بۇگىنگى الماعايىپ ۋاقىتتا بىرەۋلەر ءۇشىن ادەبيەتپەن شۇعىلدانۋ, ءسوز قۇرىلىمى مەن ءستيلىن زەرتتەۋ – ۋاقىت پەن ەڭبەكتىڭ زايا كەتۋى بولىپ ەسەپتەلەتىن شىعار. اركىمنىڭ سانا-سەزىمى ارقانداي بولسا دا, بارىنە ورتاق ءبىر تۇسىنىك بارىن انىق بىلەمىن. ءسوز بەن ءستيلدى زەرتتەۋ زايا ەڭبەك دەپ ويلايدى.
بىراق مەن قانداي ادام بولسىن, كوركەم ويلاسىن, يا ويلاماسىن, مىنا دۇنيەدە كۇندەلىكتى تىرشىلىكتەن باسقا دا ۇعىمدار بار ەكەنىن ءبىر ءسات بولسا دا ويلايتىندارىنا سەنگىم كەلەدى.
مەن وقۋعا شاقىرعان, وسىلاي تۇسىنۋگە بولادى دەپ شامالاعان روماندار سىزدەردىڭ كۇندەلىكتى تۇرمىستارىڭىزعا قاجەت ءىلىمدى ۇيرەتپەيدى. وفيستىك قىزمەتىڭىزدە دە, اسكەري جيىنداردا دا, اس ءۇي مەن بالالار بولمەسىندە دە كادەڭىزگە جاراماۋى ابدەن مۇمكىن. سىزدەر قابىلداۋعا, مەن تۇسىندىرۋگە تىرىسقان ءبىلىم – اسەمدىك. ساياساتتى دا, ايەل مەن بوزبالانىڭ جۇرەگىن تۇسىنۋگە دە سەپ بولا المايتىن اسەمدىك. بىراق مەنىڭ ايتقان ەرەجەلەرىمدى ساقتاساڭىزدار شىن ونەردەن تۋعان شابىت قۋانىشىن سەزىپ, ەستەتيكالىق ءلاززات الۋعا قول جەتكىزەر ەدىڭىزدەر. الەم ادەبيەتىنىڭ كلاسسيكتەرى تۋرالى لەكتسيالارىم ارقىلى مەن عاجايىپ ويىنشىقتاردىڭ تەتىگىن تاپقىم كەلدى. سىزدەر ناعىز وقىرمان بولسا دەپ ارماندادىم. كىتاپتى بالا سياقتى قاھارماندارمەن جارىسۋ ءۇشىن ەمەس, ۋنيۆەرسيتەتتەن يا ومىردەن جالىعىپ, باسقا الەمدى قىزىقتاعىسى كەلەتىن ستۋدەنتتەرگە ءتان قياليلىقپەن دە ەمەس, ءومىر مەن ونەردىڭ ارا-قاتىناسىنداعى نازىك تىندەردى سونشالىقتى تەرەڭ ءتۇسىنىپ, تۇيسىنەتىن قابىلەتپەن وقيتىن دارەجەگە جەتكىزگىم كەلدى. سىزدەرگە كىتاپتىڭ فورماسىن, مازمۇنىن, جازۋ ونەرىن تۇسىندىرۋگە تىرىستىم. كىتاپتىڭ اينالاسى تۋرالى ايتقان جوقپىن. ءار روماننىڭ جۇرەك قاعىسى تۋرالى جىرلادىم.
بىرەۋىڭىز بۇل ءسوزىمدى ۇعىپ, بىرەۋىڭىز تىڭدامايتىن دا شىعارسىزدار. ۇلكەن ومىرگە ارالاسقان ساتتەن ءبىرىڭىز ۇلى رومانداردى وقۋدى جالعاستىرىپ, ەندى ءبىرىڭىز مۇلدە كىتاپ بەتىن اشپايتىن بولاسىزدار. ال ءسوز شەبەرلەرىنىڭ كىتاپتارىن ەشقاشان تۇسىنبەي وتەتىن شىعارمىن دەپ ويلايتىندارىڭىز, مۇلدە كىتاپ وقىماي-اق قويعاندارىڭىز ابزال. ودان قىزىق تاۋىپ, ءلاززات الماساڭىزدار ءبارى بەكەر. باسقا دا سالالاردىڭ ءوز قىزىعى بار عوي.
بىراق عىلىم مەن ونەردىڭ قىزىعى ەشقاشان تەڭ كەلە المايدى. ونەر – بيىك. ەگەر سونى سەزىنە الماساق, ءومىردىڭ ءبىر عانيبەتىنەن قۇرالاقان قالامىز.
ۆلاديمير نابوكوۆ
اۋدارعان
باعاشار تۇرسىنباي ۇلى,
«ەگەمەن قازاقستان
