سونىمەن قاتار, كلۋب مۇشەلەرىنىڭ قاتارىندا نايزا لاقتىرۋدان قازاقستاننىڭ جاس كوشباسشىلارى ارتۋر گافنەر مەن ۆارۆارا نازاروۆا دا بار. كەنيالىق ءتورت كروسسمەر - كارولين چيپكويچ كيپكيرۋي, دەيزي دجيپكەمەي, شەدراك كيمۋتاي كويچ جانە تانۋي نورا دجيرۋتو التايلىق اتلەتشىلەر ساپىنان تابىلدى.
ايتا كەتۋ كەرەك, كلۋب ايماق باسشىسى دانيال احمەتوۆتىڭ تاپسىرماسى بويىنشا بيىل جازدا قۇرىلعان. وسى ۋاقىت ىشىندە اتلەتتەر الەمنىڭ بەدەلدى جارىستارىنا قاتىسىپ, جۇلدەلى ورىندارمەن قانجىعالارىن مايلاپ ۇلگەردى. ماسەلەن, 5 000 مەتر قاشىقتىقتا كارولين كيپكيرۋي قىركۇيەكتە وتكەن «گاۋھار ليگا-2017» دوداسىنىڭ كۇمىس مەدالىن يەلەنسە, 22 جاستاعى نورا دجيرۋتو ISTAF بەرلين كلاسسيكالىق تۋرنيرىندە كەدەرگىلەر ارقىلى 3 000 مەترگە جۇگىرىپ, 3-ورىن الدى.
«وسى مىقتى سپورتشىلار سالعان جولدى بولاشاق ۇرپاق جالعاسا دەيمىز. جاڭا كلۋب الدىندا زور مىندەتتەر تۇر. ەڭ ءبىرىنشى, جەڭىل اتلەتيكادان ۇلتتىق قۇرامانى قالىپتاستىرۋداعى نەگىزگى دىڭگەك بولادى. بولاشاق جەڭىمپازداردى دايىندايمىز. «ALTAY» برەندىن قالىپتاستىرىپ, ونى بۇكىل الەمگە پاش ەتەمىز. وعان سەنىمىمىز زور», - دەدى دانيال احمەتوۆ.
ەڭ باستىسى – شقو كلۋبىنىڭ نەگىزىندە جەڭىل اتلەتيكادان «ALTAY KIDS ATHLETICS» بالالار اكادەمياسى قۇرىلادى. وعان 2020 جىلعا دەيىن 5000 تارتا بالا مەن ءجاسوسپىرىمدى تارتۋ جوسپارلانىپ وتىر. «ALTAY ATHLETICS» كاسىبي جەڭىل اتلەتيكا كلۋبى 94 جىلدىق تاريحى بار, ەۋروپالىق LC Zurich جەتەكشى كلۋبىنىڭ ۇلگىسىندە جاسالدى. ال مەنەدجەر مىندەتى 30 جىلدان استام ۋاقىت بويى ۇزدىك حالىقارالىق سپورت ۇيىمدارىندا قىزمەت ەتكەن گۆيدو تونونيعا تاپسىرىلدى.
ازامات قاسىم,
"ەگەمەن قازاقستان"
وسكەمەن
