جيىندا مەملەكەتتىك حاتشى قازاقستان پرەزيدەنتىنىڭ «بولاشاققا باعدار: رۋحاني جاڭعىرۋ» اتتى باعدارلامالىق ماقالاسىندا اشىقتىق پەن ۇزدىك جەتىستىكتەرگە بەيىمدەلۋ قاجەتتىگىن ايقىنداپ بەرگەنىن ايتتى.
گ.ابدىقالىقوۆا عالىمدار, ءوندىرىس جاڭاشىلدارى, عىلىمي-تەحنيكالىق زيالى قاۋىم وكىلدەرى ەل ەكونوميكاسىن دامىتۋعا, ۇلتتىڭ زياتكەرلىك الەۋەتىن نىعايتۋعا ەلەۋلى ۇلەس قوسىپ وتىرعانىن اتاپ ءوتتى.
– الەم بۇگىندە جەدەل وزگەرۋدە. جوعارى تەحنولوگيالار, تىڭ عىلىمي جاڭالىقتار, عىلىمدى قاجەت ەتەتىن وزىق وندىرىستەر – وسىنىڭ بارلىعى الەم ەلدەرىن وزگەرىستەرگە بەيىمدەلىپ, يننوۆاتسيالىق جوبالاردى ينۆەستيتسيالاۋعا, باسەكەگە قابىلەتتى بولۋعا جەتەلەيدى. سوندىقتان عىلىم مەن تەحنيكانىڭ دامۋىنا تۇراقتى تۇردە قارجى ءبولىپ وتىراتىن مەملەكەتتەر ءوز حالقىنىڭ ءال-اۋقاتىن جاقسارتىپ, جاھاندىق يننوۆاتسيالىق ترەندتەن قالىسپايتىن بولادى, – دەدى مەملەكەتتىك حاتشى.
گ.ابدىقالىقوۆا قازاقستان رەسپۋبليكاسىنىڭ ءال-فارابي اتىنداعى عىلىم مەن تەحنيكا سالاسىنداعى مەملەكەتتىك سىيلىعى عىلىم مەن تەحنيكا قايراتكەرلەرىنىڭ ەڭبەگىنە قوعام مەن مەملەكەت تاراپىنان بەرىلگەن جوعارى باعا ەكەنىن اتاپ ءوتتى. ەكى جىلدا ءبىر رەت 7 سىيلىققا دەيىن بەرىلەدى. 2017 جىلى مەملەكەتتىك سىيلىق لاۋرەاتىنا بەرىلەتىن قارجىلاي ءبىر سىياقى مولشەرى – 18 600 000 تەڭگە. سىيلىققا بارلىعى 24 جۇمىس ۇسىنىلعان. الدىن الا ىرىكتەۋدەن كەيىن سولاردىڭ 11-ءى ەكىنشى كەزەڭگە ءوتتى.
وتىرىستىڭ قورىتىندىسى بويىنشا كوميسسيا قازاقستان رەسپۋبليكاسىنىڭ ءال-فارابي اتىنداعى عىلىم مەن تەحنيكا سالاسىنداعى 2017 جىلعى مەملەكەتتىك سىيلىعىن بەرۋ ءۇشىن مەملەكەت باسشىسىنىڭ قاراۋىنا ۇسىنىلاتىن جۇمىستاردىڭ ءتىزىمىن ايقىندادى.
قازاقستان رەسپۋبليكاسىنىڭ پرەزيدەنتى ءال-فارابي اتىنداعى عىلىم مەن تەحنيكا سالاسىنداعى مەملەكەتتىك سىيلىقتى تاۋەلسىزدىك كۇنى قارساڭىندا تاپسىرادى.
