كەڭەس وتىرىسىندا الەۋمەتتىك جارنامالاردى ورنالاستىرۋ, بۇقارالىق اقپارات قۇرالدارىنداعى قازاق ءتىلىنىڭ جاعدايى, «اشىق ۇكىمەت» پورتالىن دامىتۋ سياقتى بىرقاتار ماسەلەلەر تالقىلاندى.
اقپارات جانە كوممۋنيكاتسيالار مينيسترلىگىنىڭ باق سالاسىنداعى مەملەكەتتىك ساياسات دەپارتامەنتىنىڭ ديرەكتورى ەلدوس ءناشىرالىنىڭ اقپاراتىنا سۇيەنسەك, وتاندىق تەلەارنالار ەفير ۋاقىتىنىڭ 1 پايىزىن الەۋمەتتىك روليكتەرگە ءبولۋدى جوسپارلاپ وتىر. ياعني, كۇنىنە 2 مەزگىل 45 سەكۋندتىق بەينەكورسەتىلىم كەشكى ۋاقىتتا كورەرمەن نازارىنا ۇسىنىلماق. ە.ءناشىرالىنىڭ پىكىرىنشە, مۇنداي الەۋمەتتىك روليكتەر وتباسى قۇندىلىقتارىن, ادامگەرشىلىكتى جانە ءپاتريوتيزمدى ناسيحاتتايدى.
«Qazaqstan» رترك» باسشىسى ەرلان قارين تەلەديدار كورۋ رەيتينگىن انىقتاۋدىڭ كەمشىلىكتەرىنە توقتالدى. ونىڭ ايتۋىنشا, قازىرگى جۇيە ناقتى جاعدايدى كورسەتپەيدى.
«باق سالاسىنداعى مەملەكەتتىك ءتىلدىڭ دامۋىنا ىقپال ەتەتىن فاكتور – زەرتتەۋ كومپانيالارىنىڭ ناتيجەسىنىڭ ساپاسى. الايدا ولار كەلتىرگەن رەيتينگ شىندىقتان الشاق جاتىر. مىسالى, «TNS Central Asia» كومپانياسى زەرتتەۋدى ءىرى قالالاردا تۇراتىن 2200 تىركەلگەن ابونەنتتەر اراسىندا جۇرگىزگەن. رەسپوندەنتتەردىڭ 58 پايىزى قازاقتىلدى. قازاقتىلدى اۋديتوريانىڭ باسىم بولىگى قالالاردا ەمەس, شەت جاقتا,
اۋىلداردا تۇرادى. سوندىقتان, ولاردىڭ تالعامدارى ەسكەرىلمەي قالادى», – دەدى ە.قارين.
«Qazaqstan» تەلەارناسى باسشىسىنىڭ پايىمداۋىنشا, ناقتى رەيتينگكە قول جەتكىزۋ ءۇشىن زەرتتەۋدى تۇرلەندىرۋ قاجەت. ول ساۋالناما, بليتس-ينتەرۆيۋ, الەۋمەتتىك زەرتتەۋلەر جۇرگىزىپ, فوكۋس توپتارمەن جۇمىس ىستەۋ كەرەكتىگىن ايتتى.
وتىرىس بارىسىندا ۇلتتىق دومەندى اۋىستىرۋ ماسەلەسى دە ءسوز بولدى. قوعامدىق كەڭەستىڭ مۇشەسى نۇرلان يسين «kz» دومەنىن «qz»-گە وزگەرتۋدى ۇسىندى. ول ەرتەرەك قيمىلداماسا, «qz» دومەنىن باسقالار يەمدەنىپ كەتۋى ىقتيمال ەكەنىن ايتادى.
«ۇلتتىق دومەندى جاڭا الىپبيگە سايكەس لاتىنشا «qz»-گە اۋىستىرۋ قاجەت. بۇل ماسەلەنى تەز شەشكەنىمىز ءجون. سوندىقتان, وسىعان جاۋاپتى مەكەمە ICANN-عا سۇرانىس جىبەرىلۋى ءتيىس», – دەدى ن.يسين.
جيىندا «اشىق ۇكىمەت» پورتالىنىڭ جۇمىسى دا تالقىلاندى. بۇل جونىندە اقپارات جانە كوممۋنيكاتسيالار مينيسترلىگىنىڭ باق سالاسىنداعى مەملەكەتتىك ساياسات دەپارتامەنتى ديرەكتورىنىڭ ورىنباسارى بەكزات راحيموۆ بايانداما جاسادى. ونىڭ ايتۋىنشا, پورتال قازىرگى تاڭدا ەكى تىلدە قاجەتتى اقپاراتتاردى تاراتىپ وتىر.
اباي اسانكەلدى ۇلى,
«ەگەمەن قازاقستان»
