-1-بابىنىڭ 2-تارماعىنا سايكەس دەنساۋلىق ساقتاۋ ءمينيسترى 2017 جىلدىڭ 15 ماۋسىمىندا حيميالىق جولمەن كاستراتسيا جاساۋ ادىستەرىنىڭ ءتارتىبىن بەكىتتى.
تارتىپكە سايكەس, حيميالىق جولمەن كاستراتسيا جاساۋ پەدوفيلدەردىڭ قىلمىستىق جازاسىن وتەۋ ورىندارىنداعى مەديتسينالىق ورىندارىندا جاسالادى. سونىمەن بىرگە قىلمىسكەرگە امبۋلاتوريالىق جانە پسيحولوگيالىق كومەك تە كورسەتىلەدى.
وسىعان وراي قازاقستان رەسپۋبليكاسىنداعى بالا قۇقىقتارىن قورعاۋ جونىندەگى ۋاكىل رەتىندە مەندە بىرنەشە سۇراق تۋىندايدى. وسى نورمانى ورىندايتىن دەنساۋلىق ساقتاۋ جۇيەسى ورگاندارى مەن قىلمىستىق اتقارۋ جۇيەلەرىنىڭ دايىندىق دەڭگەيى تالاپقا ساي ما؟ ەگەر قىلمىسكەرگە كاستراتسيا جاساۋ جۇمىسى باس ەركىنەن ايرىلعان ورىنداردا ىسكە اسىرىلادى دەسەك, بۇرىن وسىنداي قىلمىستار جاساپ, تۇرمەگە وتىرىپ شىققاندارعا قارسى بۇل جازا قالاي قولدانىلماق؟ ويتكەنى, وندايلار بوستاندىقتا ءجۇرىپ تاعى دا وسىنداي قىلمىس جاساۋى مۇمكىن عوي. ولاي بولسا, بالالارىمىزدى مۇنداي ازعىنداردان قالاي قورعايمىز؟ قانداي مەملەكەتتىك ورگاندار بۇل ىسكە اتسالىسىپ, بالالاردى قورعاۋعا جاردەم بەرە الادى؟
مىنە, وسى سۇراقتاردى مەن پرەمەر-مينيستر باقىتجان ساعىنتاەۆتىڭ اتىنا دەپۋتاتتىق ساۋال شەڭبەرىندە قويىپ, جاۋاپ بەرۋىن ءوتىندىم. وعان كەيبىر ارىپتەستەرىم دە قولداپ, قولدارىن قويدى.
زاعيپا باليەۆا,
ءماجىلىس دەپۋتاتى,
بالالاردىڭ قۇقىن قورعاۋ جونىندەگى ۋاكىل
