قاراعاندى پوليتەحنيكالىق ينستيتۋتىنا نۇرسۇلتان نازارباەۆ «دومنا ءوندىرىسى» ماماندىعى بويىنشا وقۋعا ءتۇستى. العاشقى ەكى كۋرستا جالپى پاندەر وقىتىلاتىن, ءبىز ورتاق ءدارىسحانادا, ستۋدەنتتەر تىلىندە ءبىر «پوتوچكادا» وقىدىق, ءتورت توپتان قۇرالعان جۇزدەگەن ستۋدەنت دومەنشى, بولات بالقىتۋشى, بولات قۇيۋشى ماماندىقتارىن يگەرىپ جاتتى...
العاشقىدا ءبىر-ءبىرىمىزدى جاقسى تانىعانشا جاي ارالاسىپ جۇردىك, كەيىن ءۇش ءتورت اي وتكەننەن سوڭ بىرگە تىڭداعان لەكتسيالاردا العان بىلىمدەرىمىز باسىمىزدى بىرىكتىردى. كەيىن 1963 جىلدىڭ قاڭتار ايىندا بارلىق بولاشاق مەتاللۋرگتەردى وندىرىستىك تاجىريبەدەن وتۋگە تەمىرتاۋ قالاسىنداعى كاسىپورىندارعا جىبەردى. بولات بالقىتۋشىلار قازاق مەتاللۋرگيالىق زاۋىتىنا, ال دومەنشىلەر, ونىڭ ىشىندە نۇرسۇلتان نازارباەۆ بار قاراعاندى مەتاللۋرگيالىق زاۋىتىنا جىبەرىلدى.
مەتاللۋرگ ماماندىعى وتە اۋىر. اسىرەسە ىستىق تسەحتاردا دومنا, مارتەن پەشتەرىندە جۇمىس ىستەيتىندەردىڭ, بولات بالقىتۋشىلاردىڭ جۇمىستارى اۋىر. نەگىزگى جۇمىسشى قۇرالى سۇيمەن جانە كۇرەك. قازىرگى جاستارمەن كەزدەسۋ كەزىندە ولار مەنەن سۇرايدى: «نەگە ارتتا قالعان ءوندىرىس؟» دەپ, مەن ولارعا: «وسىنداي تەحنولوگيا», دەپ جاۋاپ بەرەمىن. ەگەر نۇرسۇلتان نازارباەۆتىڭ «ادىلەتتىڭ اق جولىندا» كىتابىن وقيتىن بولساڭىزدار, وندا وتتىقشىنىڭ ەڭبەگى جايلى تولىق جازىلعان. پرەزيدەنت بۇل اۋىر ەڭبەكتىڭ قىر-سىرىن تولىق بىلەدى...
جاستار اۋىر جۇمىستان قورىققان جوق, ولاردىڭ الدارىندا ونەگە الاتىن تالىمگەرلەرى بولدى, ولار ناعىز ەر ازامات اتقاراتىن جۇمىستىڭ قىر-سىرىن ۇيرەتتى, نەگىزى – وت جانە قايناعان مەتالدى باسقارۋدى ۇيرەتتى: الەكسەي شاتيلين, بوريس ياگوۆيتوۆ, يۆان ەسكوۆ, فەدور ۆاششەنكو, التىنبەك دارىباەۆ, ارعىن ءجۇنىسوۆ, ەلامان بايعازيەۆ, الەكسەي پانچەنكو جانە ت.ب. وسىنداي ازاماتتاردىڭ اتىمەن ەلىمىزدىڭ قارا مەتاللۋرگياسىنىڭ تاريحى جازىلعان.
وندىرىستىك تاجىريبەدەن كەيىن ءبىز ينستيتۋتقا قايتىپ ورالىپ, وقۋىمىزدى جالعاستىردىق. ماماندىق بويىنشا تەوريالىق ءبىلىمدى يگەرگەن كەزدە پاندەر نەنى وقىتادى جانە نە جايلى ايتاتىنىن جاقسى تۇسىنەتىنبىز. وقۋ جەڭىل جانە قىزىقتى بولدى. ءبىز ءبىر ۇرپاقتىڭ وكىلدەرىمىز, ءبىزدى وتباسىمىزدىڭ ءومىر ءسۇرۋ دەڭگەيى جانە قوعامدا قۇرمەتتى ينجەنەر-مەتاللۋرگ ماماندىعىن يگەرۋگە دەگەن ۇمتىلىسىمىز جاقىنداستىردى. وسى جايلى مەنىڭ دوستارىم جاقسىلىق اسكەەۆ, تولەۋتاي سۇلەيمەنوۆ, قۋانىش وماشەۆ, ۆيكتور نيكونوۆ جانە ت.ب. جىگىتتەر ارماندادى. نۇرسۇلتان نازارباەۆ ءبىزدىڭ ورتامىزدا ارقاشان جەكە ءوزى ءبىر توبە بولاتىن. ول ءوزىنىڭ سابىرلىلىعى, وزىنە دەگەن سەنىمدىلىگى ارقاسىندا ماڭايىنا جاستاردى توپتاستىرا ءبىلدى, ول ارقاشان پىكىرىن اشىق ايتاتىن. ءبىلىم دەڭگەيى ءارتۇرلى قۇربىلارىنىڭ اراسىندا بولاشاق پرەزيدەنت ءوزىنىڭ بىلىمدىلىگىمەن, ساياسي قىراعىلىعىمەن, ويعا جاقسى ساقتاۋ قابىلەتىمەن, قازاق جانە ورىس تىلدەرىن جەتىك بىلۋىمەن ەرەكشەلەنەتىن.
سونىمەن قاتار جوعارى وقۋ ورنىندا تەحنيكالىق پاندەردەن باسقا ءبىز عىلىمي كوممۋنيزم, ديالەكتيكالىق جانە تاريحي ماتەرياليزم جانە ت.ب. گۋمانيتارلىق پاندەردى وقىدىق. بولاشاق ساياسي قايراتكەر نۇرسۇلتان نازارباەۆ سول كەزدە دە ءوزىنىڭ بىلىمدىلىگىمەن كوزگە تۇسەتىن جانە ونى وقىتۋشىلار دا جاقسى كوردى. اشىعىن ايتساق ونىڭ جان-جاقتى بىلىمدىلىگى سول كەزدەگى قوعامدىق پاندەر بويىنشا وتەتىن سەمينارلاردا وقىتۋشىعا ءارتۇرلى سۇراق بەرۋمەن وقىتۋشىنىڭ كوڭىلىن باسقا جاققا بۇرىپ, ستۋدەنتتەردەن ساباق سۇراۋعا ۋاقىت قالدىرمايتىن. وقىتۋشى ءوزى قويعان سۇراققا جاۋاپ بەرەمىن دەپ ۋاقىتتىڭ قالاي وتكەنىن بىلمەي دە قالاتىن. سول كەزدە نۇرسۇلتاننىڭ بارلىق سالادان حابارى بارىنا تاڭعالاتىنبىز.
ءبىزدىڭ تالانتتى كۋرستاسىمىز سول جىلدار ىشىندە كوپتەگەن شەتەلدىك ساپارلارعا باردى, شەتەلدەردى جانە ونداعى حالىقتىڭ ءومىر ءسۇرۋ دەڭگەيىن كوردى. تەمىرتاۋ قالاسىنىڭ جۇمىسشى جاستارىنىڭ كوشباسشىسى حەلسينكي قالاسىندا وتكەن ءىىى دۇنيەجۇزىلىك جاستار فەستيۆالىنە قاتىستى. وسى ساپاردان كەيىن نۇرسۇلتان نازارباەۆ ءوزىنىڭ العان اسەرلەرىن جاستارمەن ءبولىستى.
جاس مەتاللۋرگ تۇڭعىش عارىشكەر يۋري گاگارينمەن كەزدەسكەن, ونىمەن فوتوعا تۇسكەن, سول سۋرەت «كومسومولسكايا پراۆدا» گازەتىندە جاريالاندى. ءبىزدىڭ جەرلەسىمىزدى بلكجو وك ۆالەري بىكوۆسكيمەن بىرگە عارىشتا بولعان كومسومول بەلگىسىمەن ماراپاتتاعان. وسى عارىشتا بولعان كومسومول بەلگىلەرى 10 دانا, ونىمەن ءىرى ەلدىڭ ۇزدىك جاستارىن ماراپاتتاعان. نۇرسۇلتان نازارباەۆ بۇگىنشە ايتقاندا «جۇلدىزدى وندىق» توپتاماسىندا بولعان. سول كەزدە ءبىزدىڭ جولداسىمىزعا قوعامدىق جۇمىستاردى اتقارۋ ۇنايتىندىعىن بايقاعانبىز, ويتكەنى ول اتقارعان قوعامدىق جۇمىستاردىڭ ناتيجەلەرى ونىڭ ۇيىمداستىرۋشىلىق قابىلەتى جوعارى دەڭگەيدە ەكەندىگىن ايقىندايتىن.
ەڭبەكشىل قۇرىلىس وتريادتارى
ءبىزدىڭ تانىستىعىمىزدىڭ جالعاسۋىنا سول كەزدەگى ستۋدەنتتىك قۇرىلىس وتريادتارى سەبەپشى بولدى. ول كەزدە ستۋدەنتتىك قۇرىلىس وتريادتارى ورلەۋ ۇستىندە ەدى, وسى قوزعالىس ەلىمىزدىڭ اۋىلدى جەرلەرىنىڭ دامۋىنا ىقپال ەتتى جانە ستۋدەنت جاستارعا تابىس تابۋعا مۇمكىندىك بەردى. ءبىزدى قاراعاندى وبلىسىنىڭ باتىسىندا ورنالاسقان «بالىقتىكول» سوۆحوزىندا تۇرعىن ۇيلەر سالۋعا جىبەردى. جۇزدەن استام جاستار قۋ دالاعا جاڭا سوۆحوز قۇرىلىسىن سالۋعا كەلدىك.
قۇرىلىس جۇمىستارىن ۇزدىكسىز جۇرگىزۋ ءۇشىن ماتەريالداردى ۋاقىتىندا جەتكىزۋ قاجەت. نۇرسۇلتان نازارباەۆ وبلىس بويىنشا قاجەت قۇرىلىس ماتەريالدارىن تاۋىپ, ونى جەتكىزۋمەن اينالىستى. قالقاندار جيىنتىقتا جەتكىزىلەتىن, ال كىرپىش پەن تسەمەنتتى قۇرىلىس ترەستەرى مەن كومبيناتتارىنان, جەرگىلىكتى اتقارۋشى ورگاندار ارقىلى الۋ قاجەت ەدى. ونىڭ جوعارى دەڭگەيدەگى ۇيىمداستىرۋشىلىق قابىلەتىنىڭ ارقاسىندا 8 ەكى پاتەرلى ءۇي قۇرىلىسىن ۋاقىتىندا ءبىتىرىپ, ونى قىركۇيەكتىڭ باسىندا پايدالانۋعا بەردىك, ال باسقا قۇرىلىس وتريادتارى ۇيلەردى قىركۇيەك ايىنىڭ سوڭىندا تاپسىردى.
تاڭنىڭ اتىسىنان كەش قارايعانعا دەيىن جۇمىس ىستەگەن ءبىزدىڭ مەتاللۋرگيالىق ستۋدەنتتىك قۇرىلىس وتريادى تەك ۇيلەر عانا سالعان جوق, كەلىسىمشارتتا قاراستىرىلماعان مال قورالارىن دا سالدى.
سول جىلدارى فوتواپپارات وتريادتاعى ءبىر جىگىتتە عانا بولدى. ول تۇسىرگەن سۋرەت بۇگىندە وتكەن تاريحتىڭ كۋاسى. ءبىز سالعان تۇرعىن ۇيلەر قۇرىلىسىن جاقسى دەگەن باعامەن تاپسىردىق. بارلىعىمىز ۇيىمىزگە قايتتىق. ارقايسىمىز ەكى مىڭ رۋبل ەڭبەكاقى الدىق. ول ءبىز ءۇشىن جاقسى قاراجات ەدى. ءوزىمىز كيىندىك, وتباسىمىزعا كومەكتەستىك. جاڭا وقۋ جىلىنا وسىلايشا دايىندالدىق.
جاڭا كەزەڭ
ينستيتۋتقا قايتىپ كەلگەن كەزدە ءبىزدى توسىن جاڭالىق كۇتىپ تۇردى. قارمەتكومبينات بازاسىندا قارپتي تەمىرتاۋ قالاسىنىڭ بولىمشەسىندە جەكە جتوو-زاۋىت اشىلدى. بۇل تەمىرتاۋ جاستارىنىڭ ارمانى ەدى. ءۇيدىڭ جانىندا وقۋ قولايلى. كومبينات جاستارىنىڭ مۇددەسىن ەسكەرۋمەن نۇرسۇلتان نازارباەۆ بلكجو وك مۇشەسى رەتىندە كومسومول سەزدەرىنىڭ بىرىندە جوعارعى ورگانداردىڭ اتىنا سىن ايتقان. نۇرسۇلتان نازارباەۆتىڭ بايانداماسىنان كەيىن 1962 جىلعى رەسپۋبليكالىق كومسومول سەزىندە وسى ماسەلە وڭىنان شەشىلدى. قارا مەتاللۋرگيانىڭ الىبىن بىلىكتى كادرلارمەن قامتاماسىز ەتۋگە ارنالعان جوعارى تەحنيكالىق وقۋ ورنى 1964 جىلى اشىلدى. وسى وقۋ ورنىنا قارپتي-ءدىڭ بارلىق مەتاللۋرگيالىق ماماندىقتارى: دومەندى ءوندىرىس, مەتالدى قىسىممەن وڭدەۋ, بولات بالقىتۋ بولىمشەسى اۋىستىرىلدى. ءبىزدىڭ الدىمىزدا قايدا وقيمىز دەگەن تاڭداۋ تۇردى.
1965 جىل باستالدى. ينستيتۋتتى اياقتاعاننان كەيىن ءبىزدىڭ قۇيۋشىلار توبىنىڭ تۇلەكتەرى 1968 جىلدىڭ قاڭتار ايىندا جولداما بويىنشا قارمك-عا جۇمىسقا جىبەرىلدى. وندا وتتەكتى-كونۆەرتەرلى كەشەن قۇرىلىسى باستالعان ەدى. ارقايسىمىز وسى قۇرىلىسقا اتسالىستىق. ءومىرىمىز قالاي قالىپتاسقانىنان حاباردار بولعانىمىزبەن, ءبىز ءىس جۇزىندە ءبىر-بىرىمىزبەن ونشا كوپ ارالاسپادىق. سەبەبى, مەتاللۋرگيالىق كومبينات – بۇل تاۋلىك بويى جۇمىس ىستەيتىن 30 مىڭ ادامى بار قالا, وندا ءاربىر ءوندىرىس ءبىر اۋدان, ءوزىنىڭ شەكاراسى جانە جولى بار, ونىڭ كەستەلەرى جانە نۇسقاۋلارىن بىرگە جۇمىس ىستەيتىن كاسىپورىنداردىڭ جۇمىسىنا زيان كەلتىرمەۋ ءۇشىن ۋاقىتىندا ورىنداۋ قاجەت. باسقا تسەحتاردا جانە كەشەندەردەگى دوستارىمىزبەن ءجيى كەزدەسۋگە مۇمكىندىك بولمايتىن.
مەن وقۋ بىتىرگەننەن كەيىن نۇرسۇلتان نازارباەۆ وتتىقشى جانە ون جىلعا جۋىق گازشى بولىپ جۇمىس ىستەگەنىن بىلەتىنمىن جانە ول كەيىن پارتيالىق جۇمىسقا اۋىستى. ەشقاشان ءوزىمنىڭ كۋرستاسىمنىڭ قىزمەتتىك جاعدايىن پايدالانعان ەمەسپىن. بىراق نۇرسۇلتان ءابىش ۇلى جاستىق شاعىندا, كومبيناتتا بىرگە جۇمىس ىستەگەن تانىستارىمەن ارقاشان سىيلاستىق قارىم-قاتىناس جاسايتىن.
ۇلكەن ىستەر ۋاقىتى
ءبىزدىڭ كەزدەسۋلەرىمىز 1991 جىلدان ءجيى بولا باستادى. سول جىلدىڭ شىلدە ايىندا كومبيناتتاعى 3-تتتس-دە ۇلكەن اپات ورىن الدى. ءورتتى تەز ارادا سوندىرگەنمەن, سالدارى زور بولدى. توبە قۇلادى, جابدىقتار سۋ استىندا قالدى, درەسسيرلەۋ ستانى قاتتى ءب ۇلىندى. وسىنىڭ بارلىعىنا جاي قاراۋ مۇمكىن ەمەس ەدى. ەندى وسى اپاتتان باس كوتەرۋ مۇمكىن ەمەس سياقتى كورىنەتىن. تسەحتىڭ جاعدايى نە بولادى دەگەن ويلار مازالايتىن. ءبىز وسى ويىمىزدى پرەزيدەنتكە ايتتىق, ول: ء«بىز تسەح جۇمىس ىستەۋ ءۇشىن بارلىق جاعدايدى جاسايمىز», دەدى. تسەح قىسقا قاراي قالپىنا كەلتىرىلدى, ىسكە قوسىلدى. ديرەكتور الەكساندر سۆيچينسكي ءوندىرىستى ىسكە قوسۋ ءۇشىن بارلىق مۇمكىندىكتى پايدالاندى. ول شتاب قۇردى. نۇرسۇلتان ءابىش ۇلى قالپىنا كەلتىرۋ جۇمىستارىن ءوزىنىڭ قاداعالاۋىنا الدى. وسى جۇمىستى اتقارۋعا ولەگ سوسكوۆەتس تە كومەك كورسەتتى.
نۇرسۇلتان نازارباەۆتىڭ ايتقان سوزىندە تۇراتىندىعىنا ءبىزدىڭ كوزىمىز تاعى دا جەتتى. ول جاس كەزىندە دە سەزدەردە جاستار مۇددەسىن قورعايتىن, ارقاشان از سويلەپ, ۇلكەن ىستەردى جۇزەگە اسىراتىن. ول كومبينات پارتيا ۇيىمىنىڭ حاتشىسى بولعان كەزدە دە كۇندەلىكتى مىندەتتەردى شەشۋدى قولعا الدى. ونىڭ باستاماسىمەن ستاديون, ساۋىقتىرۋ ءساناتوريى, بالاباقشالار جانە تۇرعىن ۇيلەر سالىندى.
نۇرسۇلتان ءابىش ۇلى قكپ وك ءبىرىنشى حاتشىسى جانە قازاقستاننىڭ جوعارعى كەڭەسىمەن سايلانعان پرەزيدەنت رەتىندە تەمىرتاۋ قالاسىنا كەلدى, ورتتەن كەيىنگى كومبينات جاعدايىمەن تانىستى. بۇل ءبىزدىڭ نازارباەۆپەن ونىڭ الماتىعا كەتكەننەن كەيىنگى ءبىرىنشى كەزدەسۋىمىز ەدى. ال 1991 جىلدىڭ ماۋسىم ايىندا تەمىرتاۋ قالاسىندا تۇراتىن كۋرستاستار كەزدەسپەكشى بولدىق. وسى كەزدەسۋدى كۋرستاسىمىز بوريس شۋگول ۇيىمداستىردى.
سول كەزدە شۋگول ماسكەۋدە كانديداتتىق ديسسەرتاتسياسىن قورعاپ, جتوو-زاۋىتتا «قۇيۋ ءوندىرىسى» كافەدراسىنىڭ مەڭگەرۋشىسى بولىپ جۇمىس ىستەيتىن. ەسكى قالاداعى تولياتتي كوشەسىندە تۇراتىن ول نۇرسۇلتان ءابىش ۇلىن جانە ءبىزدى وتباسىمىزبەن, سونداي-اق, قارا مەتاللۋرگيا ءمينيسترى ولەگ سوسكوۆەتستى ۇيىنە قوناققا شاقىردى. جازدىڭ شۋاقتى جايدارلى كۇنى ءۇيىنىڭ الدىنداعى باقشادا داستارقان جايىلعان, جاقسى ءبىر وتىرىس بولدى, ستۋدەنتتىك جاستىق شاعىمىزدى ەسىمىزگە الدىق. ءبىزدىڭ جۇبايلارىمىز «ۆەسنا نا زارەچنوي ۋليتسە» كينوفيلمىنىڭ اۋەنىنە سالىپ, ولەڭ جازىپ, ونى پرەزيدەنتكە ارنادى. ءبىز جاستىق شاعىمىزعا قايتىپ ورالعانداي اسەردە بولدىق. نۇرسۇلتان ءابىش ۇلى: «قاي كەزدە قاي ورتادا بولمايىن, ءوزىمنىڭ ءوسىپ قاناتتانعان ۇيامدى ەش ۇمىتقان ەمەسپىن. كۇردەلى ماسەلەلەردى شەشكەن كەزدە مەن ارقاشان سىزدەر تۋرالى ويلايمىن دا, سىزدەردى ارقا تۇتامىن», دەگەن ءسوزى ەسىمدە. قاي-قايسىمىزدى بولسىن وسى سوزدەر تولعاندىرماي قويمايدى.
وسى كەزدەسۋدە نۇرسۇلتان ءابىش ۇلى بارلىعىمىزدى الماتىعا 6 شىلدە كۇنى تۋعان كۇنىنە شاقىردى, بىراق ەشقايسىمىز بارامىز دەپ ۋادە بەرگەن جوقپىز: قالاي بولادى, ول كۇنگە دەيىن ءالى ءومىر ءسۇرۋ كەرەك دەپ شەشتىك. دەگەنمەن, ءبىز پرەزيدەنتىمىزدى جاقسى بىلەتىن ەدىك, ول ارقاشان قوناقجاي, اق كوڭىلدى دارحان جان. ەشقاشان ءوزىنىڭ ءسوزىن دالاعا جىبەرمەيتىن, بەرگەن ۋادەسىندە, سوزىندە تۇراتىن ادام. ول كەزدە كومبينات ديرەكتورى الەكساندر سۆيچينسكي بولاتىن, ول نۇرسۇلتان نازارباەۆتىڭ تاپسىرماسى بويىنشا ءبىزدى ايەلدەرىمىزبەن بىرگە 30 ادامدى اۆتوبۋسقا وتىرعىزىپ الماتىعا جىبەردى. الماتىداعى كەزدەسۋ كوڭىلدى, ەستە قالارلىق كەزدەسۋلەردىڭ ءبىرى بولدى. وڭتۇستىكتىڭ تاماشا تابيعاتى ەستە قالدى.
ماعان ارقاشان نۇرسۇلتان نازارباەۆتىڭ كەز كەلگەن ادامدى مۇقيات تىڭداپ, وعان كەڭەس بەرۋى, ونىڭ ماسەلەلەرىن شەشۋگە كومەكتەسۋگە دايىن تۇراتىندىعى ۇنايتىن. مۇقيات تىڭداپ, ناقتى شەشىم قابىلداۋ كۇندەلىكتى كۇيبەڭ تىرشىلىكتە سيرەك كەزدەسەتىن قاسيەت. نۇرسۇلتان نازارباەۆ ايتقان ماسەلەگە قاتىستى ءوزىنىڭ پىكىرىن بىلدىرەدى, ەگەر ادامنىڭ پىكىرى دۇرىس بولماسا وعان تۇسىندىرۋگە تىرىسادى, ول نەگە دۇرىس ەمەستىگىنە ونىڭ كوزىن جەتكىزەدى. بۇل كوشباسشىعا ءتان قاسيەت.
باقىتىمىزعا قاراي, ءبىز باسقا رەسپۋبليكالار سياقتى ءبىر بىرىمىزبەن جاۋلاسپادىق. بىرلىكتە, ىنتىماقتاستىقتا بولاشاق ءۇشىن جۇمىس ىستەدىك. تاۋەلسىزدىكتىڭ ءبىرىنشى ونجىلدىعىندا كوپتەگەن قيىندىقتار كەزدەستى, جىلۋ, جارىق بولمادى. بىراق ءبىزدىڭ ازاماتتارىمىزدىڭ شىدامدىلىعى بارلىعىن جەڭدى. الدىمىزدا جارقىن بولاشاق بولادى دەگەن سەنىمدىلىك – نۇرسۇلتان نازارباەۆتىڭ ساياسي ستراتەگياسى ءبىزدى وسى كۇنگە جەتكىزدى.
سونىمەن 1991 جىلعى پرەزيدەنت سايلاۋىندا بارلىق تەمىرتاۋلىقتار نۇرسۇلتان نازارباەۆقا ءبىر اۋىزدان داۋىس بەردى. ءبىز ونى جاقسى تانيمىز جانە وعان سەندىك. ول – ءبىزدىڭ پرەزيدەنت. ول كومبيناتتى دامىتۋعا كومەكتەستى. ءبىزدىڭ قالامىز وركەندەپ كەلەدى. بۇرىن كورشى رەسەيدە دە قازاقستاندى بىلەتىندەر از ەدى. قازىرگى تاڭدا ءبىزدىڭ قازاقستاندى الەم تانيدى. ءبىزدىڭ ەكونوميكامىزدىڭ دامۋىنا الەمنىڭ دامىعان ەلدەرى تامسانۋدا. ەلىمىزدىڭ 26 جىلدىق تاۋەلسىزدىگىنىڭ ناتيجەسى وسىنداي. بۇل – پرەزيدەنتتىڭ قاجىرلى ەڭبەگىنىڭ ناتيجەسى. وسىنىڭ بارلىعىنا ءبىز كۋاگەرمىز.
ءبىزدىڭ ارقايسىمىز مەملەكەت باسشىسىنىڭ مىنا سوزىمەن كەلىسەمىز دەپ ويلايمىن: «مەن باقىتتىمىن, الەمدە قازاقستان جايلى جاقسى پىكىرلەر ايتىلادى. مەن قيىن جىلدارى ۇسىنعان باعدارلامامنىڭ بۇگىندە جەمىسىن كورىپ وتىرمىن. قازاقستاندىقتار ماعان ءوزىمنىڭ سەرىكتەستەرىممەن بىرگە دامىعان مەملەكەت بولۋعا باعىتتالعان ەڭبەكتەرىم ءۇشىن راحمەت ايتادى. ءبىز ەكونوميكا سالاسىندا ايتۋلى تابىسقا جەتتىك, بيۋدجەتىمىزدە قارجى بار, جىل سايىن حالىقتىڭ ءال-اۋقاتىن جاقسارتۋعا مۇمكىندىگىمىز بار».
ەرمەك تولەۋباەۆ,
قازاقستان ماگنيتكاسىنىڭ ارداگەرى
