ەنگىزىلەتىن ەرەجەلەر قازاقستاننىڭ جاڭا حالىقارالىق ۇيىمعا – ازيا ينفراقۇرىلىمدىق ينۆەستيتسيالار بانكىگە (ايب) مۇشەلىگىنە قۇقىقتىق شارتتارىن رەتتەيدى. ءبىزدىڭ ەلىمىز بانكىنىڭ ايماقتاعى تولىققاندى مۇشەسى بولىپ تابىلادى. 2015 جىلعى 29 ماۋسىمدا بەيجىڭدە 57 قۇرىلتايشى ەلدەر وكىلدەرى قول قويعان ايب-نى قۇرۋ تۋرالى كەلىسىمنىڭ باپتارى قازاقستان رەسپۋبليكاسىنىڭ 2016 جىلعى 26 قاڭتارداعى زاڭىمەن راتيفيكاتسيالاندى.
تالقىلاۋعا ۇسىنىلعان زاڭ جوباسى ايب-مەن قاتىناستارعا وكىلەتتى مەملەكەتتىك ورگانداردى ايقىندايدى. اتاپ ايتقاندا, بايلانىس ارناسى رەتىندە ۇكىمەت (ۇلتتىق ەكونوميكا مينيسترلىگى) بەلگىلەگەن ءتيىستى رەسمي ورگان انىقتالدى, بارلىق قارجى وپەراتسيالارى مەن مامىلەلەردى جۇزەگە اسىرۋ ءۇشىن – قارجى مينيسترلىگى; ۇلتتىق ۆاليۋتاداعى بارلىق قارجىنىڭ جانە ايب-ءنىڭ باسقا دا اكتيۆتەرىنىڭ دەپوزيتاريى رەتىندە ۇلتتىق بانكى بەلگىلەندى.
ودان باسقا, قۇجات قازاقستان رەسپۋبليكاسى ايب-گە مۇشەلىككە بايلانىستى ءوزارا قارجى-قاراجات قاتىناستاردى قارجى مينيسترلىگى مەن ۇلتتىق بانكى ارقىلى رەتتەيدى.
ايب-ءنىڭ نەگىزگى ماقساتتارى ايماق ەكونوميكاسىنىڭ تۇراقتى دامۋىنا جاردەمدەسۋ جانە ءوزارا بايلانىستى ينفراقۇرىلىمدى نىعايتۋ, ينفراقۇرىلىمدارعا جانە ەكونوميكا سەكتورىنا باسقا دا وندىرىستىك ينۆەستيتسيا اكەلۋ ارقىلى ازيا ەلدەرىنىڭ ەكونوميكالىق جانە الەۋمەتتىك وركەندەۋىن ىنتالاندىرۋ بولىپ تابىلادى. ەنەرگەتيكا, كولىك جانە تەلەكوممۋنيكاتسيا سالالارىنداعى جوبالاردى قارجىلاندىرۋ بانكى قىزمەتىنىڭ باسىم باعىتى بولۋى ءتيىس.
ايب كاپيتالىنداعى قازاقستان ۇلەسى (قول قويىلعان كاپيتال) 729,3 ميلليون اقش دوللارىن (0,7930 پايىزى), ورتاق ۇلەستىڭ 10 387 داۋىسىن (0,9612 پايىزى) قۇرايدى. تولەنگەن كاپيتال 145,9 ميلليون دوللاردى قۇرايدى, ول بەس جىل بويى (2016-2020 جىلداردا) جىل سايىنعى 29,180 ميلليون دوللار كولەمىندە مۇشەلىك جارنا تولەۋدى تالاپ ەتەدى.
زاڭ جوباسى پالاتانىڭ قاراۋىنا جىبەرىلدى.
