قىزىلوردا وبلىسىنىڭ اكىمى قىرىمبەك كوشەرباەۆ دارىگەرلەرگە 29 سانيتارلىق اۆتوكولىكتىڭ كىلتىن تابىستادى.
ء«بىز حالىققا ساپالى ءارى قولجەتىمدى مەديتسينالىق كومەك كورسەتۋدىڭ بارلىق تالاپتارىن باسشىلىققا الىپ وتىرمىز. ماسەلەن, جاڭا تۋىلعان نارەستەلەر ءۇشىن جاساندى تىنىس الدىرۋ اپپاراتتارىن اۋداندارعا, انا مەن بالا ورتالىعىنا الدىردىق. بارلىق اۋداندار جۇرەك قان تامىرلارى اۋرۋلارىن ەرتە انىقتايتىن كارديوستاندارتتار, ونكولوگيالىق اۋرۋلاردى ەرتە ساتىسىندا انىقتاۋعا مۇمكىندىك بەرەتىن ەندوۆيدەوستويكالارمەن قامتاماسىز ەتىلدى. تاۋەلسىزدىك كۇنى قارساڭىندا سىر وڭىرىندە مەملەكەتتىك-جەكەمەنشىك ارىپتەستىك اياسىندا سالىنعان 400 ورىندىق ەمحانا پايدالانۋعا بەرىلسە, جاڭا جىل مەرەكەسىنە تارتۋ رەتىندە دەنساۋلىق ساقتاۋ مەكەمەلەرى ءۇشىن جىلجىمالى فليۋروقوندىرعىلار مەن ىڭعايلى اۆتوكولىكتەر ساتىپ الىندى», - دەدى ايماق باسشىسى.
دەنساۋلىق ساقتاۋ سالاسىنىڭ ارداگەرى تۇرعانباي ماحانوۆ ارىپتەستەرىن كەلە جاتقان جاڭا جىل مەرەكەسىمەن قۇتتىقتاپ, وبلىس باسشىلىعىنا قولداۋ كورسەتكەنى ءۇشىن العىس ايتتى.
اتاپ وتەيىك, سوڭعى 2 جىلدا مەديتسينالىق ۇيىمداردىڭ ماتەريالدىق-تەحنيكالىق بازاسى نىعايتىلدى. بارلىق اۋدانداردا اۋىسىمىنا 250 كەلۋشىگە ارنالعان ەمحانالار جاڭادان سالىنىپ, جۋىردا جاڭاقورعان اۋداندىق ەمحاناسى مەن قازالى اۋداندىق ورتالىق اۋرۋحاناسى پايدالانۋعا بەرىلەدى. سونىمەن قاتار, 2018-2019 جج. مەملەكەتتىك–جەكەمەنشىك ارىپتەستىكتىڭ شەڭبەرىندە وبلىس اۋرۋحانالارىنا كومپيۋتەرلىك توموگراف جانە انگيوگرافيالىق قوندىرعىلار ساتىپ الۋ بويىنشا 5 اۋقىمدى جوبا قاراستىرىلىپ وتىر.
