ەلدىڭ مەملەكەتتىك تىركەۋ قىزمەتىنىڭ مالىمەتىنشە, قىرعىزستان پرەزيدەنتى سايلاۋىنا 3 025 768 داۋىس بەرۋشى قاتىسا الادى.
ايتا كەتەرلىگى, بيۋللەتەندەردە 13 ۇمىتكەر كورسەتىلگەن, الايدا باقىت توروباەۆ پەن كامچىبەك تاشيەۆ سايلاۋعا قاتىسۋعا باس تارتقاندىعىنا بايلانىستى ولاردىڭ دەرەكتەرى وشىرىلگەن جانە ولارعا داۋىس بەرىلمەيدى. بۇل ەلدەگى مەملەكەت باسشىسىن تاڭداۋ ءۇشىن وتكىزىلگەن جەتىنشى سايلاۋ.
سايلاۋ ۋچاسكەلەرى بۇگىن ساعات 20:00-گە دەيىن اشىق بولادى. سونىمەن قاتار, بىشكەكتىڭ جەرگىلىكتى ۋاقىتى بويىنشا ساعات 10: 00-دە رەسەيدە (ۆلاديۆوستوك, كراسنويارسك, نوۆوسيبيرسك, ەكاتەرينبۋرگ), جاپونيادا, كورەيادا, قىتايدا (پەكين, گۋانچجوۋ), مالايزيادا, ءۇندىستاندا, پاكىستاندا, قازاقستاندا (استانا, الماتى), تۇرىكمەنستان, وزبەكستان جانە تاجىكستاندا ۋچاسكەلىك سايلاۋ كوميسسيالارى اشىلدى. بۇل تۋرالى قىرعىزستان سىرتقى ىستەر مينيسترلىگىنىڭ ءباسپاسوز قىزمەتى حابارلادى
ايتا كەتەرلىگى, پرەزيدەنت المازبەك اتامباەۆ بىشكەك قالاسىنداعى №5 كاسىپتىك ليتسەي اۋماعىنداعى № 1209 ۋچاسكەسىندە سايلاۋعا داۋىس بەردى.
«سايلاۋدا كىم جەڭىسكە جەتەتىنىن ەشكىم بىلمەيدى, حالىق ءوزىنىڭ كوشباسشىسىن تاڭدايدى. مەن ءۇشىن سايلاۋ - بۇل مەرەكە. ونى ۇيىمداستىرۋ ءۇشىن كوپ كۇش جۇمسادىم, جانە ءبىز ۇلتتىق مەرەكەنى بۇزۋعا مۇمكىندىك بەرمەيمىز», دەدى اتامباەۆ.
ال پرەزيدەنتىككە ۇمىتكەر ومۋربەك بابانوۆ سايلاۋ ۋچاسكەسىندە باق-قا بۇگىنگى كۇننىڭ ماڭىزدىلىعى تۋرالى ايتىپ بەردى.
«مەن وزگەرىستەرگە داۋىس بەردىم, ويتكەنى ءبىزدىڭ رەسپۋبليكامىز الەمنىڭ ون دامىعان ەلدەرىنىڭ ءبىرى بولا الادى. داۋىس بەرۋ اياقتالعاننان كەيىن ءبىر ساعات ىشىندە كىمنىڭ جەڭىسكە جەتەتىندىگى انىق بولادى. مەن سايلاۋ ادىلەتتى بولعانىن قالايمىن. مەن وزىمە سەنىمدىمىن, ويتكەنى مەن كوپ ادامدارمەن كەزدەستىم جانە قوعامدىق پىكىر سۇراۋلارىنىڭ ناتيجەلەرىن كوردىم. كەشكە جاڭا پرەزيدەنتتىڭ ەسىمى بەلگىلى بولادى. بارلىعىن حالىق تاڭدايدى. بۇگىن ماڭىزدى كۇن, سوندىقتان جاعىمدى نارسەلەر تۋرالى اڭگىمەلەسەيىك. حالىق جەڭىسكە جەتۋى كەرەك», دەدى و.بابانوۆ.
ەستەرىڭىزگە سالا كەتەيىك, ساعات 10.00-دەگى اقپارات بويىنشا, بارلىعى 226 616 ادام داۋىس بەردى, دەپ حابارلادى قىرعىزستان وسك ءباسپاسوز قىزمەتى.
مەملەكەت باسشىسىنىڭ لاۋازىمىنا ۇمىتكەرلەر: ەرنيس زارلىكوۆ, توكتايىم ۋموتاليەۆا, تەمير ساريەۆ, ۋلۋكبەك كوچكوروۆ, تاالاتبەك ماسادىكوۆ, ومۋربەك بابانوۆ, ارستانبەك ابدىلداەۆ, سوورونباي جەەنبەكوۆ, اداحان مادۋماروۆ, ارسلانبەك ماليەۆ.
