ۇندىستاندىق كومپانيانىڭ ديرەكتورى گوۋدحاما بۋدحار ءرامامۋرتيدىڭ ايتۋىنشا, ولار مەملەكەت-جەكەمەنشىك ارىپتەستىگى اياسىندا شىعىس قازاقستانداعى بىرنەشە نىساننىڭ قۇرىلىس جۇمىستارىن جۇرگىزۋگە ىنتالى. ونىڭ ىشىندە اتاپ ايتقاندا, وسكەمەن قالاسىنداعى ەرتىس وزەنى ارقىلى وتەتىن (ۆينوگرادوۆ كوشەسى مەن وسكەمەن-تاۆريا تاس جولىن جالعايتىن) كوپىر, وبلىس ورتالىعىنداعى 300 ورىندىق كوپ سالالى اۋرۋحانا مەن سەمەي قالاسىنداعى 200 ورىنعا شاقتالعان اۋرۋحانانىڭ جانە دە جوعارىدا ايتىلعان بۇقتىرما كوپىرىنىڭ قۇرىلىستارى دا بار. بۇل ماقساتقا ءۇندىستاننىڭ «Exim Bank» اتتى قارجى ۇيىمىنىڭ قاراجاتى جۇمسالماق.
«جالپى, «Shapoorji Pallonji» (شاپۋردجي پاللوندجي) كومپانياسىنىڭ 150 جىلدىق تاريحى بار جانە وسى ۋاقىت ىشىندە ءبىزدىڭ كومپانياعا قاتىستى بىردە-ءبىر داۋ-داماي بولماعان. بۇگىنگە دەيىن ءبىزدىڭ قۇرىلىسشىلار الەمنىڭ 60-تان استام ەلىندەگى اۋقىمدى جوبالاردى جۇزەگە اسىرۋعا قاتىسقان. ەندى سىزدەردىڭ مەملەكەتتەرىڭىزبەن, شىعىس قازاقستان وبلىسىمەن ارىپتەس بولۋعا مۇددەلىمىز», دەيدى شەتەلدىك الپاۋىت كومپانيانىڭ ەلىمىزدەگى رەسمي وكىلى گوۋدحاما بۋدحار رامامۋرتي.
كەزدەسۋ بارىسىندا ول ايماق باسشىسىنا ءۇندىستان, ساۋد ارابياسى, بىرىككەن اراب امىرلىكتەرى, شري-لانكا سياقتى ەلدەردەگى ءساتتى جۇزەگە اسىرعان جوبالارىمەن تانىستىردى. «بۇگىندە كەيبىر جوبانىڭ تەحنيكالىق-ەكونوميكالىق نەگىزدەمەسى مەن جوبالاۋ-سمەتالىق قۇجاتتاماسى ءازىر. ياعني قۇرىلىس جۇرگىزۋگە ەش كەدەرگى جوق. ەگەر كومپانيالارىڭىز بۇل جوبالارعا قاتىسۋعا شىن مانىندە دايىن بولسا, وندا سىزدەرگە ءوز تاراپىمىزدان قولدان كەلگەن كومەكتى كورسەتەتىن بولامىز», دەدى ءوز كەزەگىندە وبلىس اكىمى د.احمەتوۆ.
كەلىسسوزدەر سوڭىندا وبلىس اكىمدىگى مەن «Shapoorji Pallonji Kazakhstan» كومپانياسى اراسىندا ءوزارا ىنتىماقتاستىق تۋرالى مەموراندۋمعا قول قويىلدى.
ازامات قاسىم,
«ەگەمەن قازاقستان»
شىعىس قازاقستان وبلىسى
