نۇرالى ەلىباەۆتىڭ مالىمەتتەرىنە سۇيەنسەك, 2017 جىلدىڭ سوڭىنا دەيىن پايدالانۋعا بەرىلەتىن شاعىن گۇل باقتارىنىڭ قۇرىلىسىنا 962,5 ملن تەڭگە قاراستىرىلعان.
شاعىن گۇل باقتارى استانانىڭ ءبىرجان سال, جەلتوقسان, سۋۆوروۆ, تاۋەلسىزدىك, قوشقارباەۆ كوشەلەرىنىڭ بويىندا جايعاسپاق. مۇنىمەن قوسا, جىل اياعىنا دەيىن سەيفۋللين كوشەسىندەگى گۇل باعى قايتا جوندەۋدەن وتەدى.
«2017 جىلى جالايىر كوشەسىندەگى ساياباقتىڭ قۇرىلىس جۇمىستارى اياقتالىپ, ول پايدالانۋعا بەرىلدى. جىلدىڭ سوڭىنا دەيىن 5 شاعىن گۇل باعىنىڭ قۇرىلىس-مونتاجدىق جۇمىستارى اياقتالادى دەپ جوسپارلانعان. جاڭا دەمالىس ورىندارى قالالىق №1 ەمحانانىڭ, قالالىق پەريناتالدى ورتالىقتىڭ, ءبىرجان سال, جەلتوقسان, سۋۆوروۆ كوشەلەرىندە پايدا بولادى. بۇل جۇمىستاردىڭ اياقتالۋ مەرزىمى بولىپ, جىلدىڭ سوڭى بەلگىلەندى», - دەدى استانا قالاسى اكىمدىگى تابيعي رەسۋرستاردى جانە تابيعات پايدالانۋدى رەتتەۋ باسقارماسىنىڭ باس مامانى.
اكىمدىكتىڭ تابيعي رەسۋرستاردى جانە تابيعات پايدالانۋدى رەتتەۋ باسقارماسىندا بەلگىلى بولعانداي, بيىل سونداي-اق, «كوكتال» شاعىن اۋدانىنداعى ساياباقتىڭ قۇرىلىسى باستاۋ العان. جوسپارعا سايكەس, قۇرىلىس جۇمىستارى كەلەسى جىلى اياقتالماق.
«بيىل كوكتال اۋدانىندا ساياباقتىڭ قۇرىلىسى باستالدى. 2017 جىلى ىسكە اساتىن جۇمىستارعا 683 ملن تەڭگە قاراستىرىلىپ وتىر. جوبانىڭ جالپى قۇنى 3 ملرد 386 ملن تەڭگەنى قۇرايدى. ساياباق 2018 جىلى پايدالانۋعا بەرىلەدى دەپ جوسپارلانىپ وتىر», - دەپ مالىمدەدى نۇرالى ەلىباەۆ .
مۇنىمەن قوسا, باس ماماننىڭ مالىمەتىنشە, 2018 جىلى استانا قالاسىنداعى اپاتتى جاعدايدا تۇرعان ۇيلەردىڭ ورنىندا جەلەكجولدار مەن گۇل باقتارى سالىناتىن بولادى. قازىرگى تاڭدا اتالمىش نىسانداردىڭ قۇرىلىسىنا بولىنەتىن قاراجات كولەمى بيۋدجەت ناقتىلانعاننان كەيىن انىقتالماق.
«استانا قالاسى اكىمىنىڭ تاپسىرماسى بويىنشا 2018 جىلى كونە اپاتتى ۇيلەردىڭ ورنىنا جەلەكجولدار مەن شاعىن گۇل باقتارىنىڭ قۇرىلىسى جوسپارلانادى. ونىڭ ىشىندە 3 جەلەكجول, 8 گۇل باعى سالىنادى دەلىنگەن. جەلەكجولدار جەڭىس داڭعىلىندا (ۇزىندىعى شامامەن 100-150 مەتر), اباي داڭعىلىندا جانە كەڭەسارى كوشەسىنىڭ بويىندا ورنالاساتىن بولادى», - دەپ تۇيىندەدى ءسوزىن استانا قالاسى اكىمدىگى تابيعي رەسۋرستاردى جانە تابيعات پايدالانۋدى رەتتەۋ باسقارماسىنىڭ باس مامانى نۇرالى ەلىباەۆ.
