– سىرت الاڭداعى ەۋروكۋبوكتىق ويىندا جەتكەن العاشقى جەڭىسىمىزگە قۋانىشتىمىن. وتكەن جىلعا قاراعاندا بيىل ۇلكەن جۇمىس اتقاردىق. ءبىر قادام العا جىلجىدىق. شىنىن ايتۋ كەرەك, بۇگىنگى ويىندا الاڭ يەلەرى مىقتىراق بولدى. كەي تۇستاردا جولىمىز بولعانى دا جاسىرىن ەمەس. «ماككابي» جاقسى ويىن كورسەتىپ ءجۇر دەپ ويلايمىن. ال بۇگىن ءوز مۇمكىندىگىمىز بولاتىنىن ىشتەي سەزدىم. ءارى سول ءساتتى قارسى شابۋىل ارقىلى ۇتىمدى پايدالا بىلدىك.
– سىرت الاڭداعى ەۋروكۋبوكتىق ويىنداعى العاشقى جەڭىستەرىڭىزبەن قۇتتىقتايمىز! بۇگىنگى ماتچتىڭ باستى قاھارمانى نەناد ەريچ دەپ ايتۋعا بولا ما؟
– ناقتى ءبىر شاكىرتىمدى بولەكتەپ العاندى ۇناتپايمىن. بۇگىنگى ويىننىڭ باستى قاھارمانى دەپ بۇكىل شاكىرتىمدى اتار ەدىم. كومانداعا روتاتسيا جاساۋعا تىرىستىق. ەندى ويىنشىلارىم جەكسەنبى كۇنگى «اقجايىققا» قارسى ويىنعا دايىن بولعانىن قالار ەدىم. باستى ماقساتىمىز – ورالدىق ۇجىمدى جەڭۋ.
– ماتچتىڭ سوڭعى 20 مينۋتىندا دجۋنيور كابانانگا شارشاڭقىلاۋ كورىندى. ونى الماستىرۋ كەرەك پە ەدى؟!
– ونى الماستىرماعانىمنىڭ باستى سەبەبى – وزگە شابۋىلشىم بولمادى. دەسپوتوۆيچ ءالى دايىن ەمەس ەدى. بۇدان بولەك قاپتال ويىنشىلارىنان دا قيىندىقتارىمىز بولدى.
– بۇگىنگى جەڭىستى سەنساتسيا دەپ ەسەپتەيسىز بە؟
– مەن كەشە عانا جەڭىسكە جەتەر بولساق, سەنساتسيا بولىپ ەسەپتەلمەيتىنىن ايتقان ەدىم. ال ماتچتىڭ ءفاۆوريتى «ماككابي» بولدى دەپ ەسەپتەيمىن.
– ورتالىق قورعانىستا العاش رەت يگور شيتوۆ, ەۆگەني پوستنيكوۆ جانە سەرگەي مالىي جاۋاپتى بولدى. وسىعان دەيىن ولار بىرگە شىعىپ كورمەگەن ەدى. ءسىز وسى جاعىنان قاۋىپتەنبەدىڭىز بە؟ بۇگىنگى ناتيجەدەن كەيىن «استانانىڭ» پلەي-وففقا شىعۋ مۇمكىندىگىن قالاي باعالايسىز؟
– شىنىن ايتايىن, ەشنارسەدەن قاۋىپتەنبەدىم. ىلعي دا شاكىرتتەرىمە سەنىم ارتامىن. اسىرەسە, وسىنداي ماڭىزدى ساتتەردە. بۇگىنگى جەڭىسىمىز بۇكىل قازاقستان فۋتبولىنا ارنالادى. ءبىز ءالى دە ءوزىمىزدى دامىتا ءتۇسۋىمىز كەرەك. وسى جاعىنان قازىر ءتيىستى جۇمىستار اتقارىپ ءجۇرمىز. ەگەر 10 ۇپاي يەلەنسەك, توپتان شىعامىز دەپ ويلايمىن. ەندى «ۆيلياررەالدى» نەمەسە «سلاۆيانى» جەڭۋىمىز كەرەك. توپتان شىقساق بۇل ءبىزدىڭ دامىعانىمىزدىڭ ءبىر بەلگىسى.
الماس ماناپ,
«ەگەمەن قازاقستان» – نەتانيادان (يزرايل)
