مەملەكەتتىك قىزمەتكەرلەردىڭ زاڭسىز ارەكەتتەرىن جاۋىر اتتىڭ جاۋىرىنان سيپايتىنداي كۇندەر ارتتا قالىپ بارادى. بۇل جولى ەكىنىڭ ءبىرىنىڭ ءتىسى باتا بەرمەيتىن مەملەكەتتىك كىرىستەر باسقارماسىنىڭ باسشىلارى مەن جاۋاپتى ماماندارىنا تاباعا شىجعىرىلعانداي كۇي كەشتىرىپ, ەڭ دوكەيىنە قىزمەتىنە تولىق ساي ەمەس دەگەن شەشىم شىعارىلدى.
سويتسە, ولار الەۋمەتتىك جانە زەينەتكەرلىك تولەماقىلار بويىنشا قارىزعا بەلشەدەن باتقان كاسىپورىندى شاعىن بيزنەس نىسانىنا جاتقىزىپ, 15 ايلىق ەسەپتىك كورسەتكىش مولشەرىندە عانا ايىپپۇل سالعان. جەرگىلىكتى سالىقتى تولىقتىرۋعا كىرىسۋدىڭ ورنىنا ورتا كاسىپكەرلىك سۋبەكتىسىن 212 ميلليون تەڭگە ايىپپۇل تولەۋ مۇمكىندىگىنەن ايىرعان. كاسسانى پايدالانۋعا شەكتەۋ قويىلعانىنا قاراماستان, ەسەپ ايىرىسۋ جالعاسىپ, ءىستى قاراۋ مەرزىمى نەگىزسىز شەگەرىلگەن. وسى ۋاقىت ارالىعىندا سەرىكتەستىك شاعىن بيزنەس ۇيىمى رەتىندە قايتا تىركەلىپ, جاۋاپكەرشىلىكتەن جالتارىپ كەتكەن. قاداعالاۋشى ورگاننىڭ بۇل تىرلىگى ەشقانداي زاڭ نورمالارىمەن سىيىسپايتىنى بەتتەرىنە باسىلىپ, بۇل ماسەلەگە الداعى ۋاقىتتا تاعى دا ورالاتىنى اتاپ كورسەتىلدى.
الايدا, ادەپ جونىندەگى كەڭەستىڭ مۇشەلەرى باسىن قاتتى باستاعانىمەن م.جۇماباەۆ اۋدانى الەكساندروۆكا اۋىلدىق وكرۋگىنىڭ اكىمى قايىرگەلدى بايتاقوۆتىڭ ماسەلەسىن مايشاممەن قاراۋعا كەلگەن كەزدە سولقىلداقتىققا بوي الدىرعانداي بولدى. ءسىرا ونىڭ سىرا عانا ىشكەن ەدىم دەگەن ء«ۋاج» كوڭىلدەرىن بوساتىپ جىبەرسە كەرەك. شەشىم قابىلداناردا پىكىر ەكىگە جارىلدى. دەپارتامەنت جەتەكشىسى – ادەپ كەڭەسىنىڭ توراعاسى ع.تۇرسىنباەۆتىڭ جۇمىس كەزىندە ىشىمدىككە سالىنعاندار قاتاڭ جازالانىپ, جۇمىستان بوساتىلۋى ءتيىس دەگەن ۇسىنىسىنا وزگەلەرى ۇلارداي شۋلاپ, قاتاڭ سوگىس جاريالانسىن دەپ جەر تابانداپ وتىرىپ الدى. وسىلايشا «قىرىق كىسى – ءبىر جاق, قىڭىر كىسى – ءبىر جاق» دەگەن ماتەلدىڭ ءوڭى اينالىپ شىعا كەلدى.
بۇعان دەيىن سەرگەەۆكا قالاسىنىڭ اكىمى, ايىرتاۋ اۋدانى دەنە شىنىقتىرۋ جانە سپورت ءبولىمىنىڭ جەتەكشىسى, پەتروپاۆل قالالىق اكىمدىگىنىڭ اپپارات باسشىسى, شال اقىن اۋدانىنداعى سەميپولكا اۋىلدىق وكرۋگىنىڭ اكىمى «اقماعامبەتپەن» بۋىن بوساتىپ, كولىكپەن جەلشە جۇيتكىگەندەرى ءۇشىن ءبىرى قىزمەتتەن بوساپ, ءبىرى ءوز ەركىمەن كەتكەندەرىن ەسكەرسەك, جازا قولدانۋدا كىمنىڭ دۇرىس, كىمنىڭ بۇرىس ەكەنىن ار-ۇياتتىڭ ەنشىسىنە قالدىرايىق.
ايتىپ-ايتپاي نە كەرەك, ابىروي-بەدەلى جوعارى, قىزمەتىنەن ات ۇركەتىن ماقتاۋلى باسشى قالىڭ قولدى باسقارۋدان شەتتەتىلگەن قولباسىداي جەر شۇقىپ قالدى.
ء ومىر ەسقالي,
«ەگەمەن قازاقستان»
سولتۇستىك قازاقستان وبلىسى
