ەكى قۇراما ءبىر-ءبىرىن اڭدىسىپ جاتپاي, بىردەن شابۋىلعا كوشتى. العاشقى بولىپ ءبىزدىڭ رومان مۇرتازاەۆ ۇرىمتال ساتتە باسپەن سوققى جاساپ ۇلگەردى. ارتىنشا ءبىر كەزدەرى «اقتوبە» ساپىندا دوپ تەپكەن پيزەللي سول اياقپەن شىرەنە تەۋىپ, لوريانى سىناپ كوردى. قاقپاشىمىز قينالسا دا دوپتى جۇدىرىقپەن قايتارا الدى. ارتىنشا قوناقتار ساپىنان مالاكيان مەن سيمونيان ءبىر-ءبىر رەتتەن دوپتى قاقپامىزعا باعىتتاعانمەن, بۇل جەردە لوريا ءوز ورنىنان تابىلا ءبىلدى.
ءبىرىنشى تايمنىڭ ورتا تۇسىنان باستاپ قازاق جىگىتتەرى ويىندى ءوز قولدارىنا قانشا العىسى كەلگەنىمەن, محيتاريان باستاعان ارمەنيا قۇراماسى ونداي مۇمكىندىك بەرمەدى. كەرىسىنشە, قوناقتاردىڭ كەيبىر ويىنشىلارىنىڭ دەڭگەيى ءبىزدىڭ فۋتبولشىلاردان اناعۇرلىم جوعارى ەكەنى بايقالىپ تۇردى. گەنريح محيتارياننىڭ ءوزى نەگە تۇرادى؟! قورعاۋشىلارىمىزدى شىر كوبەلەك اينالدىرىپ جۇرگەن «مانچەستەر يۋنايتەد» ويىنشىسى 26-مينۋتتا لوريامەن جەكەدارا شىعىپ, دوپتى قاقپاشىمىزدىڭ ۇستىنەن اسىرا سالدى. ەسەپ – 1:0, ارميانداردىڭ پايداسىندا.
وسى گولدان كەيىن ءبىزدىڭ جىگىتتەردىڭ قارقىنى باسەڭدەگەنى انىق بايقالدى. ەسەسىنە قوناقتار شابۋىل ۇستىنە شابۋىلدى ۇدەتە ءتۇستى.
الماس ماناپ,
«ەگەمەن قازاقستان»
