ورال قالاسىندا «جاس وتان» جاستار قاناتى باتىس قازاقستان وبلىستىق فيليالىنىڭ ۇيىمداستىرۋىمەن «ەركىن پىكىر» ديسكۋسسيالىق كلۋبىنىڭ كەزەكتى وتىرىسى ءوتتى.
ەركىن الاڭعا وبلىستاعى ءتىل سالاسى ماماندارى, جۋرناليستەر مەن جاستار ۇيىمدارىنىڭ وكىلدەرى, سونىمەن قاتار «ەلىم مەنىڭ» كواليتسياسىنىڭ مۇشەلەرى قاتىستى.
«ەلباسىنىڭ بيىل جاريالاعان باعدارلاماسى – ەل دامۋىنىڭ تۇتاس ءبىر كەزەڭىندە باسشىلىققا الاتىن تۇجىرىم, ۇلت بولاشاعىنا دەگەن سەنىمدى كۇشەيتە تۇسەتىن تاريحي قۇجات. لاتىنعا كوشۋدىڭ ۋاقىتى تۋدى. ماڭىزدىلىعى, قاجەتتىلىگى جاعىنان دا, ءتىلدىڭ بولاشاعى ءۇشىن دە بىرەگەي مىندەت. ۇلتتىق ءالىپبي قوعامدا ۇلكەن قىزىعۋشىلىق تۋدىردى, ويتكەنى ءالىپبي تاقىرىبى ۇلت زيالىلارىنىڭ كوپتەن كۇتكەن اڭگىمەسى ەدى,» دەدى ديسكۋسسيالىق كلۋبتىڭ باستى قوناعى – حالىقارالىق «قازاق ءتىلى» قوعامى باتىس قازاقستان وبلىستىق فيليالىنىڭ توراعاسى بولات جەكسەنعاليەۆ.
وتىرىس قورىتىندىسى بويىنشا الەۋمەتتىك جەلىلەردەگى توپ اتاۋلارى مەن قولدانۋشى اتاۋلارىن لاتىن ارىپتەرىنە اۋىستىرۋ, وفلاين رەجيمدە قىزمەت ەتەتىن ىڭعايلى كونۆەرتەر ويلاپ تابۋ, جاس ءتىل ماماندارىنىڭ ۇسىنىسىمەن جاستار مەن ۇلكەن توپتاردى وقىتاتىن ارنايى كەشەندى كۋرستار جۇرگىزۋ باستاماسى كوتەرىلدى.
قازبەك قۇتتىمۇرات ۇلى,
«ەگەمەن قازاقستان»
