كەدەسۋ بارىسىندا قوس تاراپ وقو اكىمدىگى مەن استانا قالاسىنداعى مەملەكەتتىك قىزمەت سالاسىنداعى ايماقتىق حاب اراسىنداعى ىنتىماقتاستىق تۋرالى مەموراندۋمعا قول قويدى.
اتالعان مەموراندۋم اياسىندا مەملەكەتتىك باسقارۋ مەن مەملەكەتتىك قىزمەت جۇيەسىنىڭ وزەكتى باعىتتارى كوزدەلگەن. ماسەلەن, اكىمدىك پەن ايماقتىق حاب جوبالىق مەنەدجمەنت, مەملەكەتتىك قىزمەت كورسەتۋدىڭ ساپاسىن ارتتىرۋ, ادام رەسۋرستارىن باسقارۋ جانە باسقا دا وزەكتى سالالارداعى ءبىلىم بەرۋ جانە عىلىمي-زەرتتەۋشىلىك سيپاتتاعى شارالارعا قاتىسا الادى.
جيىندا ءسوز العان ايماق باسشىسى وڭتۇستىك قازاقستان وبلىسى قازىرگى ۋاقىتتا حالىق سانى بويىنشا رەسپۋبليكادا ءبىرىنشى ورىندا ەكەنىن جانە الەۋمەتتىك-ەكونوميكالىق دامۋىنىڭ تۇراقتى ءوسىم تەندەنتسياسى قالىپتاسقان وڭىرلەردىڭ ءبىرى ەكەنىن ايتتى.
«وسى ءوڭىرىمىزدىڭ ودان ءارى تۇراقتى وركەندەۋىنە ءسوزسىز قوماقتى ۇلەس قوساتىن مەملەكەتتىك قىزمەتشىلەر بولىپ تابىلادى. قازىرگى ۋاقىتتا وڭىرىمىزدە جەرگىلىكتى اتقارۋشى ورگانداردا 4573 بىرلىك كوزدەلگەن. ۇستىمىزدەگى جىلى مەملەكەت باسشىسىنىڭ ءتيىستى جارلىعىنا سايكەس اكىمدىكتىڭ 3700 دەن اسا مەملەكەتتىك قىزمەتشىسى كەشەندى اتتەستاتتاۋدان وتكىزىلدى. بۇدان باسقا, وسى جىلى مەملەكەتتىك قىزمەتشىلەردى وقىتۋعا 53 ملن 441 مىڭ تەڭگە بولىنگەن بولاتىن. بۇگىنگى كۇنگە دەيىن 1254 مەملەكەتتىك قىزمەتشىلەر بىلىكتىلىگىن ارتتىرىپ, 490-ى قايتا دايارلاۋدان ءوتتى. سونىمەن قاتار, بيىل 3 قىزمەتشى «بولاشاق» حالىقارالىق باعدارلاماسىنىڭ ستيپەندياتى اتانسا, 7 قىزمەتشى قازاقستان رەسپۋبليكاسى پرەزيدەنتى جانىنداعى مەملەكەتتىك باسقارۋ اكادەمياسىنا وقۋعا قابىلداندى», - دەدى اكىم.
ءۇش ميلليونعا جۋىق ادام شوعىرلانعان وڭتۇستىك وڭىرىندە مەملەكەتتىك قىزمەتشىلەر تاراپىنان حالىققا قىزمەت كورسەتۋدە قوردالانعان ماسەلەلەر از ەمەس ەكەنىن ايتقان ءوڭىر باسشىسى وبلىستاعى ءبىر مەملەكەتتىك قىزمەتشىگە 650 – دەن استام قىزمەت الۋشى كۇندەلىكتى جۇگىنەتىنىن جەتكىزدى.
ءوز كەزەگىندە وڭىرلىك حاب باسقارۋشى كوميتەتىنىڭ توراعاسى ءا.بايمەنوۆ بۇگىنگى مەموراندۋم وسى مەملەكەتتىك قىزمەتشىلەردىڭ حالىققا كورسەتەتىن قىزمەتىنىڭ ساپاسىن ارتتىرۋعا, مەملەكەت باسشىسىنىڭ بەلگىلەگەن ماقسات جانە مىندەتتەرىن ورىنداۋداعى جۇمىستارىن جەتىلدىرۋدە ىقپالى مول بولاتىنىن سەندىردى. ياعني, قول قويىلعان مەموراندۋم ترانسفورماتسيا جانە كادرلىق الەۋەتتى ارتتىرۋدا ءبىزدىڭ ءوڭىردىڭ مەملەكەتتىك اپپاراتىنىڭ جۇمىسىنا وڭ سەپتىگىن تيگىزەتىن بولادى.
