ماتچتىڭ باستاپقى 45 مينۋتىندا زينەدين زيدان شاكىرتتەرى باسىمدىعىن كورسەتىپ, ادۋىندى شابۋىلدارعا ءجيى شىعىپ ەدى, بىراق تەر شتەگەن قاقپاسىنان ساڭىلاۋ تابا المادى. ال اندرەس ينەستا باستاعان توپ سىرت الاڭدا ويناعاننان بولار, جاتىرقاپ, ءتيىستى دەڭگەيدە ونەر كورسەتە المادى.
كەزدەسۋدىڭ 2-مينۋتىندا بۇرىشتامادان اۋەلەي كەلگەن دوپقا كريشتيانۋ رونالدۋ ءبىرىنشى جەتىپ, ەسەپ اشقان. الايدا, قاپتال تورەشىسى پورتۋگاليالىقتىڭ ويىننان تىس قالعانىن بىردەن بايقادى. ءوز كەزەگىندە «بارسەلونا» سىلبىر ويناعانمەن, ءبىردى-ەكىلى شابۋىلدارعا شىعىپ ءجۇردى. ءبىرىنشى تايمنىڭ سوڭىنا تامان پاۋلينونىڭ ەسەپ اشاتىن ءساتى بولعان, بىراق كەيلور ناۆاس ءوز ورنىنان تابىلا ءبىلدى.
ويىننىڭ ەكىنشى بولىگى مۇلدەم باسقا باعىتتا ءوربىدى. ءۇزىلىس كەزىندە كاتالوندىقتاردىڭ باس باپكەردەن جاڭا نۇسقاۋلار العانى كورىنىپ تۇردى. سەبەبى, كوك-انارلار دوپقا كوبىرەك يەلىك ەتىپ, الاڭنىڭ ورتالىق تۇسىنا «سالتانات» قۇردى. العاشقى تايمداعىداي ساسقالاقتاپ, ورىنسىز جەردەن دوپ جوعالتپايتىن بولدى. ال الاڭ يەلەرى كەرىسىنشە ماتچ باسىنداعى «بارسەلونانىڭ» كۇيىن قۇشتى. بەينە ءبىر بۇكىل كۇشىن سول كەزدە سارپ ەتكەندەي كۇيدە قالدىردى.
ناتيجەسىندە, گول دا كوپ كۇتتىرمەدى. 54-مينۋتتا ورتالىق تۇستان ويقاستاي شىققان يۆان راكيتيچكە دەر كەزىندە ەشكىم قارسىلىق كورسەتپەدى. وعان جاقىنداۋ بولعان ماتەو كوۆاچيچ مەسسيدى «كۇزەتىپ» جۇرگەندىكتەن الدىنان شىعا المادى. وسىنداي ەركىندىكتى سەزىنگەن حورۆاتيالىق ويىنشى دوپتى سول قاپتالدان شىققان سەرحي روبەرتوعا جىبەردى. روبەرتو دا كوپ ويلانباستان ارعى بەتتەگى لۋيس سۋارەسكە باعىتتادى. قاقپاشىمەن جەكە قالعان ۋرۋگۆايلىق شابۋىلشى مۇمكىندىگىن ءمۇلت جىبەرمەدى.
ال ەكىنشى گولدىڭ ءساتى تىپتەن ەرەكشە. قاقپا ماڭىنداعى قاربالاس ساتتە دانيەل كارۆاحال دوپتى قولىمەن قايتارماق بولعان. بىراق سونىڭ وزىندە گول سوعىلىپ ەدى. الايدا, تورەشى گولدى ەسەپكە الماي, ويىندى بىردەن توقتاتتى. كارۆاحالدى الاڭنان قۋىپ, پەنالتي بەلگىلەدى. ال ون ءبىر مەترلىك ايىپ دوبىن مەسسي ءساتتى ورىنداي ءبىلدى. ەسەپ 2:0.
ءبىر ويىنشىسىنان ايىرىلعاننان كەيىن ءمادريدتىڭ جاعدايى تىپتەن قيىندادى. ال كاتالوندىقتار ەجەلگى اۋەنىنە باسىپ, قىسقا پاستارىن جيىلەتتى. قارسىلاستارىنا دوپ بەرمەي, ۋاقىت سوزۋمەن ءجۇردى. «رەال» ساپىندا الاڭعا جەلاياق گارەت بەيل مەن تالانتتى ماركو اسەنسيو شىققانمەن, جارىتىپ ەشنارسە كورسەتە المادى.
كەزدەسۋدىڭ سوڭعى مينۋتىندا «بارسەلونا» سوڭعى نۇكتەنى قويدى. وڭ قاپتالدان ليونەل مەسسي برازيليالىق مارسەلودان ايلاسىن اسىرعاننان كەيىن قاقپا ماڭىنداعى ارىپتەستەرىنە ادەمى پاس شىعاردى. سوڭعى ءۇش مينۋتتا الاڭعا شىققان الەيش ۆيدال سول تۇستان تابىلا كەتىپ, ءۇشىنشى دوپتى سوقتى.
وسىمەن, ىشكى بىرىنشىلىكتە «بارسەلونا» ءۇشىنشى جىل قاتارىنان «رەالدى» «سانتياگو بەرنابەۋدە» ۇتىپ كەلەدى. ال بيىلعى ماۋسىمدا كاتالوندىقتار لا ليگا كەستەسىندە «رەالدان» 14 ۇپايعا وزىپ تۇر. ارينە, مادريدتىكتەردىڭ ەنشىسىندە ءبىر ويىننىڭ ارتىق ەكەنىن دە ۇمىتپاعان ءجون.
ايتا كەتەر تاعى ءبىر جاڭالىق, ليونەل مەسسي بۇگىن ايگىلى نەمىس ويىنشىسى گەرد ميۋللەردىڭ رەكوردىن جاڭارتتى. ارگەنتينالىق شابۋىلشى ەۋروپالىق توپ ليگالاردىڭ ىشىندە ءبىر كوماندا ساپىندا كوپ گول سوققان ويىنشى اتاندى. ميۋللەر «باۆاريادا» ءجۇرىپ 525 گول سالسا, مەسسي بۇل ويىندا 526-دوبىن سوقتى.
ايان ءابدۋالي,
«ەگەمەن قازاقستان»
