پالاتا ەۋرازيالىق ەكونوميكالىق وداقتىڭ كەدەن كودەكسى تۋرالى شارتتى راتيفيكاتسيالادى.
شارتتىڭ نەگىزگى ماقساتى ەۋرازيالىق ەكونوميكالىق وداقتا بىرىڭعاي كەدەندىك رەتتەۋدى قامتاماسىز ەتۋ بولىپ تابىلادى. ەۋرازيالىق ەكونوميكالىق وداقتىڭ كەدەن كودەكسى كەدەندىك رەتتەۋ سالاسىندا:
- دەكلاراتسيا نەگىزىندە تولتىرىلعان قۇجاتتاردى كەدەن ورگانىنا ۇسىنباي, كەدەن دەكلاراتسياسىن ەلەكتروندىق تۇردە بەرۋ مۇمكىندىگى;
- كەدەن دەكلاراتسياسى تىركەلگەن ساتتەن باستاپ ءتورت ساعاتتىڭ ىشىندە تاۋارلاردى شىعارۋدى جۇزەگە اسىرۋ;
- كەدەن دەكلاراتسياسىن تىركەۋگە جانە تاۋارلاردى اۆتوماتتى تۇردە شىعارۋعا بايلانىستى كەدەندىك وپەراتسيالاردى كەدەن ورگاندارىنىڭ لاۋازىمدى ادامدارىنىڭ قاتىسۋىنسىز جاساۋ مۇمكىندىگى;
- ۋاكىلەتتى ەكونوميكالىق وپەراتور مارتەبەسىنىڭ بەرىلۋى مۇمكىن زاڭدى تۇلعالاردىڭ ساناتتارىن كوبەيتۋ, ارنايى جەڭىلدىكتەردىڭ تىزىمدەرىن, ونىڭ ىشىندە ەۋرازيالىق ەكونوميكالىق وداقتىڭ بۇكىل اۋماعىنداعى كەدەندىك باقىلاۋعا قاتىستى ارنايى جەڭىلدىكتەردىڭ تىزىمدەرىن ۇلعايتۋ سياقتى جاڭا باسىم باعىتتاردى ەنگىزەدى.
سەناتورلار ەكى وقىلىمدا قاراپ, تۇرعىن ءۇي تۋرالى زاڭناماعا تۇزەتۋلەردى قابىلدادى.
زاڭنىڭ ماقساتى قازاقستان رەسپۋبليكاسى قارۋلى كۇشتەرىنىڭ, باسقا دا اسكەرلەر مەن اسكەري قۇرىلىمدارىنىڭ اسكەري قىزمەتشىلەرىن تۇرعىن ۇيمەن قامتاماسىز ەتۋ جۇيەسىن جەتىلدىرۋ بولىپ تابىلادى.
اتاپ ايتقاندا, تۇزەتۋلەردە اسكەريلەرگە بەرىلەتىن قىزمەتتىك تۇرعىن ءۇي ورنىنا بيۋدجەت قاراجاتى ەسەبىنەن ارنايى اقشالاي قولداۋ كورسەتۋ قاراستىرىلعان. بۇل رەتتە, وسى تۇرعىن ءۇي تولەمدەرىنىڭ مولشەرى ايماقتىق جانە وتباسىلىق قۇرام ەرەكشەلىكتەرىنە قاراي سارالاناتىن بولادى.
قۇجات قىزمەتتىك تۇرعىن ءۇي جەكەشەلەندىرۋگە جاتپايتىن كەزدە (ەگەر ول اسكەري قالاشىقتاردا, شەكارا زاستاۆالارى جانە وزگە دە جابىق نىساندار اۋماعىندا بولسا) اسكەري قىزمەتشىلەرگە تولەنەتىن, تۇرعىن ءۇي جاردەماقىسى مەن اقشالاي وتەماقى مولشەرىن ەسەپتەۋ ءتارتىبىن ايقىندايدى.
تۇرعىن ءۇي تولەمدەرىن پايدالانۋدىڭ ماقساتى, ولاردى تولەۋدى توقتاتۋ نەگىزدەرى, اسكەري قىزمەتشىلەردىڭ وتباسى مۇشەلەرىنىڭ قۇرامى ناقتىلانادى.
اسكەري قىزمەتكەر قازا بولعان جاعدايدا, وتباسى مۇشەلەرىنە, مۇراگەرلەرگە تۇرعىن ءۇي تولەمدەرىن پايدالانۋعا, بىرجولعى اقشالاي وتەماقى تۇرىندە الۋعا كەپىلدىك بەرىلەدى. اسكەري قىزمەتكەردىڭ ولىمىنە (قايتىس بولۋىنا) بايلانىستى بىرجولعى اقشانى تولەۋدەن باس تارتۋ شارتتارى بەكىتىلگەن.
جەكەلەگەن تۇزەتۋلەر ارقىلى بانكتىك شوتتاردا جيناقتالعان تۇرعىن ءۇي تولەمدەرىن ماقساتسىز پايدالانۋدان قورعاۋ ماسەلەلەرى رەتتەلگەن.
وتىرىس بارىسىندا سەناتور داريعا نازارباەۆانىڭ پرەمەر-مينيستر ب.ساعىنتاەۆتىڭ اتىنا جولداعان «قازتەلەراديو» اق-عا تيەسىلى «OTAU TV»-نىڭ 1 ميلليوننان استام ابونەنتتەرىن «Caspio HD» جەكە كومپانياسىنا قانداي ماقساتپەن بەرىلىپ جاتقانىن انىقتاۋ تۋرالى; سەناتور ناريمان تورەعاليەۆتىڭ بالەت پەن بي ارتىستەرىنىڭ زەينەتكەرلىك جاس مولشەرىن بەلگىلەۋدى قايتا قاراۋ تۋرالى دەپۋتاتتىق ساۋالدارى جاريا ەتىلدى.
وتىرىس سوڭىندا سەنات توراعاسى ق.توقاەۆ سەناتورلاردى كەلە جاتقان مەرەكە - قازاقستان رەسپۋبليكاسى تۇڭعىش پرەزيدەنتىنىڭ كۇنىمەن قۇتتىقتادى. سەناتورلاردىڭ باستاماسى بويىنشا زاڭنامالىق دەڭگەيدە قابىلدانعان بۇل ماڭىزدى ۇلتتىق مەرەكە 2012 جىلدان باستاپ مەرەكەلەنىپ كەلەدى.
