«جاقىندا رەسەيگە بارعاندا كەنەسارى حانعا تيەسىلى وسى كىسەنى كوردىك. كەنەسارى حاننىڭ مىلتىعى ومبىدا ساقتاۋلى تۇرعانى مالىمەت بولدى. سوندىقتان رەسەيلىك مۋزەيلەر كەنەسارىعا بايلانىستى قازاقستاندا كورمە وتكىزسە, وتە جاقسى بولار ەدى. ياعني باسقا دا تۇلعالارعا قاتىستى جادىگەرلەردى اكەلىپ تۇرسا, بۇنى جاقسى باستاما دەپ باعالار ەدىك», - دەدى ول.
ايتا كەتەيىك, بۇگىن بەرىك ابدىعالي ۇلى فەيسبۋكتەگى پاراقشاسىندا سانكت-پەتەربۋرگتە كەنەسارى حاننىڭ كىسەسى ساقتالعانى انىقتالعانىن جازدى.
«الاش اسكەرى تاقىرىبىن زەرتتەپ ءجۇرىپ, سەيىلبەك جانايداروۆتىڭ 1915 جىلى سانكت-پەتەربۋرگتەگى رەسەي ەتنوگرافيالىق مۋزەيىنە كەنەسارى حاننىڭ كىسەسىن تاپسىرعانى تۋرالى دەرەك كەزدەستىردىم. بۇل جادىگەر «كسە - پوياس كيرگيزسكوگو حانا سرەدنەي وردى» دەگەن اتپەن اتالعان مۋزەيدىڭ قورىندا بۇگىنگى كۇنگە دەيىن ساقتالعان ەكەن. ونى مادەنيەت جانە سپورت ءمينيسترى ارىستانبەك مۇحامەدي ۇلىمەن سانكت-پەتەربۋرگتەگى مۋزەيگە بارعاندا ءوز كوزىمىزبەن كورۋگە مۇمكىنشىلىگى تۋدى», - دەپ جازدى الەۋمەتتىك جەلىدە ول.
وسى ورايدا ول سەيىلبەك جانايداروۆ 1918 جىلى اتباسار الاش اسكەري ديۆيزيونىن قۇرعان ءارى الاشوردا ۇكىمەتىنىڭ كانديدات مۇشەسى بولعان ازامات ەكەنىن ەسكە سالىپ ءوتتى.
«بۇل جادىگەر سەيىلبەك جانايداروۆتىڭ قولىنا قالاي تۇسكەنىن زەرتتەي كەلە انىقتاعانىمىز - ول كىسە سەيىلبەكتىڭ اتاسى - كەنەسارى حاننىڭ اسكەري قولباسشىلارىنىڭ ءبىرى جانايدار ورىنباي ۇلىنان قالعان مۇرا ەكەن. جانايدار باتىردىڭ ەرلىكتەرى تۋرالى مۇسا شورمانوۆتىڭ, ءماشھۇر ءجۇسىپتىڭ, دوسكەي اقىننىڭ, جامبىلدىڭ, يمانجان جىلقايدار ۇلىنىڭ ەستەلىكتەرى مەن جىرلارىندا كەزدەسەدى. سونداي-اق بۇل تۋرالى ءى.ەسەنبەرليننىڭ «قاھار» رومانىندا دا جازىلعان. باتىردىڭ ۇرپاقتارىنىڭ ايتۋىنشا, كەنەسارى حان ءوزىن ولىمنەن بىرنەشە رەت قورعاپ قالعانى ءۇشىن ءارى كورسەتكەن ەرلىكتەرى ءۇشىن اتالعان كىسەنى جانايدار ورىنباي ۇلىنا تارتۋ ەتكەن. جالپى كەنەسارى ءوز باتىرلارىنا سوعىستا كورسەتكەن ەرلىكتەرى ءۇشىن وردەن-مەدال ورنىنا العىس رەتىندە ۇلكەن سىي-سياپاتپەن ماراپاتتاۋ ءداستۇرى بولعان. سونداي-اق كوكشەتاۋ شايقاسىندا جەڭىسكە جەتكەنى جانە شىنايى ەرجۇرەكتىك كورسەتكەنى ءۇشىن كەنەسارى اعىباي باتىرعا اتاسى ابىلاي حاننان قالعان قانجاردى تارتۋ ەتكەن ەكەن. بۇل تۋرالى اقپاراتتى جاقىن ارادا تولىعىراق كورسەتەمىن»,- دەپ جازدى بەرىك ابدىعالي ۇلى.
