جيىنعا جەتەكشىلىك ەتكەن الەۋمەتتىك-مادەني دامۋ كوميتەتىنىڭ توراعاسى گۇلميرا يكسانوۆا ماجىلىستەگى مۇنداي كەزدەسۋ قوعامنىڭ وزەكتى ماسەلەلەرىن شەشۋگە ۇلەسىن قوسقىسى كەلەتىن ءاربىر ادامنىڭ ءوز ۇسىنىستارىن جاساي الاتىن ءتيىمدى ديالوگ الاڭى ەكەنىن اتاپ ءوتتى.
ال وتىرىس اياسىندا ساراپشىلار بۇقارالىق اقپارات قۇرالدارىندا راديو حابارلار تاراتۋ, اقپارات, بايلانىس, اقپاراتتىق قاۋىپسىزدىك سالاسىنداعى زاڭنامانى جەتىلدىرۋدىڭ نەگىزگى باعىتتارى بويىنشا پىكىر الماسىپ, حالىقارالىق ساراپشىلاردىڭ ۇسىنىمدارىن تالقىلادى.
سونىمەن قاتار قاتىسۋشىلار ءسوز بوستاندىعى مەن اقپارات تاراتۋ سالاسىنداعى حالىقارالىق تالاپتارعا, سونداي-اق راتيفيكاتسيالانعان حالىقارالىق شارتتار بويىنشا قازاقستان رەسپۋبليكاسىنىڭ حالىقارالىق مىندەتتەمەلەرىنە سايكەس زاڭ جوبالارى بويىنشا ۇسىنىس, پىكىرلەرىن ءبىلدىردى.
جالپى قازىرگى زاماناۋي قوعامدا بۇقارالىق اقپارات قۇرالدارىنىڭ ءرولى وتە كۇردەلى ءارى اسا ماڭىزدى ەكەنى ءسوزسىز. وسىعان بايلانىستى وتىرىستا باق جۇمىسىنىڭ نەگىزگى قاعيداتتارىن شوعىرلاندىرۋ ارقىلى اتالعان سالاداعى زاڭنامالىق قۇقىق قولدانۋ تاجىريبەسىن دامىتۋدىڭ ىرگەلى نەگىزدەرىن قالىپتاستىرۋ تەتىكتەرى ايتىلدى.
القالى جيىنعا پارلامەنت ءماجىلىسىنىڭ دەپۋتاتتارى مەن اتالعان زاڭ جوباسى بويىنشا جۇمىس توبىنىڭ مۇشەلەرى, اقپارات جانە كوممۋنيكاتسيالار مينيسترلىگىنىڭ, مۇددەلى مەملەكەتتىك ورگانداردىڭ وكىلدەرى مەن استاناداعى ەقىۇ باعدارلامالار كەڭسەسىنىڭ جانە بۇۇ ادام قۇقىقتارى جونىندەگى جوعارعى كوميسسارىنىڭ باسقارماسى, يۋنيسەف بالالار قورى سياقتى حالىقارالىق ۇيىمداردىڭ وكىلدەرى قاتىستى.
نۇرلىبەك دوسىباي,
«ەگەمەن قازاقستان»
