ونىڭ قۇرامىندا ينۆەستيتسيالار جانە دامۋ ۆيتسە-ءمينيسترى رومان سكليار, ۇلتتىق ەكونوميكا ۆيتسە-ءمينيسترى ايباتىر جۇماعۇلوۆ, «قازاقستان تەمىر جولى» ۇك» اق پرەزيدەنتى قانات الپىسباەۆ, «قازاۆتوجول» ۇك» اق باسقارما توراعاسى ەرمەك قيزاتوۆ, «بايتەرەك» ۇبح» اق باسقارما توراعاسىنىڭ ورىنباسارى ءانۋار ومارحودجاەۆ بار.
ساپار بارىسىندا ا.مامين شىمكەنتتەگى حالىقارالىق اۋەجايدىڭ جۇمىسىن كورىپ, وندا «شىمكەنت اۋەجايى» اق باسقارما توراعاسىنىڭ ورىنباسارى ساكەن مامىربەكوۆتىڭ بايانداماسىن تىڭدادى. سونىمەن قاتار وڭتۇستىك قازاقستان وبلىسىنىڭ اكىمى جانسەيىت تۇيمەباەۆتىڭ قاتىسۋىمەن وتكەن اۋەجايدى قايتا قۇرۋ بويىنشا جيىنعا قاتىستى.
بۇدان سوڭ دەلەگاتسيا مۇشەلەرى «وڭتۇستىك» كولىك-لوگيستيكالىق ورتالىعىنىڭ جۇمىسىمەن تانىستى. قازاقستاننىڭ ەۋرازيانىڭ كولىك-لوگيستيكالىق حابىنا اينالۋى بويىنشا مەملەكەتتىك «نۇرلى جول» باعدارلاماسى اياسىندا قۇرىلعان «وڭتۇستىك» كولىك-لوگيستيكالىق ورتالىقتىڭ اۋماعى 92 گەكتاردى قۇرايدى. قازىرگى تاڭدا اتالعان ايماقتا جەكەمەنشىك 8 ينۆەستيتسيالىق جوبا جۇزەگە اسىرىلىپ جاتىر.
لوگيستيكالىق ورتالىقتان كەيىن ا.مامين ورداباسى اۋدانىندا ورنالاسقان يندۋستريالاندىرۋ كارتاسىنا ەنگەن «اگرو V» كىرپىش زاۋىتىن ارالاپ كوردى. جوبا قۇنى 527 ملن تەڭگەنى قۇرايتىن زاۋىت جىلىنا 25 ميلليون كىرپىش شىعارادى.
ساپار بارىسىندا پرەمەر-ءمينيستردىڭ ءبىرىنشى ورىنباسارى شىمكەنت قالاسىنداعى «نۇرلى جەر» باعدارلاماسى اياسىندا سالىنىپ جاتقان كوپ قاباتتى تۇرعىن ۇيلەردىڭ قۇرىلىس جۇمىسىمەن تانىستى.
تۇرعىن ۇيگە مۇقتاجدىق جاعىنان وڭتۇستىك جۇرتى استانادان كەيىن ەكىنشى ورىندا دەلىنەدى. رەسمي مالىمەتكە سۇيەنسەك, شىمكەنتتەگى باسپانا كەزەگىندە تۇرعاندار سانى 54 مىڭنان اسادى. سوندىقتان بۇل ماسەلە كۇرمەۋلى كۇيىندە تۇر.
وسىندا وتكەن شاعىن جيىندا وبلىس اكىمى ج.تۇيمەباەۆ بيىل قارجىلاندىرۋدىڭ بارلىق كوزدەرى ارقىلى 279 تۇرعىن ءۇي قۇرىلىسى جۇرگىزىلىپ جاتقانىن, بۇگىندە 461,5 مىڭ شارشى مەتر تۇرعىن ءۇي پايدالانۋعا بەرىلگەنىن ايتتى.
«نۇرلى جەر» باعدارلاماسىنىڭ ورىندالۋ بارىسىن بايانداعان وبلىس اكىمىنىڭ ءبىرىنشى ورىنباسارى دارحان ساتىبالدى كرەديتتىك تۇرعىن ءۇي ساتىپ الۋعا مۇمكىندىگى جوق 35 مىڭ وتباسىن ارەندالىق باسپانامەن قامتۋ ءۇشىن وبلىس كولەمىندە 1 ميلليون 700 مىڭ شارشى مەتردەن استام تۇرعىن ءۇي قورىن قۇرۋ قاجەتتىگىن ايتتى.
بۇدان سوڭ ا.مامين باستاعان دەلەگاتسيا شىمكەنت – تاشكەنت باعىتىنداعى «باتىس ەۋروپا – باتىس قىتاي» حالىقارالىق ءدالىزىنىڭ قۇرىلىس جۇمىستارىمەن تانىستى. مۇندا 2017 جىلى ۇزىندىعى 99 شاقىرىمدى قۇرايتىن جول پايدالانۋعا بەرىلەدى. بۇگىندە جۇمىستار قىزۋ ءجۇرىپ جاتىر.
ساپار بارىسىندا پرەمەر-ءمينيستردىڭ ءبىرىنشى ورىنباسارى وڭتۇستىكتە اتقارىلىپ جاتقان جۇمىستارعا جاقسى باعا بەرىپ, ەلباسى تاپسىرمالارىنىڭ ۋاقىتىندا ورىندالۋىن وبلىس اكىمدىگىنە مىندەتتەدى.
باقتيار تايجان,
«ەگەمەن قازاقستان»
وڭتۇستىك قازاقستان وبلىسى
