تۋرلارعا الماتى, اقمولا, جامبىل, قاراعاندى, پاۆلودار جانە وڭتۇستىك قازاقستان وبلىستارىنىڭ 13 جانە 17 جاس ارالىعىنداعى 480 ۇزدىك وقۋشىسى قاتىسادى.
وسىلايشا اقمولا, قاراعاندى جانە پاۆلودار وبلىستارىنىڭ وقۋشىلارى استاناعا كەلسە, الماتى, جامبىل جانە وڭتۇستىك قازاقستان وبلىستارىنىڭ ۇزدىك وقۋشىلارى الماتى قالاسى مەن ۇشقوڭىرعا بارادى.
استانادا وقۋشىلارعا قازاقستان رەسپۋبليكاسى تۇڭعىش پرەزيدەنتى – ەلباسىنىڭ مۇراجايى, قورى مەن كىتاپحاناسى, بەيبىتشىلىك پەن كەلىسىم سارايى, «استانا-بايتەرەك» مونۋمەنتى جانە نازارباەۆ ۋنيۆەرسيتەتى تانىستىرىلادى.
الماتىلىق تۋردىڭ باعدارلاماسى بويىنشا الماتى وبلىسىنداعى ەلباسى وقىعان قاراساي باتىر اتىنداعى مەكتەپ, قازاقستان رەسپۋبليكاسى تۇڭعىش پرەزيدەنتىنىڭ ءۇي-مۇراجايى, «باتىر بابالار» مەموريالدى كەشەنى, سونداي-اق الماتى قالاسىنداعى ورتالىق مەملەكەتتىك مۇراجاي, 28 پانفيلوۆشىلاردىڭ ساياباعى سياقتى وبەكتىلەرگە بارۋ جوسپارلانعان.
قازاقستان رەسپۋبليكاسىنىڭ تۇڭعىش پرەزيدەنتى – ەلباسى قورى اتقارۋشى ديرەكتورىنىڭ كەڭەسشىسى ءاليا قايشاروۆانىڭ ايتۋىنشا, وسىنداي تۋرلاردى وتكىزۋ مەكتەپ وقۋشىلارىنىڭ وي-ءورىسىن كەڭەيتىپ, قىزىعۋشىلىعىن ارتتىرادى ءارى بالالاردى جاقسى وقىپ, بەلسەندى بولۋعا قوسىمشا ىنتالاندىراتىن بولادى.
«نازارباەۆ ورتالىعىندا» وقۋشىلاردىڭ ءبىرىنشى توبىمەن كەزدەسۋ بارىسىندا «Kazakh Tourism» ۇلتتىق كومپانياسى» اق باسقارما توراعاسىنىڭ ورىنباسارى قايرات سادۋاقاسوۆ وسىنداي تۋرلاردىڭ بالالار مەن جاسوسپىرىمدەر ءتۋريزمىن جانداندىرۋعا, سونداي-اق ەلىمىزدىڭ جاس ۇرپاعىن پاتريوتتىق تاربيەلەۋىنە زور اسەر ەتەتىنىن اتاپ ءوتتى. «بالالار مەن جاسوسپىرىمدەر تۋرلارى جاس ۇرپاقتىڭ پاتريوتتىق رۋحىن قالىپتاستىرۋدا ماڭىزدى ءرول اتقارا وتىرىپ, ەلىمىزدەگى ىشكى ءتۋريزمدى دامىتۋعا اسەر ەتەدى», دەدى ول.
سونداي-اق ق.سادۋاقاسوۆ ەكسپو-2017 كورمەسى كەزىندە ەلىمىزدىڭ وڭىرلەرىنەن كەلگەن 185 مىڭ وقۋشى ءۇشىن 700-دەن استام تۋر ۇيىمداستىرىلعانىن ەسكە سالدى.
«ەگەمەن-اقپارات»
