اۋەجايدان بىردەن تەل-اۆيۆ ماڭىنداعى شاعىن كۋرورتتى نەتانيا قالاسىنداعى «Herods Herzliya» قوناقۇيىن بەتكە الدى. نەگە نەتانيا قالاسى دەيسىز عوي؟ ونىڭ سەبەبى بار. بۇگىندە تەل-اۆيۆتەگى «بلۋمفيلد» ستاديونى كۇردەلى جوندەۋدەن وتۋدە. سوعان بايلانىستى «ماككابي» ۇيدەگى ويىندارىن نەتانيانىڭ ورتالىق ستاديونىندا وتكىزۋگە ءماجبۇر.
كەشە «ماككابي» مەن «استانا» كوماندالارى اشىق جاتتىعۋ جيىنىن وتكىزدى. ارتىنشا باس جاتتىقتىرۋشىلار ءباسپاسوز ءماسليحاتىندا جۋرناليستەردىڭ سۇراقتارىنا جاۋاپ بەردى.
الدىمەن ءسوز العان «ماككابي» كومانداسىنىڭ باس جاتتىقتىرۋشىسى يوردي كرويف: «مەنىڭ كوماندام ەرتەڭگى ويىنعا دايىن. ءبىز قازاقستاندا دەڭگەيىمىزدى تولىقتاي كورسەتە المادىق. بىراق ەرتەڭ كەزدەسۋ باسقاشا جاعدايدا ءوربيدى. كەتكەن ەسەنى قايتارۋعا مۇمكىندىگىمىز تولىق جەتەدى», دەدى ول.
«ەكى اپتا بۇرىن عانا «استانادان» 4:0 ەسەبىمەن جەڭىلگەن كوماندا از ۋاقىت ىشىندە ءوز قاتە-كەمشىلىكتەرىن تۇزەپ, جەڭىسكە جەتە الا ما؟» دەگەن ساۋالعا گوللاندىق ماماننىڭ بەرگەن جاۋابى مىناداي بولدى: «كەز كەلگەن كوماندا ءۇشىن ءوز جانكۇيەرلەرىنىڭ الدىندا ونەر كورسەتكەن الدەقايدا جەڭىل.
قازاقستاندا وتكەن ويىندا «استانا» شابۋىلشىلارى قورعاۋشىلارىمىزدى ابدەن ابىگەرگە ءتۇسىردى. بىراق, ەرتەڭ ونداي پروبلەما بولمايتىنىنا سەنىمدىمىن. ويتكەنى, كەتكەن كەمشىلىك وسى جولى قايتالانباس ءۇشىن جۇمىس جاسادىق. ەرتەڭ – سونىڭ جەمىسىن كورەتىن كەز».
وسىدان كەيىن «استانا» كومانداسىنىڭ باس جاتتىقتىرۋشىسى ستانيمير ستويلوۆ جۋرناليستەر ساۋالىنا جاۋاپ بەردى. – ەرتەڭ ءبىز ءۇشىن ەڭ قيىن ويىنداردىڭ ءبىرى بولماق. سەبەبى ماككابيلىكتەر استانادا كەتكەن ەسەنى قايتكەندە دە قايتارۋعا بىلەك سىبانا كىرىسەتىنى بەلگىلى, دەپ باستادى ءوز ءسوزىن بولگار مامانى. – ونىڭ ۇستىنە, «ماككابي» ءوز الاڭىندا ەسە جىبەرمەيتىن كوماندا. ايتكەنمەن, ءبىزدىڭ جىگىتتەر پلەي-وفف كەزەڭىنە شىعۋ ءۇشىن ەرتەڭ جەڭىسكە جەتۋ كەرەكتىگىن جاقسى بىلەدى. سوندىقتان ءبىز دە شايقاسقا دايىنبىز, – دەدى ستويلوۆ.
جاراقاتىنا بايلانىستى ويىنعا قاتىسا المايتىن فۋتبولشىلار بار ەكەنىن ايتقان س.ستويلوۆ الداعى جوسپارلارىمەن دە ءبولىستى. ء«بىز ءبىرىنشى كەزەكتە قازاقستان چەمپيوناتىن جەڭىپ الۋىمىز كەرەك. سودان كەيىنگى ماقساتىمىز – ەۋروپا ليگاسىنىڭ توپتىق كەزەڭىنەن شىعۋ. ەكى باعىتتا ونەر كورسەتىپ جاتقاندىقتان, جاسىل الاڭدا ءۇش كۇن سايىن ايقاسۋعا تۋرا كەلىپ تۇر. بۇل جىگىتتەرگە اۋىر تيۋدە. نەگىزگى قورعاۋشىمىز يۋري لوگۆينەنكو ماۋسىم سوڭىنا دەيىن بىزگە كومەكتەسە المايدى. وزىمىزگە جەڭىل بولۋ ءۇشىن «قايراتتان» باسىم ءتۇسىپ چەمپيون اتانۋ كەرەك ەدى. الايدا, سول كۇنى الماتىلىقتاردىڭ جولى بولدى. ەندى جەكسەنبىدە «اقجايىقپەن» وتەتىن ماتچتا دا بارىمىزدى سالىپ وينايمىز. بىراق, ول ەكىنشى ماسەلە. ءبىرىنشى كەزەكتە ەرتەڭگى قيىن ءارى جاۋاپتى كەزدەسۋدە قالاي دا جەڭىسكە جەتۋىمىز كەرەك», دەپ وي ءتۇيدى س.ستويلوۆ.
ەستەرىڭىزگە سالا كەتەيىك, «استانا» كومانداسى ۋەفا ەۋروپا ليگاسىنىڭ «ا» توبىندا 4 ۇپايمەن ءۇشىنشى ورىندا كەلەدى. ءبىرىنشى, ەكىنشى ورىنداردى 5 ۇپايدان ەنشىلەگەن «سلاۆيا پراگا» مەن «ۆيليارەال» كوماندالارى ءبولىسىپ تۇر.
الماس ماناپ,
«ەگەمەن قازاقستان» –
نەتانيادان (يزرايل)
