جاڭاوزەندە جانعان جۇلدىزدار

جاڭاوزەن – مۇنايشىلار ورداسى. جىل ساناپ كوركەيىپ, كورىكتەنىپ كەلە جاتقان قۇتتى مەكەن. قالانىڭ العاشقى تۇرعىن­دارىنىڭ ءبىرى رەتىندە وسىنداعى ءاربىر جاڭالىق, وڭ وزگەرىستەرگە كوڭىل مارقايىپ, ماساتتانىپ قالامىز. ولاي دەيتىنىم, وتكەن جىلى عانا قالامىزدا ايماقتا تەڭدەسى جوق سپورتتىق ساۋىقتىرۋ كەشەنى, ءتورت بالاباقشا, ءبىر اۋرۋحانا, ءتورت 50 پاتەرلى تۇرعىن ءۇي پايدالانۋعا تاپسىرىلدى. بۇل كۇندەرى ءبىر ورتا مەكتەپ پەن پەرزەنتحانا قۇرىلىسى ءجۇرىپ جاتىر. ەلباسى نۇرسۇلتان نازارباەۆتىڭ تاپسىرماسىنا وراي ۇكىمەت 2009-2012 جىلدارعا ارنالعان كەشەندى جوسپار قابىلداپ, ونى جۇزەگە اسىرۋعا 42,9 ملرد. تەڭگە بولىنگەن. ال جاقىندا وبلىس باسشىسى قىرىمبەك كوشەرباەۆتىڭ توراعا­لىعىمەن تاعى دا جاڭاوزەن قالاسىنىڭ ەكو­نوميكالىق دامۋىنىڭ 2012-2020 جىلدارعا ارنالعان ۇزاق مەرزىمدى باعدارلاماسى جوباسىنىڭ تانىستىرىلىمى ءوتتى. وندا ەلباسىنىڭ ۇكىمەتكە, اكىمدىكتەرمەن بىرىگىپ ايماقتاردى دامىتۋ بويىنشا باعدارلا­مالار ازىرلەۋ جونىندەگى تاپسىرماسىنا وراي «وليمپەكس ەدۆايزەرس» كونسالتينگتىك  توبى مۇمكىندىكتەرگە ساي جۇزەگە اسۋداعى ينۆەستيتسيالىق جوبالاردى ەسكەرە وتىرىپ قالانىڭ 2020 جىلعا دەيىنگى ەكونوميكالىق دامۋىنىڭ ۇزاق مەرزىمدى باعدارلاماسى جاساقتالعانى بەلگىلى بولدى. ول باعدارلاما بويىنشا جاڭاوزەن مۇنايشىلار قالاسى عانا ەمەس ترانزيتتىك كولىكتىك-لوگيستيكالىق ورتالىق رەتىندە دە داميدى. «سولتۇستىك –وڭتۇستىك» حالىقارالىق دالىزىندە سترا­تەگيالىق رەتتەۋشى ورتالىق رەتىندە قازاقستان, رەسەي, سونداي-اق تۇركىمەنستان, يران, پارسى شىعاناعى, وڭتۇستىك-شىعىس ازيا ەلدەرىنە قىزمەت كورسەتەدى. سەبەبى جاڭاوزەن – تۇركىمەنستان تەمىر جولىنا قوسا, «جاڭاوزەن – سايوتەس» تەمىر جولى, «جاڭاوزەن – قۇرىق» اۆتوجولىن كەدەندىك رەسىمدەۋ ورتالىعى كىرەتىن كولىكتىك-لوگيس­تيكالىق ورتالىق سالۋ كوزدەلۋدە. جانە اتالمىش باعدارلاما اياسىندا جاڭاوزەندە ورنالاساتىن «كاسپي» ارنايى ەكونوميكا­لىق ايماعى قۇرىلماقشى. بۇل باعدارلاما بويىنشا قالانىڭ الەۋمەتتىك جانە ينجەنەرلىك ينفراقۇرىلىمدارىنىڭ ودان ءارى دامۋىنا, قالا ماڭىندا اگرو­ونەركاسىپتىك كەشەندى وركەندەتىپ, سول ارقىلى ىرگەلەس وتىرعان ەلدى مەكەندەردىڭ دە تۇرمىس-تىرشىلىگىنە يگى ىقپال ەتۋ كوزدەلىپتى. وسىنداي جاعىمدى جاڭالىقتار ەلباسىنىڭ, ۇكىمەتتىڭ, وبلىس باسشىلىعىنىڭ قالانىڭ كوپتەگەن جىلداردان بەرى قوردالانىپ قالعان پروبلەمالارىن وڭ شەشۋدە جاساپ وتىرعان قامقورلىقتارى مەن كومەگى ەكەندىگى بەلگىلى. اسىلبەك ايداروۆ, جاڭاوزەن قالاسى اكىمى جانىنداعى ارداگەرلەر كەڭەسىنىڭ توراعاسى.