كوميتەتتىڭ كوشپەلى وتىرىسىن اشقان د.نازارباەۆا ەلباسى ەلىمىزدىڭ قورعانىس قابىلەتتىلىگى مەن اسكەري قاۋىپسىزدىگىن قامتاماسىز ەتۋگە, اسكەرلەردىڭ دايىندىق دەڭگەيىن ارتتىرۋعا, اسكەري تەحنيكانىڭ جاڭعىرتىلۋىنا ەرەكشە نازار اۋداراتىنىن اتاپ ءوتتى.
جيىندا ەلىمىزدىڭ اسكەري-تەڭىز كۇشتەرىنىڭ قولباسشىسى جانداربەك جانۇزاقوۆ, ۇقك توراعاسىنىڭ ورىنباسارى-شەكارا قىزمەتىنىڭ ديرەكتورى دارحان ءدىلمانوۆ, «اقتاۋ حالىقارالىق تەڭىز ساۋدا پورتى» ۇلتتىق كومپانياسى» اق پرەزيدەنتى ا.تۇرىكپەنباەۆ ءسوز سويلەدى.
ءوز كەزەگىندە د.نازارباەۆا باتىس ايماقتىڭ قاۋىپسىزدىگىن قامتاماسىز ەتۋدىڭ ستراتەگيالىق ماڭىزىن اتاپ ءوتتى. سەناتور ەلىمىزدىڭ شەكارا قىزمەتى مەن اۋە قورعانىسىن نىعايتۋدىڭ ءۇش جىلدىق باعدارلاماسىن ازىرلەۋ قاجەتتىگىن ەسكە سالدى.
د.نازارباەۆانىڭ پىكىرىنشە, براكونەرلىكپەن كۇرەس, وتاندىق كەمە جاساۋ, اسكەري قىزمەتكەرلەردى تۇرعىن ۇيمەن قامتاماسىز ەتۋ, شەكارا قىزمەتىنە اسكەري بولىمشە ورنالاسقان جەرلەردەن جەر تەلىمدەرىن بەرۋ ماسەلەلەرى تەزىرەك شەشۋدى تالاپ ەتەدى. سونداي-اق حالىقارالىق قاتىناستار, قورعانىس جانە قاۋىپسىزدىك كوميتەتىنىڭ توراعاسى د.نازارباەۆا اۋىل شارۋاشىلىعى مينيسترلىگى باسشىلىعىنىڭ قاتىسۋىمەن سەناتتا دوڭگەلەك ۇستەل وتكىزۋدى تاپسىردى.
اقتاۋدا بولعان كەزىندە سەناتورلار اسكەري-تەڭىز بازاسىندا, تەڭىز جاياۋ اسكەرى بريگاداسىندا, اۋە قورعانىسى نىساندارىندا, اقتاۋ حالىقارالىق تەڭىز ساۋدا پورتى مەن تەڭىزدەگى سولتۇستىك تەرمينالدا, تۇرىكمەنستانمەن شەكاراداعى تەحنيكالىق بايقاۋ بەكەتىندە جانە «قۇرىق» پورتىندا بولدى. دەپۋتاتتارعا شەكارا قىزمەتىنىڭ جانە اسكەري-تەڭىز كۇشتەرىنىڭ «سارباز», «قاراعاندى», «الاتاۋ», «ورال» كەمەلەرى, سونداي-اق تەڭىز بولىگىندەگى مەملەكەتتىك شەكارانى قورعاۋ جانە كۇزەتۋدە شەكاراشى بولىمشەلەرىمەن ءوزارا ءىس-قيمىل ءتارتىبى كورسەتىلدى.
سەناتورلار اقتاۋدا «دارىن» بەيىمدەۋ مەكتەبىنىڭ جۇمىسىمەن جانە ماتەريالدىق-تەحنيكالىق بازاسىمەن دە تانىستى.
«سامۇرىق-قازىنا» قورى ىسكە اسىرعان «مەنىڭ ەلىم» باعدارلاماسى اياسىندا ماڭعىستاۋ وبلىسىنداعى زاعيپ بالالارعا ارنالعان 4 بەيىمدەۋ مەكتەبى ارنايى جابدىقتارمەن جانە ادىستەمەلىك ماتەريالدارمەن قامتاماسىز ەتىلدى. ايتا كەتەيىك, اي سوڭىنا دەيىن اقتوبە, اتىراۋ, باتىس قازاقستان جانە شىعىس قازاقستان وبلىستارىنداعى 25 مەكتەپتى ءتيىستى قۇرالدارمەن جابدىقتاۋ جوسپارلانىپ وتىر.
گۇلايىم شىنتەمىرقىزى,
«ەگەمەن قازاقستان»
ماڭعىستاۋ وبلىسى
