بەلگىلى قوعام قايراتكەرلەرى, ۇلت زيالىلارى, عالىم-تۇركولوگتار مەن ىزدەنۋشىلەر قاتىسقان القالى شارانى اكادەميا باسشىسى دارحان قىدىرالى اشىپ بەردى.
تۇركى جۇرتىنىڭ تەگەۋرىندى تۇلعاسى ءا. ءيبراھيمنىڭ تۋعانىنا 160 جىل تولۋىنا ورايلاستىرىپ وتىرعان شارادا جاپونيانىڭ بەلگىلى عالىمى, بىلىكتى تۇركىتانۋشى حاسيو كوماتسۋ تۇرىك تىلىندە ءدارىس وقىدى.
تارا قالاسىندا تۋىپ, ورتا مەكتەپتى اياقتاعاننان كەيىن قازاقستاننىڭ مەدرەسەلەرىندە, ءمادينا قالاسىندا ءبىلىم العان ءابدىراشيت يبراھيم تۇركيادا, رەسەيدە, جاپونيادا يسلام ءىلىمىن كەڭىنەن ناسيحاتتاعان. ءوز ومىرىندە بىرنەشە رەت جاپونياعا كەلگەن عالىم 1938 جىلى كۇنشىعىس ەلىنە قايتا ورالىپ, ءومىرىنىڭ سوڭىنا دەيىن سوندا تۇرعان. جاپون ۇكىمەتىنىڭ رەسمي يسلام ۇيىمىنىڭ وكىلى جانە توكيو مەشىتىنىڭ يمامى بولىپ قىزمەت ىستەگەن. ءابدىراشيت ءيبراھيمنىڭ ءومىر جولىن كەڭىنەن ايتىپ بەرگەن, اكادەميانىڭ شاقىرۋىمەن كۇنشىعىس ەلىنەن ارنايى كەلگەن كوماتسۋ مىرزا قاتىسۋشىلاردى قىزىقتىرعان سۇراقتارعا دا جاۋاپ بەردى.
سەمينار سوڭىندا دارحان قىدىرالى جاپون عالىمىنا مازمۇندى بايانداماسى ءۇشىن العىس ايتىپ, «تۇركولوگيانى زەرتتەۋگە قوسقان ۇلەسى ءۇشىن» تۇركى اكادەمياسىنىڭ قۇرمەت گراموتاسىن تابىس ەتتى.
«تۇركى الەمىنە ەڭبەگى سىڭگەن قايراتكەر تۇلعالاردىڭ عۇمىرىنان تاعىلىم الۋ ءۇشىن بۇنداي سەمينارلاردى جۇيەلى تۇردە جۇرگىزىپ وتىرامىز. تاريحقا كوز سالىپ, تۇركى دۇنيەسىنىڭ تۇلعالارىن زەرتتەگەندە ءبىز باۋىرلاس حالىقتاردىڭ بىرلىگىن كورەمىز. الەمنىڭ قاي تارابىندا جۇرسە دە تۇركى جۇرتىنىڭ كوركەيۋىن كوكسەگەن تۇلعالار تاعىلىمى بۇگىن بىزگە – ۇلگى, ونەگە. ءبىز بابالار سالعان داڭعىل جولدى جالعاستىرۋعا مىندەتتىمىز», دەدى دارحان قىدىرالى.
ايتا كەتۋ كەرەك, ەلدىڭ التىن دىڭگەگى بولعان جانە تۇركى دۇنيەسىنىڭ ماقتانىشتارىنا اينالعان زيالىلاردى دارىپتەۋ ماقساتىندا «تۇركى الەمىندە تۇلعالار تاعىلىمى» تاقىرىبىندا سەمينارلار سەرياسىن اكادەميا ەلباسىنىڭ «بولاشاققا باعدار: رۋحاني جاڭعىرۋ» اتتى باعدارلامالىق ماقالاسى اياسىندا جۇزەگە اسىرىپ وتىرماق.
باعاشار تۇرسىنباي ۇلى,
"ەگەمەن قازاقستان"
سۋرەتتەردى تۇسىرگەن ەرلان وماروۆ
