«ۆلاديمير وبلىستىق تجم-ءنىڭ مالىمەتتەرىنە سۇيەنسەك, تىركەۋ نومەرى UDA668 Mercedes ماركالى جولاۋشىلار اۆتوبۋسى اتالعان وڭىردە ءىرى جول كولىگى اپاتىنا ۇشىرادى», - دەدى قر سىرتقى ىستەر مينيسترلىگىنىڭ ءباسپاسوز حاتشىسى ءانۋار جايناقوۆ فەيسبۋكتەگى پاراقشاسىندا.
مالىمەتتەرگە قاراعاندا, جول كولىك اپاتى سالدارىنان 15 ادام قازا تاۋىپ, 5 ادام اۋرۋحاناعا جەتكىزىلدى. اۆتوبۋستا بارلىعى 55 ادام بولعان. «زارداپ شەككەندەر پەتۋشينسكىدەگى اۋداندىق كلينيكالىق اۋرۋحاناعا جەتكىزىلدى. قازىرگى ۋاقىتتا رەسەيدەگى قازاقستاندىق ديپلوماتتار قازا تاپقاندار مەن زارداپ شەككەندەردىڭ تۇلعالارى مەن ازاماتتىعىن انىقتاپ جاتىر», - دەيدى ءانۋار جايناقوۆ.
ايتا كەتەيىك, قر ءسىم رەسەي فەدەراتسياسىنىڭ ۆلاديمير وبلىسىندا بولعان ءىرى جول اپاتىندا قازاقستاندىقتار قازا بولدى دەگەن اقپاراتتى تەكسەرىپ جاتقاندىعى تۋرالى حابارلاعان بولاتىنبىز.
