قازاقستاننىڭ تۇكپىر-تۇكپىرىنەن جيىلعان ساربازداردىڭ اتا-انا, اعايىن-تۋىستارى ۇلتتىق ۇلان قاتارىنا قابىلدانىپ جاتقان ۇلدارىن كورىپ كوزايىم بولدى.
جيىن باسىندا ءسوز العان 28237 اسكەري ءبولىمىنىڭ كومانديرى پودپولكوۆنيك بايانعالي ەسجانوۆ: «جاس ساربازدار, سىزدەر بۇگىن ەل الدىندا اسكەري انت قابىلداپ, وتان قورعاۋشىسىنىڭ قاتارىنا قوسىلعالى تۇرسىزدار. وسى ۋاقىتتان باستاپ سىزدەرگە جۇكتەلگەن مىندەت تە زور بولماق. ويتكەنى, اسكەري انت – اسكەري ءومىردىڭ وزگەرمەيتىن زاڭى. وندا وتاندى قورعاۋدىڭ, ونىڭ ىشىندە حالىققا جانە زاڭدى سايلانعان پرەزيدەنتكە ادال قىزمەت ەتۋدىڭ ايقىن بەلگىلەرى بار. اسكەري ءومىر قانشالىقتى قيىن بولعانىمەن, جارعىمەن بەلگىلەنگەن تالاپتاردى ورىنداۋ – پارىز جانە قاسيەتتى مىندەت. سىزدەردىڭ مىندەتتەرىڭىز – وزدەرىڭىزگە جۇكتەلگەن تاپسىرمالاردى جاۋاپكەرشىلىكپەن ورىنداۋ. تۋعان جەرىمىزگە تەر توگىپ, انتقا ادال بولۋ», دەپ جاس ساربازدارعا جالىندى سوزدەرىن ارناپ جىگەرلەرىن جانىدى.
ۇلتتىق ۇلان قاتارىنا قوسىلىپ وتان الدىندا انت قابىلداۋلارىمەن ساربازداردى ءبولىم قولباسشىلىعان بولەك ۇلتتىق ۇلان ارداگەرلەرى مەن ءوزارا ارەكەتتەگى بايلانىس ورگاندارىنىڭ وكىلدەرى دە قۇتتىقتاپ, يگى تىلەكتەرىن ارنادى.
اتا-انالاردىڭ اتىنان قۇتتىقتاۋ ءسوز سويلەگەن جاس سارباز قاتارداعى سەرىكوۆتىڭ اكەسى ەرماعۇلوۆ ومىربەك ساربازدارعا, وسى قابىلداعان اسكەري انتتارىنا ادال بولۋلارىن, اسكەري قىزمەتتىڭ قيىندىقتارىنا مويىماي تاباندىلىقپەن توتەپ بەرۋگە شاقىرىپ, بورىشتارىن ويداعىداي وتكەرىپ بولىپ ۇيلەرىنە, اتا-انالارىنا امان-ەسەن ورالۋلارىن تىلەدى جانە ۇلىنىڭ ۇلتتىق ۇلان قاتارىندا اسكەري بورىشىن وتكەرىپ جاتقاندىعىن ماقتانىش تۇتاتىنىن ايتتى.
كەڭەس وداعىنىڭ باتىرى باۋىرجان مومىش ۇلىنىڭ ەسىمىن يەلەنەتىن اسكەري ءبولىم جەكە قۇرامى رەسپۋبليكا كولەمىندەگى ازاماتتىق قورعانىس سالاسىندا توتەنشە جاعدايلاردىڭ سالدارىن جويۋ جانە اپات بولعان جەرلەردە قۇتقارۋ جۇمىستارىن جۇرگىزۋ بويىنشا ءتۇرلى تاپسىرمالاردى ورىندايدى. وسى جىلدىڭ كۇز مەزگىلىندە اسكەري بولىمگە شاقىرىلعان 200-دەن استام بوزبالا جاس جاۋىنگەر كۋرسىن اياقتاپ, بۇگىننەن باستاپ وتانىن قورعاۋشى ۇلتتىق ۇلاندىق ساربازعا اينالدى.
اسكەري انت قابىلداۋ - وتانىڭا, حالقىڭا اقتىق دەمىڭ شىققانشا ادال بولۋ, ەل باسىنا سىن ساعات تۇسسە, وندا مويىماي كوتەرۋ, قاجەت بولسا, جان قيۋ دەگەن ءسوز. انت – ادالدىق رۋحى. حالقىمىز «انتتان اتتاعانى – اردان اتتاعانى», - دەيدى. ياعني, ادامزات نورمالارىنىڭ قالىپتاسقان شەگى ار بولسا, ونى بۇزۋ وپاسىزدىققا جاتادى. تالاي عاسىر حالقىنىڭ ەركىندىگىن سىرتقى جاۋلاردان قورعاعان قابانباي, بوگەنباي, ناۋرىزباي سىندى باتىر بابالارىمىزدىڭ, كەشەگى ءفاشيزمنىڭ وتىن وشىرگەن مايدانگەر اتالارىمىزدىڭ اماناتتاعان وتانىمىزدىڭ تاۋەلسىزدىگىن قىراعى كۇزەتۋ - ەڭ ۇلىق قىزمەت, مارتەبە. بۇگىنگى شارا سونىڭ ايقىن مىسالى, ايشىقتى ايعاعى بولسا كەرەك.
ايدوس بايشاعىروۆ,
28237 اسكەري ءبولىمىنىڭ وفيتسەرى
