سۋرەت Akorda.kz سايتىنان الىندى
حابارلاماعا سايكەس, قايرات كەلىمبەتوۆ مەملەكەت باسشىسىنا حالىقارالىق قارجى ورتالىعىن ىسكە قوسۋعا دايىندىق جۇمىستارى جونىندە بايانداعان. جاڭا قارجىلىق ورتالىق الەمنىڭ ۇزدىك تاجىريبەسىن ەسكەرە وتىرىپ جۇزەگە اسىرىلماق.
سونداي-اق, قارجى ورتالىعىنىڭ باسقارۋشىسى پرەزيدەنتكە احقو تاۋەلسىز سوتىنىڭ جانە حالىقارالىق اربيتراجدى ورتالىعىنىڭ نورماتيۆتىك قۇجاتتارى دايىن بولعانىن مالىمدەدى. اتالعان ەكى سوت بيلىگىنىڭ ينستيتۋتتارى 2018 جىلى قاڭتار ايىندا اشىلادى دەپ جوسپارلانىپ وتىر.
قايرات كەلىمبەتوۆ نۇرسۇلتان نازارباەۆتى ورتالىقتى دامىتۋ باعىتتارىمەن تانىستىرىپ, احقو-نىڭ جوعارى تەحنولوگيالى بيرجاسىن قۇرۋ جونىندە باياندادى.
احقو باسقارۋشىسى اتاپ وتكەندەي, بۇگىننىڭ وزىندە شانحاي قارجى بيرجاسىمەن جانە Nasdaq Inc. كومپانياسىمەن كەلىسىم جاسالعان. بۇل كەلىسىمدەر قارجى ورتالىعىنىڭ ودان ءارى دامۋىنا اسەر ەتپەك.
كەلىمبەتوۆتىڭ ەسەبىن تىڭداعان سوڭ, ن.نازارباەۆ بىرقاتار ناقتى تاپسىرمالار بەردى.
