الدىن الا مالىمەتتەرگە قاراعاندا, قارا ءتۇستى كيىم كيگەن, قولىندا ۆينتوۆكاسى بار كۇدىكتى جەرگىلىكتى ۋاقىت بويىنشا ساعات 11.30-دا سازەرلەند-سپرينگس قالاسىنداعى شىركەۋ عيماراتىنا كىرىپ, وق جاۋدىرعان. بۇل ۋاقىتتا جەكسەنبىلىك قۇلشىلىق ءجۇرىپ جاتقان. پوليتسيانىڭ حابارلاۋىنشا, ازىرگە قايتىس بولعانداردىڭ 5-72 جاس ارالىعىندا ەكەنى انىقتالدى.
رەسمي ورگاندار كۇدىكتىنىڭ ەسىمىن اتاماعانىمەن, امەريكالىق بۇقارالىق اقپارات قۇرالدارى وق جاۋدىرعان ادام اقش اسكەري-اۋە كۇشتەرىنەن شىعارىلعان دەۆين پاتريك كەللي بولۋى مۇمكىن دەپ جازىپ جاتىر.
ۋيلسون وكرۋگىنىڭ پوليتسيا كوميسسارى البەرت-گەيمزدىڭ ايتۋىنشا, كۇدىكتى وقيعا ورنىنان كولىكپەن كەتىپ قالعاننان كەيىن ءولى تابىلعان. پوليتسيا كۇدىكتىنى تۇرعىنداردىڭ ءبىرى ولتىرگەنىن ايتتى. وقيعا ورنىندا پوليتسيا جۇمىس ىستەپ جاتىر. كۇدىكتىنىڭ نە سەبەپتى مۇنداي ارەكەتكە بارعانى ءالى بەلگىسىز.
سازەرلەند-سپرينگس - سان-انتونيو قالاسىنىڭ وڭتۇستىك-شىعىسىنداعى 400 تۇرعىنى بار قالا.
اقش پرەزيدەنتى دونالد ترامپ تۋيتتەردەگى پاراقشاسىندا: "تەحاستاعى سازەرلەند-سپرينگس قالاسىنداعى ادامدارعا قۇداي جار بولسىن. قۇقىق قورعاۋ ورگاندارى مەن فەدەرالدىق تەرگەۋ بيۋروسى وقيعا ورنىندا جۇمىس ىستەپ جاتىر. مەن وقيعانى جاپونيادان باقىلاپ وتىرامىن", دەپ جازدى.
تەحاستاعى بۇل وقيعا لاس-ۆەگاستاعى 59 ادام قازا تاپقان اتىستان كەيىن بىر اي وتكەن سوڭ بولىپ وتىر. سونداي-اق 31 قازان كۇنى نيۋ-يوركتە شاعىن جۇك كولىگى ادامداردى قاعىپ ءوتىپ, 8 ادامدى ولتىرگەن بولاتىن.
دايىنداعان گۇلنۇر قۋانىشبەكقىزى,
"ەگەمەن قازاقستان"
