استانا قالاسى مادەنيەت, مۇراعاتتار جانە قۇجاتتاما باسقارماسى باسشىسىنىڭ ورىنباسارى ناريما مۇحامبەتالينانىڭ ايتۋىنا قاراعاندا بايقاۋعا قاتىسۋعا 515 ادام ءوتىنىش بەرگەن. ەلىمىزدىڭ بۇكىل وڭىرلەرىنەن جانە وزبەكستان, رەسەي, باشقۇرتستان, لاتۆيا, ارمەنيا سياقتى ەلدەردەن كەلگەن جاس قاتىسۋشىلار جىلداعىداي ەلوردانىڭ بەلگىلى مادەني وشاقتارىندا ونەر كورسەتىپ, باق سىنايدى.
ۇيىمداستىرۋ كوميتەتىنىڭ شەشىمىمەن دارىندى جاستار وسى جولى التى اتالىم بويىنشا شەبەرلىك بايقاسادى. قاتىسۋشىلار «كلاسسيكالىق مۋزىكا», «بەينەلەۋ ونەرى», «حالىق مۋزىكاسى», «تسيرك ونەرى», «اكتەرلىك شەبەرلىك» جانە «ۇزدىك ادەبي شىعارما» اتالىمدارى بويىنشا ونەر جارىسىنا تۇسەدى. ن.مۇحامبەتالينا وسى جولعى ەرەكشەلىك رەتىندە «اكتەرلىك شەبەرلىك» اتالىمىنىڭ قوسىلعانىن جانە «ۇزدىك ادەبي شىعارما» اتالىمىنىڭ بالالار ادەبيەتىنە ارنالعانىن اتاپ ءوتتى.
«ۇزدىك ادەبي شىعارما» اتالىمى بويىنشا قازىلار القاسىنىڭ توراعاسى اقىن نەسىپبەك ايت ۇلى بالالارعا ارنالعان 40-تان اسا شىعارما تۇسكەنىن مالىمدەدى. ونىڭ ىشىندە اڭگىمەلەر, ەرتەگىلەر جانە شاعىن اڭگىمەلەر دە بار. ء«بىز جيىرما شىعارمانى تاڭداپ الدىق. سونىڭ التاۋىنا بايگە بەرىلەدى. بەردىبەك سوقپاقباەۆ اتىنداعى جانە مادەنيەت باسقارماسىنىڭ دا ارنايى اتاۋلى بايگەسى بار»-دەگەن ن.ايت ۇلى قازىلار القاسىندا قۋانىش جيەنباي, روزا مۇقانوۆا, ءمادي ايىمبەتوۆ جانە تولىمبەك ءابدىرايىم سىندى تانىمال پروزايكتەر بار ەكەنىن حابارلادى.
ال, «حالىق مۋزىكاسى» اتالىمى بويىنشا قازىلار القاسىنىڭ اتىنان ءسوز العان استانا قالاسى مەملەكەتتىك اكادەميالىق فيلارمونياسىنىڭ ديرەكتورى ساكەن ءابدىراحمانوۆ قاتىسۋشىلارعا بۇل جولى قاتاڭ تالاپتار قويىلاتىنىن ايتتى. بۇرىن ءداستۇرلى ورىنداۋشىلار جەتىسۋ, ارقا, سىر, باتىس مەكتەپتەرى بويىنشا ارقايسىسى ءوزى كەلگەن ءوڭىردىڭ ءان-تەرمەسىن ورىنداعان بولسا, ەندى تۋرا ەمتيحانداعىداي قاعاز سۋىرىپ, سوندا كورسەتىلگەن ءان-تەرمەلەردى ورىنداماق. انىعىراق ايتقاندا, قاتىسۋشىلار بۇرىنعىداي ەكى-ءۇش ءان-تەرمەگە عانا دايىندالىپ كەلمەۋى كەرەك. ءان-جىر ونەرىندەگى بارلىق مەكتەپتىڭ ونەرپازدارىنىڭ شىعارماشىلىعىنان حاباردار بولۋى شارت.
ءدال وسىنداي قاتاڭ تالاپ «تسيرك ونەرى» اتالىمىنا دا قويىلىپ وتىر. وسى اتالىم بويىنشا قازىلار القاسىنىڭ مۇشەسى ۆلاديسلاۆ ۆەرنادسكي 46 قاتىسۋشىنىڭ تاڭداپ الىنعانىن ايتتى. «قاتىسۋعا ءوتىنىم بەرگەندەر كوپ بولدى. ءبىز وتە مىقتى نومىرلەردى عانا تاڭداپ الدىق. كاسىبي ونەرپازدار دا, اۋەسقويلار دا بار. بىراق, تالاپ بارىنە بىردەي»-دەدى ول.
ايتا كەتەيىك, «شابىت» شىعارماشىل جاستار فەستيۆالىنىڭ اشىلۋى بۇگىن كەشكى 19.00-دە ەلورداداعى «استانا» كونتسەرت زالىندا وتەدى.
ايگۇل سەيىل,
«ەگەمەن قازاقستان»
سۋرەتتەردى تۇسىرگەن ورىنباي بالمۇرات
