ەڭ باستى داۋ – قازاقتىڭ ءتول دىبىستارىنىڭ ەكى ءارىپتى بولىپ كەلۋى. بۇنداي كوڭىلگە قونىمسىز نۇسقا تۇسىنىكسىزدىك پەن قولايسىزدىققا تاپ قىلاتىنى انىق ەدى. ءبىر قۋانارلىعى, ەلباسى العاشقى نۇسقاعا قول قويماي, بۇكىلحالىقتىق تالقىلاۋدى جالعاستىرعاندىقتان, اقىرى مىنە, ەل كوڭىلىنەن شىعاتىن قونىمدى نۇسقا دايىندالدى.
العاشقى نۇسقاداعى حالىققا ۇناماعان, قوس ءارىپتى بولىپ كەلگەن قازاقتىڭ ءتول داۋىستى – ءا, ءو, ءۇ جانە ت.ب. دىبىستار جاڭا نۇسقادا تولىق شەشىمىن تاۋىپ, ەندى ولار ءبىر ءارىپ بولاتىن بولدى. ءارىپتىڭ ۇستىڭگى وڭ جاعىنا نوقات قويىلادى, ياعني اپوكريفپەن بەلگىلەنەدى. قورىتىندىسىندا حالىق كوڭىلىنە قونىمدى لاتىن قارپىندەگى جاڭا ءالىپبي جوباسى جارىق كوردى.
لاتىن الىپبيىنە ءوتۋدى ءوزىنىڭ ۇلتتىق تۇجىرىمداماسىندا 2007 جىلدان بەرى كوتەرىپ كەلە جاتقان «اق جول» پارتياسى دا لاتىن ءالىپبيىن تالقىلاعان كەلەلى كەڭەستەر وتكىزىپ, بۇعان دەيىن دە ءوز ۇسىنىستارىن جىبەرگەن ەدى.
بۇل تاقىرىپقا ونشاقتى جىلدان بەرى قالام تارتىپ كەلە جاتقاندىقتان, «قازاق ءالىپبيى قازاق ءۇشىن جاڭارۋى كەرەك» دەگەن ەلدەن ەرەكشە قولداۋ تاپقان ماقالامدا قازاقتىڭ ءتول داۋىستى دىبىستارىنىڭ قوس ارىپپەن بەلگىلەنۋىنە – ديگرافتارعا قارسى شىعىپ, وندا وزگە نۇسقا ۇسىنعان بولاتىنمىن. سونىمەن «اق جول» پارتياسى توراعاسى, ءماجىلىس دەپۋتاتى ازات پەرۋاشەۆتىڭ باستاماسىمەن جاڭا جوباعا ءوز ۇسىنىستارىمىزدى پارتيادا تالقىلاپ, ارنايى كوميسسياعا جىبەردىك.
ال ەلباسىمىزدىڭ الدىندا ارنايى كوميسسيا لاتىن ءالىپبيىنىڭ جاڭا جوباسىن جاريالاعاندا ءبىز دە ۇتىمدى ۇسىنىستارىمىزدىڭ جاڭا نۇسقادا جاقسى كورىنىس تاپقانىن كورىپ, قۋانىپ قالدىق.
وسى ۇسىنىلعان نۇسقاداعى 11 ءارىپتىڭ 9 ءارپى جاڭا نۇسقادا قابىلدانىپتى.
ارينە لاتىن ءالىپبيىن دايىنداۋداعى ارنايى كوميسسيا جاڭا نۇسقانىڭ جەكەلەگەن ارىپتەرىنە بايلانىستى ءالى دە ۇتىمدى ۇسىنىستار بولسا قارالاتىنىن مالىمدەدى.
رۋحاني جاڭعىرۋىمىزعا تەمىرقازىق بولىپ وتىرعان لاتىن ءالىپبيىن تالقىلاۋعا بۇكىل حالىقتىڭ قاتىسقانىنا, قولداپ جاتقانىنا قاراپ, جاڭا ءالىپبيىمىزدىڭ بولاشاعى ايقىن بولادى دەپ سەنەمىز.
لاتىن ءالىپبيىن قابىلداۋ – رۋحاني تاۋەلسىزدىك ەكەنىن جاقسى ءتۇسىنىپ كەلە جاتقان ەلدىڭ سەنىمى كوڭىل قۋانتادى.
لاتىن ءالىپبيى قابىلدانعان سوڭ مەملەكەتتىڭ نەگىزگى رەسمي ءالىپبيى رەتىندە جۇمىس ىستەيتىن بولادى. مەملەكەتتىك ءالىپبي مەملەكەتتى ڭ تۇتاستىعى ءۇشىن قىزمەت ەتەدى.
لاتىن قارپىن تالقىلاۋدا زور بەلسەندىلىك كورسەتكەن حالىق ەندى جاڭا ءالىپبيىمىزدى ومىرگە ەنگىزۋدە دە قارقىندى قايرات تانىتۋى ءتيىس. ياعني قولعا الىپ قانا قويماي, قولدانۋدى دا باستاي بەرۋىمىز كەرەك.
جاڭا رۋحاني جەتىستىككە جەتەلەيتىن جاڭا لاتىن ءالىپبيى – جالپىۇلتتىق تالقىلاۋدىڭ جارقىن ناتيجەسى.
قازىبەك يسا,
«اق جول» پارتياسى
توراعاسىنىڭ ورىنباسارى
