«بۇرىن تولەنگەن ايىپپۇلدار بويىنشا سوت ورىنداۋشىلارىنىڭ كەلىپ جاتاتىنى تۋرالى ازاماتتاردىڭ شاعىمدارىن ءجيى كەزدەستىرۋگە بولادى. وسى سەبەپتى ءبىز ماتەريالداردىڭ شىنايىلىعىنا سوت ورىنداۋشىلارىنىڭ ستاتيستيكالىق اقپاراتىن جان-جاقتى تەكسەرۋدى باستاپ كەتتىك. ناتيجەسىندە, اتقارۋ ىستەرى ءۇشىن اكىمشىلىك پوليتسيادان سوت ورىنداۋشىلارىنا 52 مىڭ ماتەريال تولەنگەن ايىپپۇلدار بويىنشا جىبەرىلگەنى انىقتالدى. بۇل ءوز كەزەگىندە ايىپپۇلدى بەكىتىلگەن تارتىپتە تولەگەن ەلىمىزدىڭ 52 مىڭ ازاماتىنا سوت ورىنداۋشىلارى كەلەتىنىن بىلدىرەدى»,-دەپ جازدى باعدات مۋسين.
قۇقىقتىق ستاتيستيكا جانە ارناۋلى ەسەپكە الۋ كوميتەتى توراعاسىنىڭ سوزىنە قاراعاندا, سوڭعى ايدا وسىعان جۇمىلدىرىلعان قۇرىلىمدارعا مۇنداي ىستەردىڭ 90 پايىزىن تۇزەتىپ, ولاردى تارتىپكە كەلتىرۋ بۇيرىعى جۇكتەلدى. قالعان 10 پايىزى بويىنشا ءتيىستى جۇمىستار ءجۇرىپ جاتىر.
اتالعان پروبلەمانى جۇيەلى تۇردە شەشۋ ءۇشىن جانە ايىپپۇلداردى جازۋدىڭ ۇدەرىسىن جەڭىلدەتۋ تۇرعىسىندا اكىمشىلىك ىستەر ءتىزىلىمى قۇرىلۋدا, ياعني ول ايىپپۇلدار بويىنشا ەتالوندى بازا بولماق. وسى ورايدا ەلىمىزدىڭ اۋقىمىندا ءتيىستى ناتيجە الداعى جىلى بايقالاتىن بولادى.
«قازىرگى كەزدە تۋىنداپ جۇرگەن ماسەلەلەردى ناقتى شەشۋ ءۇشىن, بۇگىندە اتالعان پروبلەمالار تۇرعىسىندا قازاقستان ازاماتتارىنان اقپارات الۋعا الەۋمەتتىك جەلىلەردە (فب جانە ينستاگرام) پاراقشا اشۋ شەشىمى جاسالدى. بۇل رەتتە تولەم قابىلدانباعانى نەمەسە تولەم جاسالعانىمەن, ايىپپۇلدىڭ جويىلماعاندىعى جايىندا اقپارات جيناقتالادى. سونىمەن قاتار ادامدارعا قولايلى بولۋى ءۇشىن جاۋاپتى وكىلەتتى پروكۋرورلاردى مامانداندىرىلعان حالىققا قىزمەت كورسەتۋ ورتالىقتارىنا باعىتتادىق. ەگەر دە تولەم جاسالعانىمەن, ايىپپۇل جابىلماسا, اتالعان پاراقشالارعا ءوزىڭىزدىڭ پروبلەماڭىز جايىندا اقپاراتتى تۇسىرە الاسىزدار»,- دەدى مۋسين.
اتاپ ايتقاندا, ەندى ايىپپۇلدار بويىنشا تۋىنداعان ماسەلەلەر جايلى الەۋمەتتىك جەلىلەردەگى «شترافى KZ» پاراقشاسىندا جازبا قالدىرۋعا بولادى.
