كوپشىلىككە پورترەتشى رەتىندە تانىمال بولعان توققوجا مۇقاجان ۇلى ءوز تۋىندىلارى ارقىلى ادامدار وبرازىنىڭ كوپقىرلىلىعىن, ءار تاعدىر يەسىنىڭ قايتالانباس جان-دۇنيەسىن اشىپ كورسەتە بىلەر شەبەر, عارىشتىق قۇپيامەن استاسىپ جاتقان مىڭ قاتپارلى سەزىم قىلدارىن ءدوپ باسىپ تانىر دارىن يەسى ەكەنى داۋسىز. قازاق حالقىنىڭ اباي, جامبىل, مۇحتار, مۇقاعالي سىندى ءبىرتۋار ۇلدارىنىڭ بەينەلەرىنەن قۇرالعان شىعارماشىلىق گالەرەياسى ارقىلى ۇلتىمىزدىڭ ۇلى تۇلعالارىنىڭ ادامگەرشىلىگىن مەن ابىرويىن اسقاقتاتۋدى كوزدەيتىن سۋرەتشىنىڭ «قاراساي-ءباھادۇر», «ايتەي باتىر», «بايدىبەك باتىر» سىندى پورترەتتىك كارتينالارىنان حالىق باتىرلارىنىڭ جادىدا ساقتالار ايبىندى بەينەسىن كورەسىز, «اكەمنىڭ پورترەتى», «انامنىڭ پورترەتى», « ۇلىمنىڭ پورترەتى» سىندى تۋىندىلاردان جاقىن ادامعا دەگەن قاستەرلى سەزىمنىڭ, وشپەس ماحابباتتىڭ جىلۋ تابىن سەزىنەسىز. ەرەكشە كەسكىندەمە ءستيلىن تاڭداعان, جارىق پەن كولەڭكەگە باسا نازار اۋداراتىن سۋرەتشىنىڭ زور سۇيىسپەنشىلىكپەن ورىندالعان جۇمىستارىنان ادام جانىنىڭ سۇلۋلىعىن, ادام مەن قورشاعان ورتا اراسىنداعى ۇيلەسىمدىلىكتى بايقايسىز.
«پورترەت كوپتەگەن فاكتورلار اسەر ەتەتىن اسا كۇردەلى شىعارماشىلىق اكت. مەن جۇمىسقا كىرىسەر الدىندا قۇجات ماتەريالدارىمەن تانىسىپ, مۇراعاتتاعى فوتوسۋرەتتەردى مۇقيات زەرتتەپ العان سوڭ عانا ءوز ويىمدى كەنەپكە تۇسىرەمىن. جيناقتالعان ماتەريالدار مەن مۇقيات زەرتتەۋ بارىسىندا العان اسەرلەرىمدى وي ەلەگىنەن وتكىزە وتىرىپ, تۇلعا سيپاتىن جاساپ شىعۋعا تىرىسامىن», – دەيدى توققوجا مۇقاجان ۇلىنىڭ ءوزى.
پورترەت جانرىمەن قاتار, ەلىمىزدىڭ ءار ايماعىنىڭ تابيعاتىن, سونداي-اق, ءوزى تۋىپ وسكەن حان-ءتاڭىرىنىڭ سۇلۋ كەلبەتىن دە بەينەلەۋدەن تانباعان شەبەر شىعارماشىلىعىندا «جالعىزدىق», «تىنىشتىق», «جان داۋىسى. 1937 جىل» سىندى فيلوسوفيالىق ويعا تولى تاقىرىپتىق كارتينالار دا ەرەكشە ورىن الادى.
ورتالىق مۇراجاي زالىندا اشىلعان سۋرەتشى كورمەسىندەگى اكۆارەلمەن سالىنعان پورترەتتەر سەرياسىنا كوز سالساڭىز, قازاققا جاناشىر بولعان كەيبىر تۇلعالار پورترەتتەرى فونىنداعى ەرەكشەلىكتى, ياعني كەيىپكەر ومىرىنە تيەسىلى ايرىقشا بەلگىلەردى, تۇلعا تاعدىرىن اشا تۇسەر تىلسىم سىرلاردى اڭدايسىز. قاراساي باتىر پورترەتىندەگى قىزىل شۇبار جولبارىستىڭ, «جامبىل تۇلعاتىنداعى» قىزىل جولبارىستىڭ, مۇحتار اۋەزوۆ پورترەتىندەگى ابايدىڭ, ساعات Əشىمباەۆ پورترەتى فونىنداعى قۇلاعان جىلقىنىڭ بىلىنەر-بىلىنبەس سۇلبالارى سونىڭ دالەلى.
اباي اتىنداعى قازاق ۇلتتىق پەداگوگيكا ۋنيۆەرسيتەتىنىڭ 90 جىلدىعىنا ارنالعان كورمەگە اقىن-دراماتۋرگتار, ونەرتانۋشىلار, قر ەڭبەگى سىڭگەن عىلىم, مادەنيەت جانە ونەر قايراتكەرلەرى, جوعارعى وقۋ ورىندارىنىڭ ۇستازدارى, قر سۋرەتشىلەر وداعىنىڭ جانە قر ديزاينەرلەر وداعىنىڭ مۇشەلەرى, ستۋدەنتتەر, اۆتوردىڭ تۋعان-تۋىستارى مەن دوستارى جينالدى.
ايتا كەتەرلىگى, اباي اتىنداعى قازۇپۋ-دا 30 جىلداي ۇستازدىق ەتكەن, وبلىستىق, رەسپۋبليكالىق, جالپى كەڭەستىك جانە حالىقارالىق كورمەلەرگە تۇراقتى قاتىسىپ, جامبىل اتىنداعى, م. ماقاتاەۆ اتىنداعى حالىقارالىق سىيلىقتاردىڭ لاۋرەاتى اتانعان توققوجا قوجاعۇلوۆ شىعارمالارى قازاقستان, رەسەي, قىرعىزستان, اقش, تۇركيا, گەرمانيا, جاپونيا جانە بالتىق تەڭىزى جاعالاۋى ەلدەرىنىڭ مۋزەيلەرى مەن جەكە كوللەكتسيالارىندا ساقتاۋلى. سۋرەتشى قىلقالامىنان شىققان 50-دەن استام تۋىندى قويىلعان رەسپۋبليكالىق دەڭگەيدەگى اتالمىش كورمە 2017 جىلدىڭ 16 قازانىنا دەيىن جالعاسپاق.
ميرا بايبەك,
«ەگەمەن قازاقستان»
الماتى
