سوڭعى ستاتيستيكالىق مالىمەتتەرگە سايكەس, بيىلعى قاڭتار ايىنان بەرى استانادا 705 نىسان پاسپورتتالسا, ولاردىڭ 474-ءى مۇگەدەكتەر ءۇشىن بەيىمدەلگەن. اتالمىش نىساندار دەنساۋلىق ساقتاۋ, سپورت, مادەنيەت, ءبىلىم بەرۋ مەكەمەلەرىنە جاتادى. ولاردىڭ ىشىندە شاعىن ءجان ورتا بيزنەس نىساندارى دا بار.
بۇدان باسقا, كوپتەگەن كاسىپكەرلەر جەرگىلىكتى بيلىك وكىلدەرىمەن, پروكۋراتۋرا ورگاندارىمەن بىرلەسىپ, مۇگەدەكتەر ءۇشىن شەكتەۋسىز الاڭ قۇرۋ ىسىنە اتسالىسىپ جاتىر. سونىمەن قاتار 2017 جىلدىڭ باسىنان باستاپ قازاقستاننىڭ باس قالاسىندا 282 پاندۋس ورناتىلدى. مۇمكىندىگى شەكتەۋلى ازاماتتاردىڭ ىڭعايلىلىعى ءۇشىن ا. احماتوۆا, ب. بەيسەكباەۆ, س. سەيفۋللين جانە وقجەتپەس كوشەلەرىندە تاكتيلدى پليتالار توسەلدى. ەلوردانىڭ كولىكتىك كاسىپورىندارى دا مۇمكىندىگى شەكتەۋلى ازاماتتار ءۇشىن قولايلى ورتانى قالىپتاستىرۋ ىسىنە ءوز ۇلەسىن قوسۋدا.
بۇگىنگى كۇنى قالاداعى 1158 جولاۋشىلار كولىگىنىڭ 742-ءسى كەمتار جانداردىڭ كولىككە كىرىپ-شىعۋىنا ارنالعان قۇرىلعىمەن جاراقتالعان. تەحنيكانىڭ قالعان بىرلىكتەرى قايتا جاراقتاندىرۋدان وتۋگە جارامسىز, سول سەبەپتى ولار جاقىن ارادا پايدالانۋدان شىعارىلاتىن بولادى. ايتا كەتەيىك, مۇگەدەكتەردىڭ قۇقىقتارىن قورعاۋ مەن ولاردىڭ ءومىرىن جاقسارتۋعا باعىتتالعان مەملەكەتتىك باعدارلامانىڭ ماقساتى قامقورلىقتى قاجەت ەتەتىن ازاماتتار ءۇشىن شەكتەۋسىز ورتا قالىپتاستىرۋ بولىپ تابىلادى.
