مەنىڭ كوڭىلىمە جاققانى – ءار قازاقى ءتول دىبىسىمىزعا ءوزىنىڭ دەربەس تاڭباسىن انىقتاعانى. شىنىندا دا, ءار دىبىستىڭ ارتىندا عاسىرلار تياناقتاعان تاعدىرى تۇر.
ءتىلدىڭ قاسيەتى مەن كەپيەتى بار, ونى ۇمىتۋعا دا, وعان وبال جاساۋعا دا بولمايدى. باستاپقىدا تالقىلانعان جوباداعى قوسارلى دىبىستاردىڭ كەمشىلىگى كوپ ۇزاماي كورىنىپ قالعان ەدى. ديگرافتىڭ دارمەنسىزدىگى سونداي, تاڭبالاعان كەزدە توقسان توعىز تۇرگە وزگەرىپ شىعا كەلەتىنىن كورسەتتى. قالىپتاسقان تىركەستەردى, ءتول سوزدەرىمىزدى بۇرمالاپ تا جىبەرەتىنىن بايقادىق. كەشەگى ۇسىنىلعان 32 دىبىستىڭ تاڭبالانۋى دا, دىبىستىق ەرەكشەلىگىنىڭ ساقتالۋى دا, جالپى ءتىل زاڭدىلىعىن ساقتاۋداعى قابىلەتى كوڭىلىمنەن شىقتى. كەستەدە تۇرعان ارىپتەردىڭ ءار تاڭباسى ءار دىبىستى كەسكىندەيدى دەگەنگە قۋانىپ قالدىم.
لاتىن الىپبيىنە كوشۋ – بۇل قازاقستاننىڭ الەمدىك كەڭىستىككە, اسىرەسە اقپاراتتىق كەڭىستىككە, باسەكەلەستىك ورتاعا كىرۋگە جاساعان قادامى. بولاشاقتىڭ ماسەلەسىن ەلباسىنىڭ باستاما ەتىپ كوتەرگەنى, تىكەلەي ءوزىنىڭ قاداعالاۋىندا ۇستاپ وتىرعانى ءبىزدىڭ تاريحي تىلەگىمىز بەن سۇرانىسىمىزدى ەسكەرگەندىكتەن تۋىنداعانى انىق.
رۋحاني جاڭعىرۋدا ءتىل ماسەلەسى دە ءساتتى جۇزەگە اساتىن قادام رەتىندە كوڭىلگە سەنىم ۇيالاتىپ وتىر. سوناۋ 1920-1930 جىلدارى لاتىن الىپبيىمەن ساۋات اشىپ, جازۋ جازىپ, قاعاز سىزعانبىز. تۇركىتىلدەس باۋىرلارىمىز سەكىلدى جاڭا لاتىن ءالىپبيىن قابىلداساق, سول تاريحي قۇجاتقا اينالعان مۇرالارىمىزبەن قاۋىشۋدا دا قيىندىق بولماس ەدى.
حانگەلدى ءابجانوۆ,
ۇعا اكادەميگى,
تاريح عىلىمدارىنىڭ دوكتورى, پروفەسسور
