قايرات ماقاەۆ 1980 جىلى 23 ساۋىردە تۋعان. جوعارى ەكونوميكالىق جانە اگرارلىق ءبىلىمى بار.
ەڭبەك قىزمەتىن ەكىنشى دەڭگەيلى بانكتە باستاعان. «قازاگرو» ۇلتتىق باسقارۋشى حولدينگى» اق جۇيەسىندە 2009 جىلدان باستاپ جۇمىس ىستەيدى.
2009 جىلدان 2012 جىلدار ارالىعىندا «قازاگروفينانس» اق ورتالىق اپپاراتىنىڭ باس مامانى, ءبولىم باسشىسى لاۋازىمدارىنان ايماقتىق فيليالدار مەن وكىلدىكتەر باسشىسى قىزمەتتەرىن اتقارعان.
حولدينگتىڭ وزىندە بىرنەشە وزەكتى دەپارتامەنتتەردىڭ ديرەكتورى لاۋازىمدارىن اتقارىپ, 2012 جىلدان باستاپ جۇمىس ىستەگەن.
سونىمەن قاتار, ءار ءتۇرلى ۋاقىتتاردا «قازاگرو» اق «قازاگروماركەتينگ», «اگرارلىق نەسيە كورپوراتسياسى» سياقتى ەنشىلەس اكتسيونەرلىك قوعامدارىنىڭ ديرەكتورلار كەڭەسىنىڭ مۇشەسى جانە «KazMeat» جشس قاداعالاۋ كەڭەسىنىڭ توراعاسى قىزمەتتەرىن قوسا اتقاردى.
2017 جىلدىڭ شىلدە ايىنان وسى ۋاقىتقا دەيىن «قازاگرو» حولدينگىنىڭ كورپوراتيۆتىك باسقارۋدى دامىتۋ دەپارتامەنتىنىڭ ديرەكتورى لاۋازىمىن اتقاردى.
«قازاگروكەپىل» اق ديرەكتورلار كەڭەسىنىڭ ءتورايىمى گۇلناز اتامقۇلوۆا جاڭا باسقارما توراعاسىن ۇجىمعا تانىستىرعاندا: «قايرات ماقاەۆ – ءوز مانسابىن ايماقتىق اپپاراتتا دا, ورتالىق اپپاراتتا دا جۇمىس اتقارىپ تومەننەن باستاعان جوعارى بىلىكتى مامان. ونىڭ بۇگىن تاعايىندالۋى – «قازاگرو» ءوز ماماندارىن ءوسىرۋىنىڭ كورسەتكىشى. «قازاگروكەپىل» اق جاڭا باسشىسىنىڭ الدىندا, جۇزەگە اسىرىلۋى قازاقستان اگرارياسىنا عانا ەمەس, جالپى ەلىمىزگە ماڭىزدى ۇلكەن مىندەتتەر تۇر. اۋىل بيزنەسىن كەپىلدەندىرۋ جانە ساقتاندىرۋ – ارگوونەركاسىپ كەشەنىن دامىتۋدىڭ ماڭىزدى بولىكتەرىنىڭ ءبىرى», - دەپ اتاپ ءوتتى.
