مەملەكەت باسشىسىنا بۇل نىساننىڭ قۇرىلىسى جەكە ادامداردىڭ قارجىسى ارقىلى جۇرگىزىلگەنى باياندالدى. قازاقستانپرەزيدەنتى ەلىمىزدىڭ كورنەكتى عىلىم جانە ونەر قايراتكەرلەرى – جۇبانوۆتاردىڭ ءومىرى مەن شىعارماشىلىعىنا ارنالعان مۋزەيدى ارالاپ كوردى.
بۇدان بولەك, ەلباسى وبلىستىڭ جۇرتشىلىق وكىلدەرىمەن كەزدەستى.
نۇرسۇلتان نازارباەۆ «رۋحاني جاڭعىرۋ» اتتى باعدارلامالىق ماقالاسىندا اتاپ كورسەتىلگەن جاڭعىرۋ ۇدەرىسىنىڭ ەرەكشەلىكتەرىنە توقتالدى.
– الەم كوز الدىمىزدا وزگەرۋدە, ءبىز سول وزگەرىستەردىڭ ورتاسىندامىز. جاڭا عىلىمدار پايدا بولىپ, تىڭ كوزقاراس قالىپتاسۋدا. بارلىق رەفورمالار, سونىڭ ىشىندە قوعامدىق سانانى جاڭعىرتۋ ۇدەرىسى زامانداستارىمىزدى جارقىن بولاشاققا دايىنداۋ ءۇشىن جاسالۋدا, – دەدى قازاقستان پرەزيدەنتى.
سونداي-اق, ەلباسى استانا, الماتى, شىمكەنت قالالارىمەن قاتار اقتوبە دە يننوۆاتسيا ورتالىعى بولىپ, وندىرىستىك, قارجىلىق جانە ادامي رەسۋرستاردى تارتاتىن فاكتورعا اينالۋعا ءتيىس ەكەندىگىن ەرەكشە اتاپ ءوتتى.
– تاۋەلسىزدىك جىلدارىندا اقتوبە وبلىسىنىڭ حالقى ەكى ەسە ءوستى. وسى كورسەتكىشتى ارتتىرۋ ماقساتىمەن مۇندا تۇتاس شاعىن اۋداندار مەن قاجەتتى ينفراقۇرىلىم سالىنۋدا. بارلىق جاعداي جاسالىپ جاتىر. تۇرعىن-ءۇي, جول سالىنىپ, گاز بەن سۋ قۇبىرلارى تارتىلۋدا. سول سياقتى بۇكىل قازاقستان اۋماعى جول جەلىسىمەن قامتىلادى. مىنە, دامۋ دەگەنىمىز – وسى. مۇنى ادامي دامۋ دەۋگە دە بولادى, – دەدى مەملەكەت باسشىسى.
كەزدەسۋ سوڭىندا نۇرسۇلتان نازارباەۆ وبلىس تۇرىندارىنا اماندىق پەن باق-بەرەكە تىلەپ, ەلىمىزدىڭ وركەندەۋى جولىندا تابىسقا جەتۋلەرىنە نيەتتەستىگىن ءبىلدىردى.
